ނުރައްކާތެރިކޮށް ދުއްވާ މީހުންނަށް ޖިނާއީ ތަހުގީގު ހިންގައި، ހަރުކަށި ފިޔަވަޅު އަޅަނީ

އާންމު ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް މަގުމަތީގައި ނުރައްކާތެރިކޮށް އުޅަނދު ދުއްވާ މީހުންގެ މައްޗަށް ޖިނާއީ ތަހުގީގު ހިންގައި، ހަރުކަށި ފިޔަވަޅު އަޅަން ނިންމާފައިވާ ކަމަށް ފުލުހުން ބުނެފި އެވެ. 

ފުލުހުން މިއަދު ބުނީ ރައްކާތެރިކޮށް އުޅަނދު ދުއްވާ ފަރާތްތައް ދެނެގަނެ، އެ ފަރާތްތަކުގެ މައުލޫމާތު ޕްރޮފައިލްކުރުމުގެ މަސައްކަތް މިހާރު ކުރަމުންދާ ކަމަށެވެ. މިފަދަ ފަރާތްތައް ހާޒިރުކޮށް ނަސޭހަތްތެރިވުމަށްފަހު، މި އަމަލުތައް ތަކުރާރުކުރާ ފަރާތްތަކާމެދު، ޓްރެފިކް ގާނޫނާއި ގަވާއިދުތަކުގެ ދަށުން ކުރިން ކުރަމުން އައި ޖޫރިމަނާގެ އިތުރުން، އިތުރު އިންޒާރަކާ ނުލައި ޖިނާއީ ތަހުގީގު ހިންގާނެ ކަމަށް ފުލުހުން ބުންޏެވެ.

އެގޮތުން ހާއްސަ ސަމާލުކަމެއް ދީގެން ވަކި ގޮތަކަށް ދުއްވާ ފަރާތްތަކަށް ފިޔަވަޅު އެޅުމަށް ވަނީ ހަމަޖެހިފަ އެވެ. އެއީ؛

ފުލުހުން ބުނީ މި މަސައްކަތުގެ ދަށުން، ނުރައްކާތެރިކޮށް ދުއްވާ އުޅަނދުތައް ހޯދައި، އުޅަނދު ދުއްވި ފަރާތުގެ އިތުރުން އުޅަނދުގެ ވެރިފަރާތަށް ވެސް ފިޔަވަޅު އަޅާނެ ކަމަށެވެ. އަދި އުޅަނދުތައް 30 ދުވަހުގެ މުއްދަތަށް ފުލުހުންގެ ބެލުމުގެ ދަށަށް ގެނެސް، ކަނޑައެޅިފައިވާ މުއްދަތުގެ ތެރޭގައި ވެރިފަރާތުން ހަވާލުނުވާ އުޅަނދުތައް، އޮންނަ އުސޫލުގެ ދަށުން ނައްތާލާނެ ކަމަށެވެ.

މިފަދަ އަމަލުތަކުގައި ސަރުކާރުގެ މުއައްސަސާތަކާއި ކުންފުނިތަކުގެ މުވައްޒަފުން ޝާމިލުވާކަން ވެސް ފާހަގަކުރެއްވިފައި ވާތީ، އެ ފަރާތްތަކާމެދު އެޅެންހުރި އިދާރީ ފިޔަވަޅުތައް އެޅުމަށް އެ މުއައްސަސާތަކަށް މި މައުލޫމަތު ހިއްސާކުރަމުންދާ ކަމަށްވެސް ފުލުހުން ބުންޏެވެ.

މީގެއިތުރުން، ނުރައްކާތެރިކޮށް އުޅަނދު ދުއްވާ ފަރާތްތަކުގެ ތެރެއިން އެ އަމަލު ތަކުރާރުކުރާ ފަރާތްތަކުގެ ވަނަވަރު އާންމުކޮށް، މިފަދަ ކަންކަމާ ގުޅިގެން އާންމުން ހިއްސާކުރާ ފޮޓޯއާއި ވީޑިއޯ ފަދަ މައުލޫމާތުގެ ސައްހަކަން ކަށަވަރުކުރުމަށްފަހު، ގާނޫނީ ގޮތުން އަޅަންޖެހޭ ފިޔަވަޅުތައް އަޅަމުން ގެންދާނެކަމަށް ވެސް ފުލުހުން ބުނެފައިވެ އެވެ.