ފްލައި ދުބާއީގެ ބޯޓު ހައިޖެކް ކުރަން އުޅުނު މައްސަލައިގައި ދެ ދިވެހިން ހައްޔަރު ކޮށްފި

ދުބާއީން ފުރައިގެން އިޒްރޭލަށް ދަތުރުކުރި ފްލައި ދުބާއީގެ ފްލައިޓެއް ހައިޖެކްކޮށް، ޓެރަރިސްޓް ހަމަލާއެއް ދޭން އުޅުނު މައްސަލައިގައި ޔޫނައިޓެޑް އަރަބް އެމިރޭޓްސް (ޔޫއޭއީ) އިން ދެ ދިވެހިން ހައްޔަރުކޮށްފި އެވެ.

އެނގިފައިވާ ގޮތުގައި، މި މައްސަލައިގައި ރޭ ހައްޔަރުކޮށްފައިވާ ދެ ދިވެހިންނަކީ ފްލައިޓް ހައިޖެކް ކުރަން އުޅުނު ކޯ-ޕައިލެޓް ހައްމާމް އަލް ހަމާނީއާ ގުޅުން އޮންނަ ބައެކެވެ. 

އެ ދެ މީހުންނަކީ ވެސް ކޯ-ޕައިލެޓުންގެ ގޮތުގައި ފްލައި ދުބާއީ އެއާލައިންގައި މަސައްކަތް ކުރާ ދެމީހުންނެވެ. އެ ދެ ދިވެހިން އެ އެއާލައިންއާ ގުޅުނީ ވަރަށް ފަހުން ކަމަށް މައުލޫމާތު ލިބެ އެވެ.

ނަމަވެސް އެމީހުން ހައްޔަރުކޮށްފައި ވަނީ ކޮން ތުހުމަތަކާ ގުޅިގެންކަން ސާފެއް ނުވެ އެވެ.

ބުދަ ދުވަހު ހިނގި މި ހާދިސާގައި، 174 ފަސިންޖަރުންނާއެކު ދަތުރުކުރި ފްލައިޓް ނަންބަރު FZ1073 ގެ ކޮކްޕިޓް ތެރޭގައި ކޯ-ޕައިލެޓް ވަނީ މަރުތޭލަކުން ޕައިލެޓަށް ހަމަލާދީފަ އެވެ. އެ ހާދިސާ ހިނގުމާއެކު ބޯޓު ވަނީ ތިރިވާން ފަށައިފަ އެވެ. ނަމަވެސް ބޯޓުގައި ތިބި ފަސިންޖަރުންނާއި، ކްރޫން އަދި އޮފް-ޑިއުޓީގައި ތިބި އެހެން ޕައިލެޓުންތަކެއް ވަނީ ކޮކްޕިޓަށް ވަދެ، ހަމަލާދިން ކޯ-ޕައިލެޓް ހިފަހައްޓައި، ބޯޓުގެ ކޮންޓްރޯލް އަނބުރާ ހޯދާފަ އެވެ.

ބޯޓު ހައިޖެކް ކުރަން އުޅޭކަމުގެ ސިގްނަލް (7500) ދިނުމަށްފަހު، ސައުދީގެ ޕްރިންސް ސުލްތާން ބިން އަބްދުލްއަޒީޒް އިންޓަނޭޝަނަލް އެއާޕޯޓަށް ވަނީ ސަލާމަތްތެރިކަމާއެކު ޖައްސާފަ އެވެ.

މި ފްލައިޓުގައި ގިނައިން ތިބީ އިސްރާއީލުގެ ރައްޔިތުންނެވެ. ހާދިސާއާ ގުޅިގެން، ފަސިންޖަރުން އަނބުރާ ގެންދިއުމަށް އިސްރާއީލުގެ އަސްކަރީ މަތިންދާބޯޓުތަކެއް ފޮނުވުމުގެ ހުއްދައަށް އިސްރާއީލުން ސައުދީ އަރަބިއްޔާގައި އެދުނެވެ. ނަމަވެސް، ސައުދީ އާއި އިސްރާއީލާ ދެމެދު ރަސްމީ ޑިޕްލޮމެޓިކް ގުޅުމެއް ގާއިމުކޮށްފައި ނުވާތީ، ސައުދީން ވަނީ އެ ހުއްދަ ދިނުމަށް އިންކާރުކޮށްފަ އެވެ.

އިސްރާއީލުގެ ބޯޓުތަކަށް ހުއްދަ ނުދިނުމުން، ފަސިންޖަރުންގެ ދަތުރު ކުރިއަށް ގެންދިއުމަށްޓަކައި ފްލައި ދުބާއީގެ އެހެން މަތިންދާބޯޓެއް ވަނީ ތަބޫކް އެއާޕޯޓަށް ފޮނުވާފަ އެވެ. އަދި ބުދަ ދުވަހުގެ ހަވީރުގެ ވަގުތެއްގައި ފަސިންޖަރުން ވަނީ އެ ބޯޓުގައި އިސްރާއީލަށް ދިއުމަށް ފުރާފަ އެވެ.