ފުލުސް ކާރެއްގައި ޖެއްސުމަށްފަހު ފިލި މީހަކު ފަހައި އަތުލައިގެންފި

މަސްތުގެ ހާލަތުގައި ހުރެ، މާލޭގެ މަގުމަތީގައި ބިރުވެރިކަން އުފެދޭގޮތަށް ބާރު ސްޕީޑުގައި ސައިކަލު ދުއްވައި، ފުލުހުންގެ ވެހިކަލެއްގައި ޖެއްސުމަށްފަހު ފިލަން ދުވި މީހަކު، ފުލުހުން ފަހައި އަތުލައިގަނެ ހައްޔަރުކޮށްފި އެވެ.

މި މައްސަލައާ ގުޅިގެން މިއަދު (4 އޮކްޓޫބަރު 2026) ފަތިހު ފުލުހުން ހައްޔަރުކޮށްފައިވަނީ ކ. މާފުށި، ސްނޯސްކައި، އުމުރުން 26 އަހަރުގެ އަޙްމަދު ފާރިޒްއެވެ.

ފުލުހުންނަށް މި ހާދިސާގެ މައުލޫމާތު ލިބިފައިވަނީ ރޭ ފަތިހު 03:52 އެހައިކަންހާއިރުއެވެ. އެގޮތުން، ހެލްމެޓް ނާޅައި، ސައިކަލުމަތީގައި އޮށޯވެގެން ނުރައްކާތެރިކޮށް ހުޅުމާލެއިން މާލެއަށް ހައިވޭގައި އޭނާ ސައިކަލު ދުއްވާފައިދާ ކަމުގެ މައުލޫމާތު ލިބުމާއެކު ފުލުހުން ވަނީ އޭނާ ދެނެގަނެފައެވެ. އަދި މާލޭގެ ޓްރެފިކް ލައިޓް ކައިރިން އޭނާ މަޑުކުރުމަށް ފުލުހުން އެންގުމުން، އެ އެންގުމަށް ތަބާނުވެ ބޮޑުތަކުރުފާނު މަގުން އޭނާ ވަނީ ބާރު ސްޕީޑުގައި ފިލަން މަސައްކަތްކޮށްފައެވެ.

އޭނާ ހުއްޓުވުމަށް ފުލުހުންގެ ވެހިކަލްގައި ފަހަތުން ގޮސް ތަކުރާރުކޮށް މަޑުކުރަން އެންގުމުންވެސް މަޑުނުކޮށް ފިލަން އުޅުމުގެ ތެރޭގައި، ފުލުހުންގެ ކާރުގައި ޖެހި އޭނާ ވަނީ އެކްސިޑެންޓްވެފައެވެ. މި އެކްސިޑެންޓުގައި ފުލުހުންގެ ކާރަށް ގެއްލުންތަކެއް ލިބިފައިވާއިރު، އެކްސިޑެންޓުވުމާއެކު އޭނާ ވަނީ ސައިކަލު ދޫކޮށްލުމަށްފަހު އެ ސަރަހައްދުން ފިލާފައެވެ. ނަމަވެސް، މާލެތެރެ ޕެޓްރޯލްކުރަމުންދިޔަ ފުލުހުން ކުރި މަސައްކަތުން، މޫންލައިޓް ހިނގުމުން އޭނާ ހުއްޓުވައި ވަނީ ފުލުހުންގެ ބެލުމުގެ ދަށަށް ގެނެސްފައެވެ.

މި މައްސަލައިގައި ހައްޔަރުކުރި އަޙްމަދު ފާރިޒަކީ ތަކުރާރުކޮށް އެއްގަމު އުޅަނދު ދުއްވުމުގެ ގާނޫނާއި ގަވާއިދުތަކާ ހިލާފުވުމުގެ ބޮޑު ރެކޯޑެއް އޮތް ފަރާތެކެވެ. އެގޮތުން، ޓްރެފިކް ޖޫރިމަނާގެ ގޮތުގައި އޭނާ ދައުލަތަށް ދައްކަންޖެހޭ 44,000 ރުފިޔާ ނުދައްކައި އޮތްކަން ފާހަގަކޮށްލެވެއެވެ.

އޭނާގެ ޓްރެފިކް ކުށުގެ ރެކޯޑުތަކުގެ ތެރޭގައި:

ލައިސަންސް ނެތި ދުއްވުން

ވަންވޭއާ ހިލާފަށް ދުއްވުން

ބާރު ސްޕީޑުގައި ދުއްވުން

ލޯގަނޑު ނުޖަހައި ދުއްވުން

ލައިސަންސް ހިފަހައްޓާފައި އޮއްވައި ތަކުރާރުކޮށް ދުއްވުން

މަގުމަތީގެ އަމާންކަން ގެއްލޭގޮތަށް ނުރައްކާތެރިކޮށް ދުއްވުން

ސައިކަލުގެ ލައިޓުތައް މޮޑިފައިކޮށްގެން ދުއްވުން ހިމެނެއެވެ.

މި މައްސަލައާ ގުޅިގެން އަޙްމަދު ފާރިޒްގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އޭނާ 7 ދުވަހުގެ މުއްދަތަށް ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ. ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.