ބީއެމްއެލްގެ ކާނިވާ 44 މިއަދު ހުޅުމާލޭގައި ފަށަަނީ

ބޭންކް އޮފް މޯލްޑިވްސް (ބީއެމްއެލް) ގެ 44 ވަނަ އަހަރީ ދުވަހުގެ މުނާސަބަތުގައި "ކާނިވާ 44" ގެ ނަމުގައި ބާއްވާ ހުޅުމާލެ ސެންޓްރަލް ޕާކުގައި ކާނިވަލެއް މިއަދު ފަށާނެ އެވެ.

ބީއެމްއެލްއިން ބުނީ ހަތަރު ދުވަހުގެ މުއްދަތަށް ކުރިއަށްގެންދާ މި ކާނިވަލަކީ އާއިލާތަކާއި ރައްޓެހިންނަށް އެކުގައި އުފާވެރި ވަގުތުތަކެއް ހޭދަކޮށްލެވޭނެ ފަދަ ގޮތަކަށް، މުނިފޫހިފިލުވުމުގެ އެކި ކުޅިވަރުތަކާއި، ވިޔަފާރި ސްޓޯލްތަކުގެ އިތުރުން އަގުހުރި އިނާމުތައް ހޯދުމުގެ ފުރުސަތު ތަނަވަސްކޮށްދީގެން އިންތިޒާމުކުރާ ހަރަކާތެކެވެ.

މި ފަހަރުގެ ކާނިވަލުގެ އެންމެ ޚާއްސަ އެއް ކަމަކީ "ސްވައިޕް ވޮލެޓް" މެދުވެރިކޮށް ވިޔަފާރިކުރާ ފަރާތްތަކަށް ހުޅުވާލާފައިވާ ޕްރޮމޯޝަނެވެ

ބީއެމްއެލް އިން ބުނީ މި ކާނިވަލުގެ ސްޓޯލްތަކުން ވިޔަފާރިކުރުމަށްފަހު ބީއެމްއެލްގެ ސްވައިޕް ބޭނުންކޮށްގެން ފައިސާ ދައްކާ ކޮންމެ މުއާމަލާތަކަށް ވެސް އަގުހުރި އިނާމުތަކުގެ ގުރުއަތުގައި ބައިވެރިވެވޭނެއެވެ. މި ޕްރޮމޯޝަނުގެ ނަސީބުވެރިންނަށް ކަނޑައަޅާފައިވާ އިނާމުތަކުގެ ތެރޭގައި ފަސް މެކްބުކް ނިއޯ އަދި 2 ބެޓެރި ސައިކަލް ހިމެނެއެވެ.

ކާނިވަލުގެ ތެރޭގައި ހުރިހާ އުމުރުފުރައަކާ ވެސް ގުޅޭ މުނިފޫހިފިލުވުމުގެ ކުޅިވަރުތަކާއި، އެކި ބާވަތްތަކުގެ މުދަލާއި ކާބޯތަކެތި ވިއްކާ ގިނަ ސްޓޯލްތަކެއް ހުންނާނެ ކަމަށް ބީއެމްއެލުން މައުލޫމާތުދެއެވެ.