ނިރުފެހި އަލިފާން: ފަސް އާއިލާއަކަށް އެއް މަހު ކުއްޔާއި ދެ މަހުގެ އެޑްވާސް ފައިސާ ދީފި

މި މަހުގެ 10 ވަނަ ދުވަހު ރޭ މ. ނިރުފެހި ގޭގައި ހިނގި އަލިފާނުގެ ހާދިސާގައި އެ ގެއާ އިންވެގެން ހުރި ދެ ގޭގައި ދިރިއުޅުނު ފަސް އާއިލާއަކަށް އެހީތެރިވެ ދީފައިވާ ކަމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން މިއަދު ބުނެފި އެވެ.

އެންޑީއެމްއޭ އިން މިއަދު ބުނި ގޮތުގައި އަލިފާނުގެ ހާދިސާގައި ނިރުފެހި ހިމެނޭހެން ހަ ގޭބީސީއަކަށް (މ. ވާދީ ހަތަރު ގޭބީސީ އަކާއި މ. ސޭންޑް ރޯސް އެއް ގޭބީސީ) ބޮޑެތި ގެއްލުންތައް ލިބިފަައިވެއެވެ. މީގެ ތެރެއިން ފަސް ގޭބީސީއެއްގައި ކުއްޔަށް ދިރިއުޅުނު އާއިލާތަކަށް ކާރިސާތަކުގައި އިންސާނީ އެހީތެރިކަން ފޯރުކޮށް ދިނުމުގައި އަމަލުކުރާ އުސޫލުގެ ތެރެއިން އެެހެން ތަނެއް ކުއްޔަށް ހިފުމަށް 15 ދުވަހުގެ މުއްދަތެއް ދީފައިވާ ކަމަށެވެ. އެ މުއްދަތުގައި ވަގުތީ ބޯހިޔާވަހިކަމާއި ކެއިން ބުއިމުގެ ކަންކަން ހަމަޖައްސަން ފައިސާ ދީފައިވާ ކަމަށް ބުންޏެވެ.

އަދި މި އާއިލާތައް އެހެން ތަނަކަށް ބަދަލުވުމަށް ތަނެއް ކުއްޔަށް ހިފުމަށް މަސް ދުވަހުގެ ކުއްޔާއި ދެ މަހުގެ އެޑްވާސް ފައިސާ ހަމަޖައްސައިދީފައިވާ ކަމަށްވެސް ބުންޏެވެ.

މީގެ އިތުރުން ނިރުފެހީގައި ދިރިއުޅުނު ނުވަ ބިދޭސީއަކަށް ދިވެހި ރެޑްކްރެސެންޓުން އެހީތެރިކަން ފޯރުކޮށް ދެމުން ދާ ކަމަށް އެންޑީއެމްއޭ އިން ބުންޏެވެ. މިވަގުތު އެ އޮތޯރިޓީގެ ވަގުތީ ބޯހިޔާވަހި ކަމުގައި އެއްވެސް އާއިލާއެއް ނެތް ކަމަށްވެސް ބުންޏެވެ.

ނިރުފެހި އަލިފާނުގެ ހާދިސާގައި 10 މީހަކު މަރުވި އެވެ. މިއީ ރާއްޖޭގައި ހިނގި އަލިފާނުގެ އެންމެ ހިތާމަވެރި ހާދިސާއެވެ.