އެކްސިޑެންޓަކުން 10 ދުވަހުގެ ކޯމާއެއް: ހިތްދަތި ވަކިވުމެއް!

ޒުވާން އުމުރުގެ، ވިހި ބާވީހުގައި މަރުވި ހަބަރު ލިބުމުން އެންމެނަށް ވެސް އަދި އެ ޒުވާނެއްގެ އާއިލާ އާއި އެކުވެރިންނަށް އެކަން ގަބޫލު ކުރަން ދަތިވެ އެވެ. ނ. ވެލިދޫއަށް އުފަން އަބްދުﷲ އަލްތާފް ލަތީފް، އޭނާގެ އުމުރުން 22 އަހަރުގައި ދުނިޔެ އަޅައި ދިޔައީ އެކްސިޑެންޓަކަށް ފަހު ހޭނަރައި، ކޯމާއެއްގައި 10 ދުވަހު އޮތުމަށް ފަހު އެވެ. އަލްތާފު މަރުވީ ރޭ ފަތިހު އެވެ. އެކަން ވީ ހިތްދަތި ވަކިވުމަކަށެވެ. ހިތާމަވެރި ހަބަަރަކަށެވެ. އަދި އެކަން ގަބޫލެއް ނުކުރެވެ އެވެ.

ވެލީދޫއަށް އުފަން އަދި ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގު (ވެލިދޫ މޯޑް) / ކުރީގެ ނޫސްވެރިޔާ ވިދާޅުވި ގޮތުގައި އަލްތާފަކީ އެކުގައި އުޅުނު ގާތް އެކުވެރި އެކެވެ. އޭނާ އެކްސިޑެންޓްވެ ހޭ ނާރައި ދިހަ ވަރަކަށް ދުވަހު އޮތް އިރު އެކަން ބަލައި އުޅުވުނު ނަމަވެސް ކުއްލިއަކަށް ވަކިވެގެން ދިއުމުން ގަބޫލު ކުރާން ދަތިވެއްޖެ އެވެ.

"އެކުވެރިއެއް އެކަންޏެއް ނޫން ރަނގަޅަށް ކިޔަވައިގެން އިމިގްރޭޝަންގެ ރަނގަޅު ވަޒީފާއެއްގައި ހިދުމަތް ވެސް ކުރަމުން އައި ޒުވާނެއް އެއީ. އޭނާ ވަކިވެގެން ދިޔައީ ހިތްދަތި ގޮތަކަށް" މޯޑް ވިދާޅުވި އެވެ. -- އޭގެ ކުރީން ޖުވެނައިލް ޖަސްޓިސްގެ ވަޒީފާއެއް ވެސް ފުރި އެވެ.

އަލްތާފުގެ އެހެން އެކުވެރީންނަށް ވެސް ވީ ހަމަ އެހެނެވެ؛ ފުރަތަމަ ގަބޫލު ނުކުރެވުނީ އެވެ. ދެން ހިތްދަތި ވަކިވުމެއްގެ ހިތާމަވެރިކަން ވަށައިލީ އެވެ. އޭގެ ތެރެއިން އެއް އެކުވެރިޔަކު ބުނި ގޮތުގައި "އަލްތާފުގެ މަރުގެ ހަބަރުން ލިބުނީ ކުއްލި ސިހުމަކާއި ފުން ހިތާމަ" އެކެވެ. -- ފޭސްބުކްގައި އޭނާގެ އެކުވެރިން ފާޅު ކޮށްފައިވާ ޝުއޫރުތަކުގެ ތްރެޑް ނިއުޅައިލުމުން ވެސް ފެންނާން އޮތީ ހަމަ އޭނާ ބުނާ ފަދަ ހިތާމައިގެ ކަޅު އަކުރުތަކެކެވެ.

މިދިޔަ ނޮވެމްބަރު މަސް ނިމޭން ދިޔައިރު ވެސް އަލްތާފް ބަރާބަރެވެ؛ ކޮޅަށް ހުރީ ރަނގަޅު ސިއްހަތަކާއެކު އެވެ. ރަނގަޅަށް ހުރި އަލްތާފުގެ ހުރިހާ ކަމެއް އެކޮޅުކޮޅުން ޖެހުނީ ނޮވެމްބަރު މަހުގެ 30 ވަނަ ދުވަހު ހުޅުމާލޭގައި ގިނަ އެކްސިޑެންޓްތަކެއް ހިނގައި ގިނަ ބަޔަކު މަރު ވެސް ވެފައިވާ ނިރޮޅު މަގުގައި ހިނގި ބޮޑު އެކްސިޑެންޓެއްގައި ލިބުނު އަނިޔާތަކަކާ ހަމައިންނެވެ.