ހަލާކުވި އިގްތިސޯދާއެކު ލަންކާ ކޮޅަށް ތެދުވަނީ، ޓޫރިޒަމް އާމްދަނީ ބިލިއަނަކަށް

ސަރުކާރު ހިންގުމުގެ ނިޒާމް އެކޮޅު ކޮޅުން ޖެހި އިގްތިސޯދީ ގޮތުން ފުން ވަޅުގަނޑެއްގެ ތެރޭގައި އޮތް އަވަށްޓެރި ސްރީލަންކާގެ ޓޫރިޒަމް މަޑުމަޑުން ކޮޅަށް ތެދުވެ އާމްދަނީއަށް އެއް ބިލިއަން ޑޮލަރު ހަމަކޮށްލައިގެން އުންމީދެއް އާ ކޮށްފި އެވެ.

ދިވެހިންގެ ގިނަ ބަޔަކު ދިރިއުޅޭ އަދި ރާއްޖެއަށް އަންނަ ގިނަ ފްލައިޓްތަކެއްގެ ޓްރާންސިޓް މަންޒިލެއް ކަމަށްވާ ސްރީލަންކާގެ މަރުކަޒީ ބޭންކުން އާއްމުކުރި މައުލޫމާތުތަކެއްގައިވާ ގޮތުން މި އަހަރުގެ ޖެނުއަރީން ނޮވެމްބަރު މަހުގެ ނިޔަލަށް އެ ގައުމަށް ޓޫރިޒަމް އާމްދަނީގެ ގޮތުގައި ވަނީ 1.1 ބިލިއަން ޑޮލަރު ލިބިފަ އެވެ. މިދިޔަ މަހު އެކަނި ޓޫރިޒަމް ދާއިރާ އިން އާމްދަނީގެ ގޮތުގައި 107.5 މިލިއަން ޑޮލަރު ވަނީ ލިބިފައި އެވެ.

މި އަދަދަކީ މިދިޔަ އަހަރާ އަޅާބަލާނަމަ އެ ގައުމުގެ ޓޫރިޒަމް އާމްދަނީއަށް އައި ވަރަށް ބޮޑު ކުރިއެރުމެކެވެ. މިދިޔަ އަހަރުގެ ނޮވެމްބަރު މަހުގެ ނިޔަލަށް އެ ގައުމަށް ގޮސްފައި ވަނީ 104,989 ޓޫރިސްޓުންނެވެ. އަދި އެ އަހަރު އާމްދަނީގެ ގޮތުގައި ލިބިފައިވަނީ 273.6 މިލިއަން ޑޮލަރެވެ.

ލަންކާ ޓޫރިޒަމް ތަފާސް ހިސާބުތައް ދައްކާ ގޮތުން މަހުން މަހަށް އެ ގައުމުގެ ޓޫރިޒަމަށް ދަނީ ދިރުން ލިބެމުންނެވެ. މިދިޔަ މަހު އެ ގައުމަށް 59,759 ޓޫރިސްޓުން ވަނީ ޒިޔާރަތް ކޮށްފަ އެވެ. މި އަދަދަކީ އޮކްޓޫބަރު މަހު އެ ގައުމަށް ދިޔަ ޓޫރިސްޓުންގެ އަދަދާ ބަލާއިރު 42 ޕަސެންޓުގެ އިތުރުވުމެކެވެ.

ތަފާސް ހިސާބުތައް ދައްކާ ގޮތުން މި އަހަރުގެ ވޭތުވެދިޔަ 11 މަސް ދުވަހުގެ ތެރޭގައި އެ ގައުމަށް ޖުމްލަ 628,017 ޓޫރިސްޓުން ވަނީ ހަމަވެފަ އެވެ. ދުވާލަކު އަންނަ ޓޫރިސްޓުންގެ އަދަދު ނުވަތަ ޑެއިލީ އެރައިވަލްސް ވެސް ދުވަހުން ދުވަހަށް އިތުރުވަމުންދާ ކަމަަށް ލަންކާގެ ޓޫރިޒަމް ޑޭޭޓާތަކުން ދައްކަ އެވެ. މިދިޔަ އޮކްޓޫބަރު މަހު ޑެއިލި އެރައިވަލްސް 1355 ގައި ހުރިނަމަވެސް މިދިޔަ މަހުގެ ކޮންމެ ދުވަހަކު އެވްރެޖުކޮށް 1,991 ޓޫރިސްޓުން އައިސްފައިވާ ކަމަށް ތަފާސް ހިސާބުތަކުން ދައްކަ އެވެ.

މިސް މެނޭޖުމަންޓާއި ސަރުކާރު ކުންފުނިތަކުގެ ބޭކާރު ހަރަދު ބޮޑުވުން އަދި ކޮވިޑު މެނޭޖު ނުކުރެވުގެ ނަތީޖާއެއްގެ ގޮތުން ބަނގުރޫޓުވި ސްރީލަންކާގެ ޓޫރިޒަމަށް މިފަހުން ލިބުނު އެއް އުންމީދަކީ ކްރޫޒްލައިނާއަށް އެ ގައުމުގެ ބަނދަރަށް އަންނަން ފެށުމެވެ. ޔޫރަޕު ފްލައިޓްތައް އަންނަން ފެށި މި ވަގުތު ފެށި މި ދަތުރުތަކާއެކު ލަންކާއަށް ވަނީ އުންމީދުއާ ވެފަ އެވެ.