ހޮޑުލެވުމުން، ކާރު ސާފުކުރަން އަގު ނެގީ ދެ ފަރާތުން އެއްބަސްވެގެން: ނަލަ ޓެކްސީ

މާލޭން ހުޅުމާލެއަށް ދަތުރުކުރި ކާރެއްގެ ތެރެއަށް ތުއްތު ކުއްޖަކަށް ހޮޑުލެވުމުން، ކާރު ސާފުކުރުމަށް ޑްރައިވަރު 1,500ރ. އަށް ޑިމާންޑުކުރި ކަމަށް ބުނެ ސޯޝަލް މީޑިއާގައި ދެކެވޭ ވާހަކަތަކަކީ ހަގީގަތާ ހިލާފު ދޮގު ވާހަކަތަކެއް ކަމަށް ނަލަ ޓެކްސީ ސެންޓަރުން ބުނެފި އެވެ.

ތުއްތު ކުއްޖާ ގޮވައިގެން އިއްޔެ ހަވީރު ޓެކްސީގައި ދަތުރުކުރި ކުއްޖާގެ މަންމަ، ހައްވާ މުހައްމަދު ސޯޝަލް މީޑިއާގައި ހިއްސާކުރި ގޮތުގައި، އެކުއްޖާއަށް ޓެކްސީތެރެއަށް ހޮޑުލެވުނީ ހަމަ ކުއްލިއަކަށެވެ.

ހޮޑު ލެވުނު ނަމަވެސް، ގިނައިން ހުރީ ކުއްޖާ ގައިގައްޔާއި މަންމަގެ ގައިގައި ކަމަށާއި، ކާރު ސީޓުގައި ހުރީ ވަރަށް ކުޑަކޮށް ކަމަށް ހައްވާ ބުންޏެވެ. ކާރު ސީޓުގައި ހުރި ހޮޑުކޮޅު އަތުންވެސް ދޮވެލެވޭނެކަން އޭނާ ފާހަގަކުރި އެވެ.

"ކާރު ޑްރައިވަރުގެ ރޫޑުކަމުން ހޮޑު ލެވިއްޖެއޭ ބުނުމުން އިތުރު އެއްޗެއް ނުބުނެ 1500ރ. ދޭން ޖެހޭނެއޭ ބުނީ. ވަރަށް އަގުބޮޑު ވާނެޔޯ ކާރު ސީޓު ދޮންނަން، އެހެން ބުނީ ދެން،" ހައްވާ ބުންޏެވެ.

އެކަމާ ގުޅިގެން، ނަލަ ޓެކްސީން ނެރުނު ނޫސް ބަޔާނެއްގައި ބުނެފައިވަނީ، މި ހާދިސާ ހިނގާފައިވަނީ ފަތިހު 2 އާއި 7 އާ ދެމެދުގެ ވަގުތެއްގައި އެ ސެންޓަރުގެ އެޕްލިކޭޝަން މެދުވެރިކޮށް ނެގި ކާރެއްގައި ކަމަށެވެ. ދަތުރުގެ މަގުމަތީގައި ކުއްޖާއަށް ކާރު ތެރެއަށް ހޮޑުލެވި، ކާރުގެ ސީޓަށާއި އެހެނިހެން ތަންތަނަށް ވަސް ނުފިލާ ވަރަށް ފޯވެފައިވާ ކަމަށް ބަޔާނުގައިވެ އެވެ.

އެ ސެންޓަރުން ފާހަގަކުރި ގޮތުގައި، ކާރު ސާފުކުރުމުގެ ކަންތައްތައް ކުރިއަށްގެންގޮސްފައިވަނީ ކުއްޖާގެ މައިންބަފައިންނާއި ޑްރައިވަރާ ދެމެދު ވާހަކަ ދެކެވި، ދެފަރާތުގެ އެއްބަސްވުމުގެ މަތިންނެވެ. އަދި ކާރުގެ ސީޓުތަކާއި އެހެނިހެން ބައިތައް ސާފުކުރުމަށް ދިޔަ ހަރަދު ކުއްޖާގެ މައިންބަފައިން ދައްކައި، އެ މައްސަލަ ދެފަރާތުގެ މެދުގައި ވާހަކަ ދެކެވިގެން ހައްލުކޮށްފައިވާ ކަމަށްވެސް ބުނެފައިވެ އެވެ.

ނަލަ ޓެކްސީން ވަނީ ހަގީގަތް ބެލުމެއްނެތި، ސެންޓަރާއި ޑްރައިވަރުގެ އަބުރު ގެއްލޭ ގޮތަށް މީޑިއާތަކާއި ސޯޝަލް މީޑިއާގައި ދޮގު ހަބަރު ފަތުރަމުންދާތީ އެކަމާ ހިތާމަކުރާ ކަމަށް ބުނެފަ އެވެ.