ސްޓާލިން ޗެލްސީއަށް ބަދަލުވުމާ ކައިރިއަށް

މެންޗެސްޓާ ސިޓީގެ ހުރިހާ މެއްޗެއްގެ ފުރަތަމަ 11 އިން ޖާގަ ދެވޭނެ ކަމުގެ ޔަގީންކަން ކޯޗް ޕެޕް ގާޑިއޯލާއަށް ނުދެވޭތީ އާއި އަދި އާ ސީޒަންގައި ސިޓީގެ ޓެކްޓިކަލް ޕްލޭން ގެންގުޅޭ ގޮތުން ފުރުސަތު ކުޑަވެދާނެ ކަމަށް ބެލެވޭތީ ހިތްހަމަ ނުޖެހިފައި ހުރި ޕްލޭމޭކާ، ރަހީމް ސްޓާލީ ވާދަވެރި ޗެލްސީއަށް ބަދަލުވުމުގެ ފަހު މަރުހަލާތައް ފަށައިފި އެވެ.

މީޑިއާ ރިޕޯޓްތައް ބުނާ ގޮތުންނަމަ އިނގިރޭސި ތަރި މިހާރު ވަނީ އޭނާ ކުރިމަތީގައި އޮތް ހުރިހާ ފުރުސަތެއް ދޫކޮށްލައި 55 މިލިއަން ޕައުންޑުގެ ފީއަކަށް ޗެލްސީއަށް ބަދަލުވާން މުޅީން ނިންމައިގެނެވެ. އަދި ދެ ކްލަބުގެ މެދުގައި މިހާރު ޓާމްސްތަކަށް އެއްބަސްވެފައިވާ ކަމަށް ވެސް ބުނެ އެވެ. އާސެނަލް އާއި ބަޔާން މިއުނިކާއި ބާސެލޯނާއިން ވެސް ސްޓާލި ހޯދަން ވަރަށް ބޮޑަށް ބޭނުންވި އެވެ. ނަމަވެސް ސްޓާލިންއަށް ޝައުގުވެރި ވެވުނީ ޗެލްސީގެ ކޯޗް ތޯމަސް ޓްހޫލްގެ ޕްލޭނަށެވެ. ބުނޭ ގޮތުގައި ފާއިތުވެ ދިޔަ ދެ ދުވަހުގެ ތެރޭ ޓުހޫލް ވަނީ ދެ ފަހަރެއްގެ މަތީން ސްޓާލިންއާ ވާހަލަ ދައްކާ ސްޓާލިން ބަދަލުކޮށްލަން އޭނާ ރާވާފައިވާ ޕްލޭން ކިޔައިދީފަ އެވެ.

އުމުރުން 27 އަހަރުގެ ސްޓާލިން ޗެލްސީއަށް ބަދަލުވެއްޖެ ނަމަ އޭނާ ވަނީ މިވަގުތު ޗެލްސީގައި ހުރި އެންމެ އަގު ބޮޑު ކުޅުންތެރިޔާ އަށެވެ. އަދި އޭނާ ވަނީ ޗެލްސީގެ އާ ވެރިޔާ ޓޮޑް ބޮއިލީގެ ދައުރުގައި ކްލަބާ ގުޅޭ ފުރަތަމަ ބޮޑު ކުޅުންތެރިޔާ އަށެވެ. ޗެލްސީ އުންމީދުކޮށްގެން އޮތީ މި މަހު ޕްރީ ސީޒަންގައި އެމެރިކާއަށް ދަތުރު ފަށާއިރު ސްޓާލީ ޓީމްގައި ހިމެނޭނެ ކަމަށެވެ.

ލިވަޕޫލާއި ސިޓީގައި ވެސް އެންމެ މުހިންމު އެއް ކުޅުންތެރިޔާގެ ގޮތުގައި ގިނަ ކާމިޔާބީތަކެއް ހޯދައިދިން ސްޓާލިންއަކީ ގޯލާ ރައްޓެހި އަދި ނުރައްކާތެރި ޕްލޭމޭކަރެއްގެ އިތުރުން ދުނިޔޭގެ އެންމެ ހަލުއި ކުޅުންތެރިންގެ ތެރޭގައި ހިމެނޭ ކުޅުންތެރިއެކެވެ. މިދިއަ ސީޒަންގައި ސިޓީގެ މެހްރޭޒް އާއި ޑެބްރާނޭ ފިޔަވައި އެންމެ ގިނަ ގޯލް ޖެހީ ސްޓާލިން އެވެ.