މުދަލު ޒަކާތް | މިއަހަރުގެ މިހާތަނަށް 109 މިލިއަން ރުފިޔާ ލިބިއްޖެ

މި އަހަރުގެ މިހައިތަނަށް މުދަލު ޒަކާތުގެ ގޮތުގައި ބަލައިގަތް އަދަދު، މިދިޔަ އަހަރުގެ ޖުމްލަ އަދަދަށްވުރެ އިތުރުވެފައިވާ ކަމަށް ޒަކާތު ހައުސްއިން ބުނެފި އެވެ. 

ޒަކާތު ހައުސްއިން ބުނީ މިއަހަރުގެ ފުރަތަމަ ދުވަހުން ފެށިގެން މިދިޔަ ސެޕްޓެމްބަރު މަހުގެ ނިޔަލަށް މުދަލު ޒަކާތުގެ ގޮތުގައި 109.26 މިލިއަން ރުފިޔާ ލިބިފައިވާ ކަމަށެވެ. އެއީ 108.7 މިލިއަން ރުފިޔާ އާއި 34,021.41 ޔޫއެސް ޑޮލަރެވެ.

މިއީ މިދިޔަ އަހަރު އެއްކޮށް ލިބުނު 106,45 މިލިއަން ރުފިޔާއަށް ވުރެ 2.8 މިލިއަން ރުފިޔާ އިތުރު އަދަދެކެވެ. ޒަކާތު ހައުސްއިން ބުނީ އެއީ މިދިޔަ އަހަރު ބަލައިގަތް ޖުމްލަ އަދަދާ އަޅާބަލާ އިރު ގާތްގަނޑަކަށް 2.64 ޕަސެންޓްގެ ކުރިއެރުމެއް ކަމަށެވެ.

ޒަކާތު ހައުސްއިން ބުނީ މިދިޔަ އަހަރުގެ ޖުމްލަ އަދަދު ފަހަނައަޅައިގޮސްފައި ވަނީ މި އަހަރު ނިމެން އަދި ތިން މަސްދުވަސް ބާކީ އޮއްވައި ކަމަށެވެ. އެހެންކަމުން އޮކްޓޯބަރު މަހުން ފެށިގެން ޑިސެންބަރު މަހުގެ ނިޔަލަށް ލިބޭ ފައިސާއާއެކު މި އަދަދު އިތުރުވެގެންދާނެ ކަން އެ އިދާރާއިން ފާހަގަކުރެ އެވެ.