މާލެ ސަރަހައްދުގައި 130،000 އަށްވުރެ ގިނަ އުޅަނދު، މަގުތަކުގެ %82 ފުރިފަ

މާލެ ސަރަހައްދުގައި ރަޖިސްޓްރީކޮށްފައިވާ އުޅަނދުތަކުގެ ޖުމްލަ އަދަދު 130،806 އަށް އަރާފައިވާއިރު، މާލޭގެ މަގުތަކުގެ %82 އުޅަނދުތަކުން ތޮއްޖެހި ފުރިފައިކަމަށް މިނިސްޓްރީ އޮފް އިކޮނޮމިކް ޑިވްލޮޕްމަންޓް އެންޑް ޓްރޭޑް، މުޙައްމަދު ސަޢީދު ވިދާޅުވެއްޖެ އެވެ.

ސަރުކާރުން ކުރިއަށްގެން ދާ "އަހާ ފޯރަމް" ގައި ވާހަކަފުޅުދައްކަވަމުން މިނިސްޓަރު ވިދާޅުވީ މާލެ ސަރަހައްދުގައި މިހާތަނަށް ރަޖިސްޓްރީކޮށްފައިވާ އުޅަނދުތަކުގެ ތެރޭގައި 14،911 ކާރާއި 115،895 ސައިކަލު ހިމެނޭ ކަމަށެވެ. މާލެއަކީ އިތުރަށް ޖާގަ ބޮޑުކުރެވެން ނެތް ތަނަކަށްވުމާއެކު، ސަރުކާރުގެ މައިގަނޑު އަމާޒަކީ މާލެއަކީ ވެހިކަލް ރަޖިސްޓްރޭޝަން ކޮންޓްރޯލް ކުރެވިފައިވާ ޒޯނަކަށް ހަދައި، އާންމު ދަތުރުފަތުރުގެ ނިޒާމަށް (މާސް ޓްރާންސްޕޯޓަށް) ބަރޯސާވާ މިންވަރު އިތުރުކުރުންކަމަށް އެ މަނިކުފާނު ފާހަގަކުރެއްވިއެވެ.

މި މައްސަލައަށް ޙައްލެއް ހޯދުމުގެ ގޮތުން، ޓްރެފިކް ބާރުބޮޑުވާ ގަޑިތަކަށް (ރަޝް އަވާރސްއަ ށް) ހާއްސަކޮށްގެން ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހިން މާލެއަށް ދަތުރުކުރާނެ ބަސް ތަކެއް ތަޢާރަފްކުރުމުގެ މަސައްކަތް ސަރުކާރުން ދަނީ ކުރަމުންނެވެ. މީގެ އިތުރުން، ސްކޫލްތަކަށް ދަތުރުކުރާ ދަރިވަރުންނަށް ފަސޭހަވާނެހެން "ސްކޫލް ފްރެންޑްލީ" ބަސްތަކެއް ތަޢާރަފްކުރުމަށްވެސް ވަނީ ރާވާފައެވެ.

މާލޭގެ ޓްރެފިކް މައްސަލަތައް ޙައްލުކުރުމަށް ޚާއްޞަ މިނިވަން އޮފީހެއް ޤާއިމްކޮށް މިހާރު އަމަލީ މަސައްކަތް ފަށާފައިވާއިރު، މާލޭގެ ރިންގް ރޯޑުގެ މަސައްކަތް ނިންމުމާއި، ޓްރެފިކް ލައިޓް ހަރުކުރުމާއި މަގުމަތީގައި ފުލުހުންގެ ހަރަކާތްތެރިކަން އިތުރުކުރުން ފަދަ ގިނަ ފިޔަވަޅުތަކެއް އެޅުމަށް ވަނީ ހަމަޖެހިފައެވެ.

ވަޒީރު ވިދާޅުވިގޮތުގައި، ރޭވުންތެރިކަމާއެކު މިހާރު ފަށާފައިވާ މި މަސައްކަތްތަކާއެކު ކުރިއަށް އޮތް 3 އަހަރުގެ ތެރޭގައި މާލޭގެ ޓްރެފިކް މައްސަލައަށް އާންމުން އެދޭފަދަ އެދެވޭ ޙައްލެއް ލިބިގެންދާނެކަމަށް އުންމީދުކުރައްވައެވެ.