ޑެސްޓިނޭޝަން ޕްރިންސިޕަލް ތައާރަފުކުރި ގާނޫނަށް އިސްލާހުތަކެއް

ރާއްޖޭގެ ޓޫރިޒަމް ހިދުމަތްތައް ބޭރުގައި ވިއްކާއިރު، ނަގަން ނިންމާފައިވާ ޑެސްޓިނޭޝަން ޕްރިންސިޕަލް އުސޫލުގެ ޓެކުހުގެ ގާނޫނަށް އިސްލާހު ގެންނަން ސަރުކާރުން ނިންމައިފި އެވެ. 

ޓޫރިސްޓުންނަށް ރާއްޖެއިން ބުކިން ހަދައިދޭ ބުކިން ޕްލެޓްފޯމްތަކާއި ޓުއާ އޮޕަރޭޓަރުންނާއި ޓްރެވެެލް އެެޖެންޓުންގެ އަތުން ޓީޖީއެސްޓީ ތައާރަފުކޮށްފައިވަނީ މިމަހުގެ އެއްވަނަ ދުވަހުން ފެށިގެންނެވެ. ނަމަވެސް މި ބަދަލާމެދު ބައެއް ޓުއާ އޮޕަރޭޓަރުން ވަނީ ކަންބޮޑުވުން ފާޅުކޮށްފަ އެވެ.  

ގައުމީ ޓޫރިޒަމް ދުވަސް ފާހަގަ ކުރަން ބާސެލާސް ނަސަންދުރަ ހޮޓެލްގައި މިރޭ ބޭއްވި ހަފުލާގައި ޓޫރިޒަމް މިނިސްޓަރު މުޙައްމަދު އަމީން ވިދާޅުވި ގޮތުގައި އިސްލާހުތަކެއް ގެންނަން ނިންމާފައިވާ ކަމަށެވެ. 

"ރައީސުލްޖުމްހޫރިއްޔާ ނިންމަވާފައިވަނީ ޑެސްޓިނޭޝަން ޕްރިންސިޕަލްގެ އުސޫލުން ޓީޖީއެސްޓީ ގާނޫނަށް ވަރަށް އަވަހަށް ބަދަލު ތަކެއް ގެންނަން،" އޭނާ ވިދާޅުވި އެވެ.

ޓެކްސް ނެގޭނީ ކޮން ރޭޓަކުން ؟ - މި ޓެކުހަކީ ބޭރުގެ ވިޔަފާރިތަކުން ޖީއެސްޓީ ދައްކަންޖެހޭނީ ފަތުރުވެރިކަމުގެ ސިނާޢަތަށް ކަނޑައެޅިފައިވާ 17% ގެ ރޭޓުގަ އެވެ. ރާއްޖޭގައި ދާއިމީ އޮފީހެއް ނެތް ނަމަވެސް، އެ ފަރާތްތަކުން ފޯރުކޮށްދޭ އެކޮމޮޑޭޝަނާއި، ކެއުމާއި، ދަތުރުފަތުރު ފަދަ އިންބައުންޑް ޓޫރިޒަމް ޕްރޮޑަކްޓްތައް ބެލެވޭނީ ރާއްޖޭގައި ދޭ ޚިދުމަތެއްގެ ގޮތުގަ އެވެ.

މީރާ އިން ވަނީ މި ވިޔަފާރިތައް ރަޖިސްޓްރީވުމަށާއި ބަޔާން ހުށަހެޅުމަށާއި، އޮންލައިންކޮށް ފައިސާ ދެއްކޭނެ ނިޒާމު ހަމަޖައްސާފައެވެ. އަދި މަޢުލޫމާތު ސާފުކުރުމަށް ޚާއްސަ އީމެއިލްއަކާއި ވަޓްސްއެޕް ނަންބަރެއް ވަނީ އާންމުކޮށްފަ އެވެ. މި އިސްލާހުގެ ސަބަބުން ދައުލަތުގެ އާމްދަނީއަށް އަހަރަކު ގާތްގަނޑަކަށް 1.6 ބިލިއަން ރުފިޔާ އިތުރުވާނެކަމަށް އަންދާޒާކުރެވެ އެވެ. މިހާރު ޓެކްސް ދައްކަމުންދާ ފަރާތްތަކުން އަމަލުކުރަންޖެހޭ އުސޫލުތަކަށާއި ޓެކްސް ރޭޓަކަށް މި ބަދަލާއެކު އެއްވެސް ބަދަލެއް ނާންނާނެ އެވެ.