ކާނާގެ ޔަގީންކަން ކަށަވަރު ކުރަން 10 ރަށެއްގައި ދަނޑުތަކެއް

ރާއްޖޭގައި އުފައްދާ ކާނާގެ ބާވަތްތައް އިތުރުކޮށް ބޭރުން އެތެރެކުރާ މިންވަރު މަދުކުރަން 10 ރަށެއްގައި އެގްރޯފޮރެސްޓްރީގެ ނަމޫނާ ދަނޑުތަކެއް ގާއިމުކުރުމަށް ސަރުކާރުން އެ ރަށްރަށުގެ ކައުންސިލްތަކާއެކު ސޮއިކޮށްފިއެވެ.

މިކަމަށްޓަކައި ދަނޑުވެރިކަމާ ބެހޭ ވުޒާރާގައި ބޭއްވި ރަސްމިއްޔާތެއްގައި ސަރުކާރުގެ ފަރާތުން މި އެއްބަސްވުންތަކުގައި ސޮއިކުރެއްވީ ސްޓޭޓް މިނިސްޓަރ މުޙައްމަދު ނާއިފްއެވެ. ކައުންސިލްތަކުގެ ފަރާތުން ސޮއިކުރެއްވީ އެ ކައުންސިލްތައް ތަމްސީލުކުރައްވާ މެންބަރުންނެވެ.

އެގްރޯފޮރެސްޓްރީއަކީ އެއް ދަނޑެއްގައި ގަސްގަހާގެއްސާއި އެކި ބާވަތުގެ ދަނޑުގޮވާން އެކީގައި އިންދައިގެން، ތިމާވެއްޓާ ރައްޓެހި ގޮތެއްގައި ކުރާ ދަނޑުވެރިކަމުގެ ނިޒާމެކެވެ. މިއީ ދަނޑުވެރިކަމާ ބެހޭ ވުޒާރާއާއި ތިމާވެއްޓާ ބެހޭ ވުޒާރާ ގުޅިގެން، ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ 5 މިލިއަން ގަސް އިންދުމުގެ ޕްރޮގްރާމްގެ ތެރެއިން ކުރިއަށްގެންދާ މުހިންމު މަޝްރޫޢެކެވެ.

މި ޕްރޮގްރާމުގެ ދަށުން ކޮންމެ ރަށެއްގައި 2 ހެކްޓަރާއި 4 ހެކްޓަރާ ދެމެދުގެ ބޮޑުމިނުގެ ނަމޫނާ ދަނޑުތަކެއް ޤާއިމުކުރެވޭނެއެވެ. މި ދަނޑުތަކުގައި މައިގަނޑު ގޮތެއްގައި ހައްދާނީ ދިގު މުއްދަތަކަށް ހެއްދޭ ގަސްގަހާގެއްސާއި، ކުރު މުއްދަތެއްގައި ހެއްދޭ ކާނާގެ ބާވަތްތަކެވެ.