ދެ ޕާކިން އިމާރާތް އަންނަ އަހަރު ނިމޭނެ : މިނިސްޓަރު

މާލޭގައި އުޅަނދުތައް ޕާކުކުރާނެ ޖާގަ ނެތުމުގެ މައްސަލައަށް ބޮޑު ލުޔެއް ހޯދައިދިނުމުގެ ގޮތުން ހީނާމާގޭގެ އިތުރުން ސޯސަންމަގުގައި އިމާރާތްކުރާ ޕާކިންގ ފެސިލިޓީތައް އަންނަ އަހަރުގެ ނޮވެމްބަރުގެ ނިޔަލަށް ނިންމައި ބޭނުންކުރަން ފަށާނެކަމަށް ބުނެފި އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި، އިކޮނޮމިކް / ޓްރާންސްޕޯޓް މިނިސްޓަރު މުހައްމަދު ސަޢީދު ވިދާޅުވީ، ހީނާމާގޭގައި ތަރައްޤީކުރާ ޕާކިން އިމާރާތް ކޮންޓްރެކްޓަރަކާ ޙަވާލުކުރުމުގެ އެންމެ ފަހުގެ ކަންކަން މިހާރު ކުރިއަށްދާ ކަމަށެވެ. މީގެ އިތުރުން، ރާއްޖޭގެ ޤައުމީ ޔުނިވާސިޓީއާ ޖެހިގެން ސޯސަންމަގުގައި އޮންނަ ހުސް ބިމުގައި ވެސް ޕާކިން ފެސިލިޓީއެއް ގާއިމުކުރުމަށް ކަނޑައަޅާފައިވާކަން ވަޒީރު ފާހަގަކުރެއްވި އެވެ. ވަރަށް އަވަހަށް މި މަޝްރޫޢުތައް ބަޔަކާ ޙަވާލުކުރެވި، އަންނަ އަހަރުގެ ނޮވެމްބަރުގެ ނިޔަލަށް ދެ އިމާރާތް ވެސް ނިންމާލުމަކީ ސަރުކާރުގެ އަމާޒެވެ.

ޕާކިން މައްސަލައަށް ހައްލު ހޯދުމުގެ އިތުރުން، މާލޭގެ މަގުތަކުގެ ޖާގައިގެ ދަތިކަން ކުޑަކޮށް، ލުއިފަސޭހަ ގޮތްތަކެއް ހޯދައިދިނުމަށްޓަކައި މަގުތަކުގެ ފަރުމާއަށް ގެންނަންޖެހޭ ބަދަލުތައް ގެނައުމުގެ މަސައްކަތްތައް ވެސް ދަނީ ކުރަމުންނެވެ. ވަޒީރު ސަޢީދު ވިދާޅުވި ގޮތުގައި އެންމެ ފުރަތަމަ މަރުޙަލާގައި ހަތަރު މަގެއްގެ ފަރުމާ ބަދަލުކުރުމުގެ ޕްލޭންތައް އެކުލަވާލަމުންދާއިރު، މި މަސައްކަތް ކުރިއަށް ގެންދާނީ ރައްޔިތުންގެ ޚިޔާލާއި ފަންނީ ތަޖުރިބާކާރުންގެ ލަފާގެ މަތިންނެވެ.

ވެރިރަށް މާލޭގެ ޓްރެފިކް ތޮއްޖެހުމުގެ މައްސަލައަށް ހައްލެއް ގެނައުމުގެ ގޮތުން، ބަރު އުޅަނދުތައް ދުއްވުމުގެ ޤަވާއިދުތަކަށް ވެސް ބޮޑެތި ބަދަލުތަކެއް ގެނައުމަށް ވަނީ ނިންމާފައެވެ. ކަމާ ބެހޭ ފަރާތްތަކާ އެކު ކުރިއަށްދާ މަޝްވަރާތަކަށްފަހު، އަންނަ ހަފުތާގައި މި އައު އުސޫލުތައް ގެޒެޓުކުރެވިގެންދާނެ ކަމަށް ވަޒީރު ވިދާޅުވިއެވެ.

މީގެ އިތުރުން އެއްގަމު ދަތުރުފަތުރާ ބެހޭ ޤާނޫނަށް ގެނެވުނު އިސްލާޙުތަކާ އެކު 'ގްރޭޓާ މާލެ މޮބިލިޓީ އޮފީސް'ގެ މަސައްކަތްތައް ހަރުދަނާކޮށް، އެ އޮފީހަށް އިރުޝާދު ދިނުމަށް 'ރޯޑް ސޭފްޓީ ކައުންސިލް' ގެ ނަމުގައި ހާއްސަ ކޮމިޓީއެއް މިހާރު ވަނީ އެކުލަވާލާފަ އެވެ.