ތަފާސް ހިސާބުތައް ދައްކާ ގޮތުން މިދިޔަ އަހަރާ އަޅާބަލާއިރު ދަރަންޏަށް ވަނީ 3.91 ބިލިއަން ރުފިޔާ އިތުރުވެފަ އެވެ.

މި އަހަރުގެ ތިންވަނަ ކުއާޓަރުގެ ނިޔަލަށް ދައުލަތުގެ ޖުމްލަ ދަރަނި 156.6 ބިލިއަން ރުފިޔާ އަށް އަރާފައިވާ ކަމަށް އެންމެ ފަހުގެ ތަފާސްހިސާބު ތަކުން ދައްކައިފި އެވެ.
ފިނޭންސުން އާއްމުކުރި ދަރަނީގެ ރިޕޯޓް ދައްކާ ގޮތުން ތިންވަނަ ކުއާޓަރާ ހަމައަށް ބަލާނަމަ ޕަބްލިކް އެންޑް ޕަބްލިކްލީ ގެރެންޓީޑް ޑެޓް ހުރި މި އަދަދަކީ މި އަހަރުގެ ދެވަނަ ކުއާޓަރުގައި ދައުލަތުގެ ދަރަނި ހުރި މިންވަރު ކަމަށްވާ 152.79 ބިލިއަން ރުފިޔާއާ އަޅާބަލާއިރު 3.91 ބިލިއަން ރުފިޔާގެ އިތުރުވުމެކެވެ. އަދި 2025 ވަނަ އަހަރުގެ ތިންވަނަ ކުއާޓަރުގައި ދަރަނި ހުރި މިންވަރު ކަމަށްވާ 150.34 ބިލިއަން ރުފިޔާއާ އަޅާބަލާއިރު މިއީ 6.35 ބިލިއަން ރުފިޔާގެ އިތުރުވުމެކެވެ.
ގައުމީ އުފެއްދުންތެރިކަމުގެ ނިސްބަތުން (ޖީޑީޕީގެ ނިސްބަތުން) ދައުލަތުގެ ޖުމްލަ ދަރަނި މިހާރު ހުރީ %127.8 އެވެ. ދެވަނަ ކުއާޓަރުގައި މި އަދަދު ހުރީ %124.6 ގައެވެ. މިއަހަރުގެ ޖީޑީޕީ އަންދާޒާކޮށްފައިވަނީ 122,6 މިލިއަން ރުފިޔާގަ އެވެ.
ޖުމްލަ ދަރަނީގެ ތެރެއިން އެންމެ ބޮޑު ބައެއް ހިއްސާކުރަނީ އެތެރޭގެ ދަރަންޏެވެ. އެގޮތުން އެތެރޭގެ ދަރަނި ވަނީ ދެވަނަ ކުއާޓަރުގައި ހުރި 97.35 ބިލިއަން ރުފިޔާއިން 101.05 ބިލިއަން ރުފިޔާއަށް (ޖީޑީޕީގެ %82.4 އަށް ) އިތުރުވެފައެވެ.
ހަމައެއާއެކު، ބޭރުގެ ދަރަނި ހުރީ 55.65 ބިލިއަން ރުފިޔާގައެވެ. މިއީ ޖީޑީޕީގެ %45.4 ގަ އެވެ. ވޭތުވެދިޔަ އަހަރުގެ ފަހުކޮޅާ އަޅާބަލާއިރު ބޭރުގެ ދަރަނީގެ އަދަދު ވަނީ ދަށްވެފައެވެ. އެގޮތުން 2025 ވަނަ އަހަރުގެ ހަތަރުވަނަ ކުއާޓަރުގައި ބޭރުގެ ދަރަނި ހުރީ 63.07 ބިލިއަން ރުފިޔާގައެވެ