ތުއްތު ކުއްޖަކަށް ޓެކްސީތެރެއަށް ހޮޑުލެވުމުން 1000ރ. ނަގައިފި

ހުޅުމާލޭން މާލެއަށް ކުރި ދަތުރެއްގައި، އުމުރުން އެއް އަހަރުގެ ކުއްޖަކަށް ޓެކްސީ ތެރެއަށް ހޮޑުލެވުމުން 1000ރ. ޗާޖުކޮށްފި އެވެ.

ތުއްތު ކުއްޖާ ގޮވައިގެން އިއްޔެ ހަވީރު ޓެކްސީގައި ދަތުރުކުރި ކުއްޖާގެ މަންމަ، ހައްވާ މުހައްމަދު ސޯޝަލް މީޑިއާގައި ހިއްސާކުރި ގޮތުގައި، އެކުއްޖާއަށް ޓެކްސީތެރެއަށް ހޮޑުލެވުނީ ހަމަ ކުއްލިއަކަށެވެ.

ހޮޑު ލެވުނު ނަމަވެސް، ގިނައިން ހުރީ ކުއްޖާ ގައިގައްޔާއި މަންމަގެ ގައިގައި ކަމަށާއި، ކާރު ސީޓުގައި ހުރީ ވަރަށް ކުޑަކޮށް ކަމަށް ހައްވާ ބުންޏެވެ. ކާރު ސީޓުގައި ހުރި ހޮޑުކޮޅު އަތުންވެސް ދޮވެލެވޭނެކަން އޭނާ ފާހަގަކުރި އެވެ.

"ކާރު ޑްރައިވަރުގެ ރޫޑުކަމުން ހޮޑު ލެވިއްޖެއޭ ބުނުމުން އިތުރު އެއްޗެއް ނުބުނެ 1500ރ. ދޭން ޖެހޭނެއޭ ބުނީ. ވަރަށް އަގުބޮޑު ވާނެޔޯ ކާރު ސީޓު ދޮންނަން، އެހެން ބުނީ ދެން،" ހައްވާ ބުންޏެވެ.

ހައްވާ ބުނި ގޮތުގައި، ހޮޑުލެވިފައި ހުރިތަން ބަލައިނުލިތާ، ޑްރައިވަރުގެ ފަރާތުން އެއްވެސް އެހީތެރިކަމެއް ވެސް ފޯރުކޮށްދީފައި ނުވާ ކަމަށެވެ. ޓިޝޫއެއްވެސް ދިއްކޮށްލާފައި ނުވާ ކަމަށެވެ. 

ސީޓު ކައިރީ ކޮތަޅުވެސް ހުންނާނެ ކަމަށް ޑްރައިވަރު ބުނިއިރު، އެއް އަހަރުގެ ކުއްޖަކު ހޮޑު ލަވައިގަތުމުން ބުނާނީ ކިހިނެއްތޯ އޭނާ ވަނީ ސުވާލުކޮށްފަ އެވެ.

އެންމެ ފަހުން 1000ރ. ރުފިޔާ ދިނުމަށް ޑްރައިވަރު ޑިމާންޑް ކުރުމުން، އެ ފައިސާ ފޮނުވާފައިވާނެ ކަމަށް ހައްވާ ބުންޏެވެ.

އެ ޓެކްސީއަކީ ނަލަ ޓެކްސީން ނެގި ޓެކްސީއެއް ކަމުން އެމީހުންނަށް ގުޅައި ހައްވާ ވަނޫ އެކަން ހިއްސާކޮށްފަ އެވެ. ނަމަވެސް އެމީހުން ފަހުން ހަބަރެއް ނުވާ ކަމަށް ބުނެފައިވެ އެވެ.