ދައުލަތުގެ އިދާރާތަކުގައި ހުޅުޖަހަން ގޮވާލި މައްސަލައެއް ބަލަނީ

ދައުލަތުގެ ތިން ބާރު އެކުލެވިގެންވާ އިދާރާތެއްގައި ހުޅުޖަހަން ގޮވާލި މައްސަލައެއް ފުލުހުން ބަލަން ފަށައިފި އެވެ.

ރައީސް އޮފީހާއި ރައްޔިތުންގެ މަޖިލީހުގެ އިމާރާތާއި ސުޕްރީމް ކޯޓުގައި ހުޅުޖަހަން ސޯޝަލް މީޑިއާގައި ގޮވާލާފައި ވަނީ އެމްއެންޑީއެފްގެ ކުރީގެ ފަސްޓް ލެފްޓިނަންޓް އަދި މި ސަރުކާރުގެ ކުރީގެ ޑެޕިއުޓީ މިނިސްޓަރު ޒިހާން ހަސަން އެވެ.

ސޯޝަލް މީޑިއާގައި ޒިހާން ކުރި ކޮމެންޓެއްގައި ވަނީ އެ އިދާރާތަކުގައި ހުޅުޖަހަން އަހަރުމެންނަށް ނުލިބެނީ ކީއްވެގެންތޯ ސުވާލު އުފައްދާފަ އެވެ. އެކަން އެގޮތަށް ކޮށްފިއްޔާ "ވަރަށް މަޖާވާނެ" ކަމަށް އޭނާ ބުނެފައިވެ އެވެ.

އޭނާ އެ ކޮމެންޓް ކޮށްފައި ވަނީ އަލްބޭނިއާގެ ސަރުކާރާ ދެކޮޅަށް އެ ގައުމުގައި މިހާރު ހިންގަމުންދާ ހަމަނުޖެހުންތަކުގައި، އެ ގައުމުގެ ސުޕްރީމް ކޯޓުގައި ހުޅުޖެހި މައްސަލައަށް ރިއާޔަތްކޮށެވެ.

މިކަމާ ގުޅިގެން ފުލުހުން މިއަދު ބުނީ، އެ ކޮމެންޓް ލިބިފައިވާތީ، އެކަމާ ގުޅިގެން ބަލަން ޖެހޭ ކަންކަން ބަލަމުންދާ ކަމަށެވެ. 

ނަމަވެސް، އެކަން ސަމާލުކަމަށް އައުމާއެކު، ގަޑިއިރެއް ފަހުން ޒިހާން ވަނީ އެ ޕޯސްޓް ޑިލީޓްކޮށްފަ އެވެ.