އިތުރުގަޑީ ފައިސާ ނުދޭ 49 ރިސޯޓެއްގެ ލިސްޓު މިނިސްޓަރަށް
ރާއްޖޭގައި 150 ރިސޯޓެއް ހިންގައެވެ. 49 ރިސޯޓަކުން އިތުރު ގަޑީގައި މަސައްކަތް ކުރުވައި އެކަމަކު ފައިސާ ނުދެ އެވެ. ޓީމުން ވަނީ އެ ޝަކުވާ ޓޫރިޒަމް މިނިސްޓަރު ޑރ. އަބްދުﷲ މައުސޫމާ ހަމައަށް ގެންގޮސް ހުށަހަޅާފަ އެވެ.
ރިސޯޓު މުވައްޒަފުންގެ ހައްގަށް މަސައްކަތް ކުރާ "ރިސޯޓް ވޯކާސް" އިން އެކުލަވާލި އިތުރު ގަޑީގައި މަސައްކަތް ކުރުވައި ފައިސާ ނުދޭ 49 ރިސޯޓުގެ މައްސަލަ ޓޫރިޒަމް މިނިސްޓަރީއާ ހަމައަށް ގެންގޮސް ހުށަހަޅައިފި އެވެ.
ރާއްޖޭގެ އެކި ރިސޯޓުތަކުގައި މަސައްކަތް ކުރާ ރިސޯޓު މުވައްޒަފުން ހިންގާ ރިސޯޓު ވޯކާސް ގްރޫޕުން އެކުލަވައިލި އިތުރު ގަޑީގައި މަސައްކަތް ކުރުވައި އެކަމަކު އުޖޫރަ ނުދޭ ރިސޯޓުތަކުގެ މައްސަލަ ޓޫރިޒަމް މިނިސްޓަރު ޑރ. އަބްދުﷲ މައުސޫމްގެ އަރިހަށް ފޮނުވީ ޓޫރިޒަމް މުވައްޒަފުންގެ ހައްގަށް މަސައްކަތް ކުރާ ޓޫރިޒަމް އެމްޕްލޯއީސް އެސޯސިއޭޝަން އޮފް މޯލްޑިވްސް (ޓީމް) އިންނެވެ. މި ލިސްޓުގައި ރާއްޖޭގައި މަޝްހޫރު ގިނަ ރިސޯޓުތަކެއް ހިމެނެ އެވެ.
ޓީމުން ޓޫރިޒަމް މިނިސްޓަރު މައުސޫމަށް ފޮނުވި ސިޓީގައި ފާހަގަ ކޮށްފައި ވަނީ 49 ރިސޯޓަކުން ވަޒީފާއާބެހޭ ގާނޫނުގެ 37 ވަނަ މާއްދާގެ (ށ) އާ ހިލާފުވެފައިވާ ކަމަށް ބުނާ މައްސަލައެކެވެ.
ޓީމްގެ ސެކްރެޓަރީ ޖެނެރަލް މައުރޫފު މައުރޫފު ޒާކިރު (މަޓޭ) "މި" ނޫހަށް ވިދާޅުވީ ރިސޯޓު ވޯކާސް އިން އެ ޖަމިއްޔާ އަށް އިތުރު ގަޑީގައި ފައިސާ ނުދޭ ރިސޯޓުތަކުގެ މައްސަލައެއް ހުށަހަޅާފައިވާ ކަމަށެވެ. އެ މައްސަލަ ކަމާބެހޭ ފަރާތްތަކަށް ހުށަަހަޅާނެ ކަމަށެވެ.
"މިއީ ކަނޑައެޅިގެން ވަޒީފާއާ ބެހޭ ގާނޫނާ ހިލާފުކަމެއް. އެކަމުގެ ޝަކުވާ [ރިސޯޓް ވޯކާސް] އިން ވަނީ ހުށަހަޅާފައި،" މައުރޫފު ވިދާޅުވި އެވެ.
މިއީ ކަނޑައެޅިގެން ވަޒީފާއާ ބެހޭ ގާނޫނާ ހިލާފުކަމެއް. ޝަކުވާ ރިސޯޓް ވޯކާސް އިން ވަނީ ހުށަހަޅާފައި
މައުރޫފު ޒާކިރު | ޓީމްގެ ސެކްރެޓެރީ ޖެނެރަލް
ރާއްޖޭގައި 150 ރިސޯޓެއްގައި ހިދުމަތް ދެމުން ގެންދެ އެވެ. އެހެންވެ މިހާރު ޝަކުވާ ހުށަހަޅާފައިވާ 49 ރިސޯޓަކީ ޓޫރިޒަމް ސިނާއަތުގެ ބޮޑު ބައެކެވެ.
ކޮމެންޓް
Republic of Maldives