ރާއްޖެ-ޕާކިސްތާނު: ދެ ގައުމުގެ ވިޔަފާރި 200 މިލިއަން ޑޮލަރަށް އިތުރުކުރަނީ

ޕާކިސްތާނާއި ދިވެހިރާއްޖެއާ ދެމެދު މިހާރު ކުރެވޭ 13.9 މިލިއަން އެމެރިކާ ޑޮލަރުގެ ވިޔަފާރި ކުރިއަށް އޮތް ދެ އަހަރު ދުވަހުގެ ތެރޭގައި 200 މިލިއަން ޑޮލަރަށް އިތުރުކުރުމަށް ދެ ޤައުމުން އަމާޒު ހިފައިފި އެވެ. 

މިކަން ހާމަކުރެއްވީ ރައީސް ޑރ. މުޙައްމަދު މުޢިއްޒާއެކު ބޭއްވެވި ގުޅިފައިވާ ޕްރެސް ކޮންފަރެންސްގައި ޕާކިސްތާނުގެ ބޮޑުވަޒީރު މުޙައްމަދު ޝެހްބާޒް ޝަރީފެވެ.

ޕާކިސްތާނުގެ ބޮޑުވަޒީރުގެ ރަސްމީ އޮފީހުގައި ބޭއްވި ރަސްމީ މަޝްވަރާތަކަށްފަހު ވާހަކަފުޅު ދައްކަވަމުން ބޮޑުވަޒީރު ޝަރީފް ފާހަގަކުރެއްވި ގޮތުގައި، މިހާރު ކުރެވޭ ވިޔަފާރިއަކީ ދެ ޤައުމުގެ އިޤްތިޞާދީ ޤާބިލުކަމާ އަޅާބަލާއިރު ވަރަށް ކުޑަ މިންވަރެކެވެ. 

މި ގުޅުން ހަރުދަނާކޮށް ފުޅާކުރުމުގެ ގޮތުން ވިޔަފާރި، ދިފާޢީ ދާއިރާ، ސިއްޙީ ދާއިރާ، ޤާބިލުކަން އިތުރުކުރުން އަދި ޑިޖިޓަލް އިންފްރާސްޓްރަކްޗަރ ހިމެނޭހެން 20 ފަހުމުނާމާ (އެމްއޯޔޫ) އަދި އެއްބަސްވުމެއްގައި ދެ ޤައުމުން ވަނީ ސޮއިކޮށްފައެވެ.

ރައީސް މުޢިއްޒު ޕާކިސްތާނަށް މި ކުރައްވާ ދަތުރުފުޅަކީ ވޭތުވެދިޔަ 11 އަހަރު ދުވަހުގެ ތެރޭގައި ދިވެހިރާއްޖޭގެ ރައީސަކު އެ ޤައުމަށް ކުރައްވާ ފުރަތަމަ ރަސްމީ ދަތުރުފުޅެވެ. 

މި ދަތުރުފުޅު ކުރިއަށް މިދަނީ ދެ ޤައުމުގެ ދެމެދުގައި ސިޔާސީ ގުޅުން ޤާއިމުކުރިތާ 60 އަހަރު ފުރޭ މުނާސަބަތާ ވެސް ދިމާކޮށެވެ.

އަލަށް ސޮއިކުރެވުނު އެއްބަސްވުންތައް ތަންފީޛުކުރުމުގެ މަސައްކަތް ޚުދު އެމަނިކުފާނު ވިލަރެސްކުރައްވާނެ ކަމުގެ ޔަޤީންކަން ބޮޑުވަޒީރު ޝަރީފް ދެއްވި އެވެ. މައިގަނޑު ގޮތެއްގައި އެއްބަސްވެވުނު ކަންތައްތަކުގެ ތެރޭގައި:

ދެޤައުމުގެ ވިޔަފާރި ފުޅާކުރުން: ކުރިއަށް އޮތް 24 މަސްދުވަހުގެ ތެރޭގައި ވިޔަފާރީގެ މިންވަރު 13.9 މިލިއަން ޑޮލަރުން 200 މިލިއަން ޑޮލަރަށް އިތުރުކުރުން.

ޑޭޓާ ސެންޓަރުތަކާއި ޓެކްނޮލޮޖީ: މާލެއާއި އަތޮޅުތެރޭގައި ޑޭޓާ ސެންޓަރުތައް ޤާއިމުކުރުމަށް ދިވެހިރާއްޖެއިން ކުރަމުންދާ މަސައްކަތްތަކަށް ޕާކިސްތާނުގެ ފަންނީ އެހީތެރިކަން ފޯރުކޮށްދިނުން. ޕާކިސްތާނުގައި މިހާރުވެސް 0.5 މެގަވޮޓުން ފެށިގެން 8.5 މެގަވޮޓާ ހަމައަށް ޑޭޓާ ސެންޓަރުތައް ހިންގަމުންދާކަން ޝަރީފް ފާހަގަކުރެއްވިއެވެ.

ތިމާވެށީގެ އެހީތެރިކަން: ރައީސް ޑރ. މުޢިއްޒުގެ އިސްނެންގެވުމުގެ ދަށުން ރާއްޖޭގައި 5 މިލިއަން ގަސް އިންދުމަށް ހިންގާ މަޝްރޫޢަށް އެހީތެރިވުމުގެ ގޮތުން 100،000 ޒައިތޫނި ގަހުގެ ކަފިންގްސް އާއި ތަފާތު ވައްތަރުގެ ގަސްގަހާގެހީގެ 100،000 އޮށް ހަދިޔާކުރުން.

ސިއްޙަތާއި ތަޢުލީމު: ޕާކިސްތާނުގެ މެޑިކަލް ޔުނިވަރސިޓީތަކުގައި ކިޔަވާ ދިވެހި ދަރިވަރުންނަށް އެއްބާރުލުން ދިނުމާއި، މިހާރުވެސް ރާއްޖޭގެ އެކި ކަންކޮޅުތަކުގައި ޚިދުމަތްކުރަމުންދާ 250 އަށް ވުރެ ގިނަ ޕާކިސްތާނުގެ ޑޮކްޓަރުންނާއި ޞިއްޙީ ޚިދުމަތްތެރިންގެ މަސައްކަތް ފާހަގަކުރެއްވުން.

މީގެ އިތުރުން، ރައީސް ޑރ. މުޢިއްޒުގެ ލީޑަރޝިޕާއި ޢާންމު ޚިދުމަތްތައް ބަލައިގަތުމުގެ ގޮތުން، އިންޓަރނޭޝަނަލް އިސްލާމިކް ޔުނިވަރސިޓީ އިސްލާމްއާބާދު (އައިއައިޔޫއައި) އިން އެމަނިކުފާނަށް އޮނަރަރީ ޑޮކްޓަރޭޓް އެރުވުމަށް ހަމަޖެހިފައިވާކަން ވެސް އިޢުލާންކުރެއްވި އެވެ.

ސަރަޙައްދީ އަދި ބައިނަލްއަޤްވާމީ މައްސަލަތަކަށް އަލިއަޅުއްވާލައްވަމުން، ދެ ޤައުމުގެ އެއްގޮތް ވިސްނުންތަކެއް ހުރިކަން ޕާކިސްތާނުގެ ބޮޑުވަޒީރު ފާހަގަކުރެއްވި އެވެ.

މިގޮތުން، ފަލަސްޠީނުގެ ޙައްޤުގައި ދިވެހިރާއްޖެއިން ގެންގުޅޭ ސާބިތު ސްޓޭންޑަށް ތަޢުރީފުކުރައްވައި، އދ. ގެ ޤަރާރުތަކާ އެއްގޮތަށް މިނިވަން އަދި މުސްތަޤިއްލު ފަލަސްޠީނު ދައުލަތެއް ޤާއިމުކުރުމަށް ޕާކިސްތާނުން ފުރިހަމައަށް ތާއީދުކުރާކަން ތަކުރާރުކުރެއްވި އެވެ.

ބޮޑުވަޒީރު ޝަރީފް ވަނީ ކަރާޗީއާއި ގްވާދަރުގެ ބަނދަރުތަކާއި ދިވެހިރާއްޖޭގެ ރަށްތައް ގުޅުވައިދޭ ކަނޑުގެ ސަރަޙައްދުގެ ތާރީޚީ ގުޅުން ހަނދާންކޮށްދެއްވައި، މި ދަތުރުފުޅަކީ ދެ ޤައުމުގެ ގުޅުމަށް ލިބުނު އައު ދިރުމެއް ކަމަށް ވިދާޅުވެފަ އެވެ.