ގޭންގް ރޭޕް މައްސަލައިގައި ނުވަ މީހަކު ހައްޔަރު ކޮށްފި

ގުރޫޕަކުން އަންހެނަކާއި ކުޑަކުދިންތަކަކަށް ޖިންސީ ގޯނާ ކުރި މައްސަލައިގައި ނުވަ މީހަކު ހައްޔަރު ކޮށްފި އެވެ.

ފުލުހުން މިދިޔަ ބުދަ ދުވަހު ބުނެފައި ވަނީ އަޕާ ސައުތު ޕޮލިސްގައި ހިމެނޭ ރަށެއްގައި، 22 އަހަރުގެ އަންހެނަކަށް ބަޔަކު ޖިންސީ ގޯނާކުރި ކަމަށް ތުހުމަތުކުރެވޭ މައްސަލައެއް، މިމަހުގެ 20 ވަނަ ދުވަހު ރިޕޯޓުކޮށްފައިވާ ކަމަށެވެ.

މި މައްސަލައިގެ ތަހުގީގުގެ ތެރެއިން، ކުޑަކުދިންނަށް ޖިންސީ ގޯނާކޮށް، އެ ކުދިން އެކްސްޕްލޮއިޓް ކޮށްފައިވާ ކަމަށް ތުހުމަތުކުރެވޭ މައްސަލަތަކެއް ވެސް ފާހަގަވެފައިވާ ކަމަށް އޭރު ފުލުހުން ބުނެފައިވެ އެވެ. އެނގިފައިވާ ގޮތުގައި މި މައްސަލައިގައި ދެން ޖިންސީ އަނިޔާ ލިބިފައި ވަނީ 18 އަހަރު ނުފެރޭ ދެ އަންހެން ކުދިންނަށެވެ.

ފުލުހުން މިއަދު ބުނެފައި ވަނީ މި މައްސަލައިގެ ތުހުމަތުގައި ނުވަ ދިވެހި ފިރިހެނުން ހައްޔަރު ކޮށްފައިވާ ކަމަށެވެ. 

މި މައްސަލަ ހިނގައިގެން އުޅެނީ ގދ. ތިނަދޫގަ އެވެ. މި މައްސަލައިގެ ތަހުގީގަށް، އެ ސިޓީގައި މާލޭގެ ހާއްސަ ފުލުހުންގެ ޓީމެއް މިހާރު ދަނީ ހަރަކާތްތެރިވަމުންނެވެ.

ފުލުހުން ބުނެފައި ވަނީ މި މައްސަލަ ގެންދަނީ ސީރިއަސް މައްސަލައެއްގެ ގޮތުގައި ތަހުގީގު ކުރަމުން ކަމަށެވެ.

އަނިޔާ ލިބުނު ފަރާތްތަކުގެ މަސްލަހަތު ހިފެހެއްޓުމުގެ ގޮތުން، މިފަދަ މައްސަލަތަކުގައި ހައްޔަރުކުރާ މީހުންގެ ވަނަވަރު ފުލުހުން އާންމެއް ނުކުރެ އެވެ.