އެޗްއާރްސީއެމްގެ މެމްބަރު ކަމަށް ޝަމްއޫން އައްޔަނުކޮށްފި

ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ މެމްބަރު ކަމަށް، އެ ކޮމިޝަންގެ އިސް މަގާމުތައް ކުރިން ވެސް ފުރުއްވާފައިވާ ހ. މީނާޒް، ޝަމްއޫން ހަމީދު އައްޔަނު ކޮށްފި އެވެ.

ރައީސް އޮފީހުގައި މިއަދު ބޭއްވި ރަސްމިއްޔާތެއްގައި، ޝަމްއޫނަށް މަގާމުގެ ފަތްކޮޅު އަރުއްވާފައި ވަނީ ރައީސް ޑރ. މުހައްމަދު މުއިއްޒެވެ. މި ރަސްމިއްޔާތުގައި އޭނާއަށް މެމްބަރު ކަމުގެ ހުވައި ލައިދެއްވީ ސުޕްރީމް ކޯޓުގެ ފަނޑިޔާރު ޑރ. މުހައްމަދު އިބްރާހީމެވެ.

ޝަމްއޫނު ވަނީ 2010 އިން 2012 އަށް އެޗްއާރްސީއެމްގެ އިންވެސްޓިގޭޝަން ޑިޕާޓްމަންޓުގެ ޑިރެކްޓަރުގެ މަގާމާއި، 2012 އިން 2016 އަށް އެ ކޮމިޝަނުގެ ސެކްރެޓަރީ ޖެނެރަލްގެ މަގާމު އަދާކުރައްވާފަ އެވެ. އަދި ޔުނިވާސަލް ޕީރިއަޑިކް ރިވިއު (ޔޫޕީއާރް) ރިޕޯޓު ކުރުމުގައި ކޮމިޝަނުގެ ފޯކަލް ޕޮއިންޓެއްގެ ގޮތުގައި މަސައްކަތް ކުރައްވާފައިވެ އެވެ.

އޭގެ އިތުރުން، ނުކުޅެދުންތެރިކަން ހުންނަ ކުދިންނަށް ތައުލީމު ހާސިލުކުރުމަށް ހުރި ފުރުސަތުތަކާއި ކުޑަކުދިންގެ ހައްގުތައް ރައްކާތެރިކުރުމާ ގުޅޭގޮތުން ކުރިއަށްގެންދިޔަ ގައުމީ ފެންވަރުގެ ދިރާސާތަކުގައި ޝަމްއޫން ވަނީ މުހިންމު ދައުރެއް އަދާކުރައްވާފަ އެވެ. 

ޝަމްއޫން އެންމެ ފަހުން ހުންނެވީ ހެރިޓޭޖް މިނިސްޓްރީގެ ޕާމެނެންޓް ސެކްރެޓަރީގެ މަގާމުގަ އެވެ.