ކޯރާ ކޯރާ މޯލްޑިވްސް ރިސޯޓުގެ ޖީއެމްގެ މަގާމަށް މުއިއްޒު

ކޯރާ ކޯރާ މޯލްޑިވްސްގެ ޖެނެރަލް މެނޭޖަރު (ޖީއެމް) ގެ މަގާމަށް މުއިއްޒު މުހައްމަދު އައްޔަންކޮށްފި އެވެ. 

ޓޫރިޒަމް ހަބަރު ގެނެސްދޭ ޓީޓީއެމްގައިވާ ގޮތުން މުއިއްޒު ވަނީ ވޭތުވެދިޔަ 6 އަހަރު ދުވަހު ކޯރާ ކޯރާ މޯލްޑިވްސްގައި އިސް މަގާމުތަކެއް ފުރުއްވާފަ އެވެ. އެ ރިސޯޓާ އެންމެ ފުރަތަމަ ގުޅިވަޑައިގަތީ ރިސޯޓު ހުޅުވުމުގެ ކުރިން ޑިރެކްޓަރ އޮފް ހިއުމަން ރިސޯސަސްގެ މަގާމަށެވެ. އެއަށްފަހު އޭނާ ވަނީ ޑިރެކްޓަރ އޮފް އޮޕަރޭޝަންސްގެ މަގާމާއި ރިސޯޓް މެނޭޖަރުގެ މަގާމުވެސް ފުރުއްވާފަ އެވެ.

މުއިއްޒަކީ މުވައްޒަފުންނާއި ފަތުރުވެރިންނާ ގާތް ގުޅުމެއް ބާއްވަވާ އެންމެންނާވެސް ގުޅޭ އޯގާތެރި މިޒާޖެއްގެ ބޭފުޅެއްގެ ގޮތުގައި ފާހަގަކުރެވިފައިވާ ބޭފުޅެކެވެ. 

ރިސޯޓުގެ 250 އަށްވުރެ ގިނަ މުވައްޒަފުންގެ އިތުބާރާއި އިހުތިރާމް ހޯއްދަވާފައިވާ މުއިއްޒު ވަނީ، ދިވެހި ހުނަރުވެރިންނަށް ފުރުސަތުތައް ފަހިކޮށްދިނުމަށާއި ރިސޯޓުގެ އޮޕަރޭޝަންސްތައް ހަރުދަނާކޮށް މެހެމާނުންނަށް ދެވޭ ޚިދުމަތުގެ ފެންވަރު ރަނގަޅުކުރުމަށް ގިނަ މަސައްކަތްތަކެއް ކުރައްވާފަ އެވެ. މީގެ އިތުރުން ރ. އަތޮޅުގެ ރަށްރަށާއި ރިސޯޓާ ދެމެދު އޮންނަ ގުޅުން ބަދަހިކުރެއްވުމުގަ އިވެސް އޭނާ ވަނީ އިސް ދައުރެއް އަދާކުރައްވާފައެވެ.

ޓޫރިޒަމް ދާއިރާގައި 15 އަހަރަށްވުރެ ގިނަ ދުވަހުގެ ތަޖުރިބާ ހޯއްދަވާފައިވާ މުއިއްޒު ވަނީ ކޯރާ ކޯރާގެ ކުރިން ރާއްޖޭގެ ފަސް ތަރީގެ އެހެން ރިސޯޓުތަކުގައި ވެސް މަސައްކަތްކުރައްވާފަ އެވެ. އަދި އޭގެ ކުރިން ބޭންކިންގ އަދި ފައިނޭންސް ދާއިރާގައި 3 އަހަރު ދުވަހު މަސައްކަތްކުރައްވާފައިވެއެވެ. އޭނާ ވަނީ ކޯނެލް ޔުނިވަރސިޓީން ހޮޓެލް މެނޭޖްމަންޓް، އޯނާ ރިލޭޝަންސް އަދި އެސެޓް މެނޭޖްމަންޓުގެ ދާއިރާއިން ތައުލީމް ހާސިލް ކުރައްވާފަ އެވެ.