ފުލުހުންގެ ތަރުޖަމާނަކަށް ޝިޔާމް އައްޔަންކޮށްފި

ދިވެހި ފުލުހުންގެ ހިދުމަތުގެ ތަރުޖަމާނުގެ މަގާމަށް އިންސްޕެކްޓާ އޮފް ޕޮލިސް އަހުމަދު ޝިޔާމް މިއަދު އައްޔަންކޮށްފި އެވެ.

ފުލުހުންގެ އިދާރާއިން މީޑިއާތަކަށް ފޮނުވި މެސެޖެއްގައި ބުނެފައިވަނީ، މީގެ ކުރިން ފުލުހުންގެ މީޑިއާ ބައިގައި އިސްކޮށް ހަރަކާތްތެރިވެވަޑައިގެންނެވި ޝިޔާމް މި މަގާމަށް ހަމަޖެއްސެވީ، މީގެ ކުރިން އެ މަސްއޫލިއްޔަތު އަދާކުރެއްވި ސުޕްރިންޓެންޑެންޓް އޮފް ޕޮލިސް އަހުމަދު އާރިފްގެ ބަދަލުގައި ކަމަށެވެ.

"މި ބަދަލާއެކު، ދިވެހި ފުލުހުންގެ ހިދުމަތުގެ ފަރާތުން މީޑިއާތަކަށް މައުލޫމާތު ދެއްވުމާއި، އާންމު ހޭލުންތެރިކަން އިތުރުކުރުމުގެ މުއާމަލާތްތަކުގައި އެންމެ އިސްކޮށް ދެން ހަރަކާތްތެރިވެވަޑައިގަންނަވާނީ އިންސްޕެކްޓާ އޮފް ޕޮލިސް އަހުމަދު ޝިޔާމް،" ފުލުހުންގެ މެސެޖުގައި ބުނެފައިވެ އެވެ.

ޝިޔާމް ފުލުހުންގެ ތަރުޖަމާނަކަށް އައްޔަންކުރައްވާފައި މިވަނީ، މީގެ 12 އަހަރު ކުރިން އޭނާ ފުލުހުންގެ ވަޒީފާއިން ވަކިކުރި މައްސަލަ ޝަރީއަތުން ކާމިޔާބުކުރެއްވުމާ ގުޅިގެން، އަލުން ވަޒީފާ އިޔާދަކޮށްދީފައި ވަނިކޮށެވެ.

ނޯތު ޕޮލިސް ޑިވިޝަންގެ ކޮމާންޑަރަކަށް ހުންނަވަނިކޮށް، މަގާމުގެ ނުފޫޒު ނަހަމަ ގޮތުގައި ބޭނުންކުރި ކަމުގެ ތުހުމަތުގައި މެއި 2014 ގައި ޝިޔާމް ވަޒީފާއިން ވަކިކުރި މައްސަލައިގައި، މީގެކުރިން ސިވިލް ކޯޓުން ނިންމީ އޭނާއަށް އަލުން ވަޒީފާ ދޭން އަމުރު ނުކުރެވޭނެ ކަމަށެވެ. ނަމަވެސް، ހައި ކޯޓުން ވަނީ އެ ހުކުމް ބާތިލުކޮށް، ޝިޔާމަށް އަލުން ވަޒީފާ ދިނުމަށާއި، ވަކިކުރި ދުވަހުން ފެށިގެން ވަޒީފާ އަނބުރާ ދިނުމާ ހަމައަށް ލިބެންޖެހޭ މުސާރައާއި އިނާޔަތްތައް ދިނުމަށް ދައުލަތުގެ މައްޗަށް އަމުރުކޮށްފަ އެވެ.

ހައި ކޯޓުގެ ހުކުމުގައި ބުނެފައިވަނީ، ވަޒީފާއިން ވަކިކުރީ އެކަށީގެންވާ ސަބަބެއް އޮވެގެންކަން ސާބިތުކޮށްދިނުމުގެ ބުރަ އޮތީ ދައުލަތަށް ކަމަށާއި، ނަމަވެސް އެކަން ސާބިތުވާވަރުގެ ހެއްކެއް ދައުލަތަށް ދެއްކިފައި ނުވާ ކަމަށެވެ.

ހައި ކޯޓުގެ ހުކުމާ އެއްގޮތަށް، މިދިޔަ ޖޫން މަހުގެ 3 ވަނަ ދުވަހު ޝިޔާމް އަލުން ވަޒީފާއަށް ނުކުންނަވަން ފައްޓަވާފައިވާއިރު، އޭނާ ވަނީ އެއީ ލިބުނު ބޮޑު ޝަރަފެއް ކަމަށާއި ފުލުހުންގެ ޔުނީފޯމަކީ ހަޔާތުގެ އެންމެ މުހިންމު އެއް ބައި ކަމަށް ވިދާޅުވެފަ އެވެ.