ކޮންމެ ކޮއިނެއް އެއްކޮށް މަންމައާބައްޕަ އުމްރާއަށް ފޮނުވި ނަމޫނާ

ޒުވާނަކު ވެލާނާ އިންޓަނޭޝަނަލް އެއާޕޯޓުގައި އޭނާގެ މަންމައާ ބައްޕައާއެކު ފޮޓޯއެއް ނަގައި ފޭސްބްކުގައި ޝެއާ ކުރަމުން އިއްޔެ މިހެން ލިޔެފައި އޮތެވެ: "ފޮނި ކަރުނައިގެ ދުވަހެކެވެ؛ ކާމިޔާބީއާއި ލޯބީގެ ރަހަ އޭގެ ނުހަނު މަތީ ދަރަޖައިގައި ހިތާއި ނަފްސަށް ވެރިވެގެންދާ ވަގުތު ކޮޅެކެވެ!"

ހައްޖަށާއި އުމްރާއަށް ދިއުމަކީ ކޮންމެ މުސްލިމެއްގެ ހުވަފެނެކެވެ. އަޒުމެކެވެ. ގަދަ އަޅައި މަސައްކަތްކޮށް އެ ހުވަފެނުގައި ކުލަ ޖެއްސުމަކީ އެހައި ފަސޭހަ ކަމަކަށް ވެފައެއް ނޯވެ އެވެ. މުހައްމަދު އަރީހް، 23، ވަށް ކުރީންސުރެ އެ ހުވަފެން ދެކެން ފަށައިފި އެވެ. އޭނާގެ ވާހަކަ މިހާ ހިސާބުން ފަށާށެވެ.

ޒުވާން އަރީހްގެ ތަފާތަކީ ހުވަފެން ދެކޭ މީހަކަށް ވެގެން ހުރުމުގެ ބަދަލުގައި ހުވަފެން ހަގީގަތަކަށް ބަދަލު ކުރާ މީހަކަށް ވާން ގަދައި އަޅައި މަސައްކަތްކޮށް އެކަމާ ވެގެން ހިނގައިގަތުމެވެ. ކާމިޔާބު ވަންދެން ނުހުއްޓި ހިނގުމެވެ.

އޭނާގެ މައި ހުވަފެނަކީ މައިން ބަފައިންނަށް މާތް ހައްޖެވެ؛ އެކަމަކު އެންމެ ކުޑަމިނުން މައިންބަފައިން އުމްރާއަކަށް ފޮނުވައި ދިނުމެވެ. އުމްރާގެ އަޅުކަން އަދާކުރުމަށް އޭނާގެ އަމިއްލަ ހަލާލު ފައިސާއިން މަންމަ އާއި ބައްޕަ ފޮނުވައި ދޭން އަރީހް އުންމީދު ކުރުމުން ގެންދިޔަ އެވެ. ޅަ ދުވަހުން ފަށައިގެނެވެ.

"މަދަރުސީ ދައުރުގެ ފަހު އަހަރުތަކުން ފެށިގެން ދެކެމުން އައި އެންމެ ބޮޑު އުއްމީދަކީ އަމިއްލަ ހަރަދުގައި މަންމައާއި ބައްޕަ އުމްރާއަށް ފޮނުވުމުން" ފޭސްބުކްގައި އަރީހް ލިޔެފައި ވެއެވެ.

ކުޑައިރު އޭނާ ފެށި މަސައްކަތުގައި އެއް ލާރި ލިބުނު ނަމަވެސް ދެލާރިއަށް ބަދަލު ކުރަން އަރީހް ގެންދިޔައީ ފޮރުވަމުންނެވެ. އެހެން އެއްކުރި ވަކި ލާރިން އެކަނި ވެސް، 3،400 ރ. އަރީހަށް ޖަމާ ކުރެވުނެވެ. އަޒުމަކަށް ހެދީ ލިބޭ އެއްވެސް ރުފިޔާއެއް ބޭކާރު ގޮތުގައި ހޭދަ ނުކުރާށެވެ. އަބަދުމެ އޭނާ ދެކޭ ހުވަފެން ހަގީގަތަކަށް ހަދާށެވެ.

ލ. ފޮނަދުއަށް އުފަން މި ޒުވާނާއަށް ރައްކާ ކުރަން ބައެއް ފަހަރު 100 ރ. ލިބޭ ފަހަރުވެސް ދިޔައެވެ. ނަނަވެސް ހިތްވަރު އެލުވައިނުލައި އޭނާ ދެމިހުރީ ލިބޭ މިންވަރު ރައްކާކުރުގަ އެވެ. ދިވެހިބަހުން އިނގިރޭސިބަހަށް ލިޔުން ތަރުޖަމާ ކޮށް ދިނުމާއި ވިޔަފާރި ރިވިއު ލިޔެދިނުމާއި ޕޯސްޓަރު ހެދުމުގެ މަސައްކަތްކޮށްގެން ފައިސާ ހޯދަމުން ގެންދިޔަ އެވެ.

އަރީހް ދުށް އެ ހުވަފެނުގައި ކުލަ ޖެހުނީ އެ މަސައްކަތް ފެށިތާ ހަތަރު އަހަރު ފަހުންނެވެ. އެކަމަކު 2020 ކޮވިޑާ ހެދި މަންމަ އާއި ބައްޕަ އުމްރާއަށް ފޮނުވޭ ގޮތެއް ނުވި އެވެ. ނަމަވެސް އިއްޔެ އޭނާގެ މަންމަ އާއި ބައްޕަ އުމްރާއަށް ފުރައިފި އެވެ. ދެމަފިރިން މައްކާގެ ބިމަށް ފުރައިގެން ދިޔައީ ދަރިފުޅުގެ ހަރަދުގަ އެވެ. މަންމައާ ބައްޕައަށްޓަކައި އެންމެ ކުޑަމިނުން އެ ދެމަފިރިން އުމްރާއަށް ފޮނުވައިދޭން ކެތްތެރި ކަމާއެކު ހުއްޓާ ނުލައި އެއްކުރި ފައިސާއިންނެވެ. މަންމައާ ބައްޕަގެ އެ ދަތުރަށް އޭނާ 57،000ރ. އެއްކުރި އެވެ.

އަރީހްގެ މައިންބަފައިންގެ އުންމީދެއް ފުރިހަމަވީ އެވެ. އެހެން ވެގެން އޭނާ ހުރީ ވަރަށް އުފަލުންނެވެ. އެ އުފާ ލިބުނީޫ ކެތްތެރިކަމާއެކު އޭނާ ކުރި ބުރަ މަސައްކަތުންނެވެ. މިހިސާބަކުން އަރީހުގެ ދަތުރު ނިންމާލީއެއް ނޫނެވެ. މަންމައާ ބައްޕާ ގޮވައިގެން އެކުގައި އިރާދަ ކުރެއްވިއްޔާ ހައްޖުގެ އަޅުކަމަށް ދިއުމަކީ އަޒުމެވެ.

އެ ދަތުރު އެ އާއިލާއަށް ފަހިކޮށް އަމާން ކޮށް ދެއްވާށި!