ޕެންޝަން އޮފީހުގެ ތްރީ ޖެނެރޭޝަން ވޯކް ހޮނިހިރު ދުވަހު ހަނިމާދޫގައި

ޕެންޝަން އޮފީހުން ސިލްސިލާކޮށް ބާއްވަމުންދާ "ތްރީ ޖެނެރޭޝަން ވޯކް" (3ޖެންވޯކް) ގެ ހަތަރުވަނަ އެޑިޝަން އަންނަ ހޮނިހިރު ދުވަހު ހދ. ހަނިމާދޫގައި ބާއްވަން ނިންމައިފި އެވެ.

ޕެންޝަން އޮފީހުން ބުނީ މިއީ ކުޑަކުދިންނާއި ބޮޑެތިމީހުން އަދި ދޮށީއުމުރުގެ މީހުން ހިމެނޭހެން، މުޅި އާއިލާއަށް ހާއްސަކޮށްގެން ބާއްވާ ހިނގާލުމެއް ކަމަށެވެ.

މި ހަރަކާތަކީ ދުޅަހެޔޮކަމާއި މާލީ ރައްކާތެރިކަން އިތުރުކުރުމާއެކު، ފަހަށް ފައިސާ ރައްކާކުރުމާއި، އިންވެސްޓްކުރުން އަދި ރިޓަޔަމަންޓަށް ތައްޔާރުވުމުގެ މުހިންމުކަމާމެދު އާއިލާގެ ހުރިހާ މެންބަރުންގެ މެދުގައި ހޭލުންތެރިކަން އުފައްދައި، ރަނގަޅު މާލީ އާދަތަކަށް ބާރުއެޅުމުގެ ގޮތުން އަހަރަކު އެއްފަހަރު ޕެންޝަން އޮފީހުން ކުރިއަށްގެންދާ ސިލްސިލާ ހަރަކާތެކެވެ.

3ޖެން ވޯކް - މި ހިނގާލުމުގެ އެންމެ ހާއްސަ އަދި މުހިންމު އެއް ބަޔަކީ، އެއްއާއިލާގެ ތިން ޖީލުގެ މެންބަރުން އެކުއެކީގައި ކުރިއަށްގެންދާ އެއް ކިލޯމީޓަރުގެ ރަމްޒީ ހިނގާލުމެވެ. މި ހިނގާލުމަކީ ހަމައެކަނި ހަށިހެޔޮކަމަށްޓަކައި ކުރިއަށްގެންދެވޭ ކަމެއް ނޫނެވެ. މިއީ މާލީ ގޮތުން ރައްކާތެރި، ތަނަވަސް މުސްތަޤުބަލެއް ބިނާކުރުމަކީ ދިރިއުޅުމުގެ ވަކި މަރުޙަލާއަކަށް އެކަނި ހާއްސަވެފައިވާ ކަމެއް ނޫންކަމާއި، އަދި އެއީ ޅައުމުރުން ފެށިގެން ދޮށީއުމުރާ ހަމައަށް މުޅި އުމުރުދުވަހަށް ދެމިގެންދާ ދަތުރެއްކަން ރަމްޒުކޮށްދޭ މުހިންމު ހަރަކާތެކެވެ. 

ޕެންޝަން އޮފީހުން ބުނީ ހިނގާލުމަށްފަހު ހުރިހާ އުމުރުފުރާއެއްގެ ބައިވެރިންނަށް ވެސް ބައިވެރިވެވޭނެ ފަދަ އުފާވެރި އަދި ފޯރިގަދަ ޢާއިލީ ހަވީރެއް ކުރިއަށްދާނެ ކަމަށެވެ. މި ހަވީރުގެ ތެރޭގައި ކުޑަކުދިންނާއި ބޮޑެތިމީހުން ޝައުގުވެރިވާނެ ފަދަ ތަފާތު ކުޅިވަރުތަކާއި، ދިވެހިންގެ ސަގާފަތާއި އާދަކާދަ ދައްކުވައިދޭ ޚާއްޞަ ހަރަކާތްތައް ހިމެނެ އެވެ. 

މީގެ އިތުރުން، އާންމުންނަށް މުހިންމު މަޢުލޫމާތުތައް ފޯރުކޮށްދިނުމަށް ގާއިމުކުރެވިފައިވާ ސްޓޯލްތަކާއި، ތަފާތު އެކި ރަހަތައް ހިމެނޭ ފުޑް ކޯޓުގެ އިތުރުން، މުޅި އާއިލާއަށް އެކުގައި ހިތްހަމަޖެހުމާއި އުފާވެރިކަން ގެނެސްދޭނެ އެތައް ހަރަކާތްތަކެއް މި ހަވީރުގައި ހިމެނޭނެ އެވެ.

"3ޖެން ވޯކް" ގެ މައިގަނޑު މަގުސަދަކީ އާއިލާގެ ތެރޭގައި އެކި ޖީލުތަކުގެ މެދުގައި އޮންނަ ގުޅުންތައް އިތުރަށް ބަދަހިކޮށް، އުފާވެރި މާހައުލެއްގައި އާއިލާތަކަށް އެކުގައި އަގުހުރި ވަގުތުތަކެއް ހޭދަކުރުމުގެ ފުރުސަތު ތަނަވަސްކޮށްދިނުމެވެ. އަދި ދިރިއުޅުމުގެ ކުރިމަގަށް ވިސްނައި، ރިޓަޔަމަންޓަށް ފުރިހަމައަށް ތައްޔާރުވުމާއި، ފަހަށް ރައްކާކުރުމުގެ މުހިންމު އާދަ އަށަގެންނެވުމަށްޓަކައި ޕެންޝަން އޮފީހުން މެދުކެނޑުމެއްނެތި ކުރިއަށްގެންދާ މަސައްކަތްތަކުގެ ތެރެއިންވެސް މި ހަރަކާތް ހިމެނެ އެވެ.