އިއުލާނުކޮށްގެން ރިސޯޓް ހަދާ ރަށުގެ ލިސްޓުން 10 ރަށް އުނިކޮށްފި

އާއްމުކޮށް އިއުލާނުކޮށްގެން ރިސޯޓް ހަދާ ރަށުގެ ރިސޯޓް ހަދަން ދޫކޮށްފައިވާ ރަށްތަކުގެ ލިސްޓުން 10 ރަށެއް ޓޫރިޒަމް މިނިސްޓްރީން އުނިކޮށްފި އެވެ.

މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަން އިން ބުނީ ފަތުރުވެރިކަމާބެހޭ ކަންކަމަށް ރަށްރަށާއި، ބިންބިމާއި، ފަޅު ކުއްޔަށް ދޫކުރުމަށްޓަކައި ޕްރޮޕޯސަލް ހުށަހެޅުމާބެހޭ ގަވާއިދު) ގެ 3 ވަނަ މާއްދާގެ ދަށުން، ދޫކުރުމަށް ކަނޑައަޅާފައިވާ ރަށްރަށާއި ފަޅުތަކުގައި ފަތުރުވެރިކަން ތަރައްޤީކުރުމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމަށް ކުރެވުނު ނަންބަރު: (IUL)88-PS/88/2024/37 (30 މޭ 2024) އިޢުލާނަށް އިސްލާހެއް ގެނެސްފައިވާ ކަމަށެވެ. މި އިސްލާހާއެކު 10 ރަށެއް ވަނީ މި ލިސްޓުން އުނިކޮށްފަ އެވެ.

މި ރަށްތައް އުނިކުރި ސަބަބެއް ނުބުނިނަމަވެސް ޓޫރިޒަމް ގާނޫނުން ބާރު ލިބިގެން ރަށެއް އުނިކުރަނީ އެހެން މަޝްރޫއަކަށް ނުވަތަ ކްލޯޒް ބިޑިން އުސޫލުން މި ރަށްތައް ދޫކުރަން ހުޅުވާލުމަށެވެ.

މީގެ އިތުރުން ރިސޯޓް ހަދަން އިއުލާނުކުރާ ރަށުގެ ލިސްޓުން އުނިކުރި އެހެން ރަށްތަކުގެ ތެރޭގައި ނ، އއ، މ، ގ، ލ އަދި ސ އަތޮޅަށް ނިސްބަތްވާ ބައެއް ރަށްތަކާއި ފަޅުތައް ވެސް ހިމެނެ އެވެ.

ރާއްޖޭގައި މިވަގުތު ވެސް 161 ރިސޯޓެއް ނުހެދި އެބައޮތެވެ. މި ރަށްތަކުގެ ތެރޭގައި 20-25 އަހަރުވީ ތަން ތަކެއް ވެސް ހިމެނެ އެވެ. މި ރަށްތަކުން ނުލިބި ހުރި ޓޫރިޒަމް ބިމު ކުލި 500- 600 މިލިޔަން ޑޮލަރާއި ހިސާބަށް އަރަ އެވެ. މި ސަރުކާރުން ދާދިފަހުން ވަނީ ގިނަ ރަށްތަކެއް އިއުލާނުވެސް ކޮށްފަ އެވެ.