އަންނަ އަހަރު ހުޅުވާ "ކޯކޯ ޑި މެއާ މޯލްޑިވްސް" ޖީއެމްއަކަށް އަނީސް

އަންނަ އަހަރުގެ ދެވަނަ ކުއާޓަރުގައި ހުޅުވުމަށް ހަމަޖެހިފައިވާ "ކޯކޯ ޑި މެއާ މޯލްޑިވްސް، ޓެޕެސްޓްރީ ކަލެކްޝަން ބައި ހިލްޓަން" ގެ ޖެނެރަލް މެނޭޖަރެއްގެ މަގާމަށް އަހުމަދު އަނީސް އައްޔަންކޮށްފި އެވެ. މިއީ 75 ކޮޓަރީގެ ޖާގައިގެ ރިސޯޓެކެވެ.

ހޮޓެލިއާ މޯލްޑިވްސް އިން ބުނީ ހޮސްޕިޓަލިޓީ ދާއިރާގައި 21 އަހަރުގެ ދިގު ތަޖުރިބާ ހޯއްދަވާފައިވާ އަނީސްއަކީ، އޭނާގެ މުޅި ކެރިއަރު ރާއްޖޭގައި ހިންގާ ހިލްޓަން ބްރޭންޑްގެ އެކި ރިސޯޓުތަކުގައި ހޭދަކުރައްވާފައިވާ ބޭފުޅެކެވެ.

އޭނާ ވަނީ ރާއްޖޭގެ ފާހަގަކޮށްލެވޭ އެކި ރިސޯޓުތަކުގައި އިސް މަޤާމުތަކެއް ފުރުއްވާފައެވެ. އޭގެ ތެރޭގައި ކޮންރަޑް މޯލްޑިވްސް ރަންގަލި އައިލެންޑް، ވޯލްޑޯފް އެސްޓޯރިއާ މޯލްޑިވްސް އިތާފުށި، އަދި ހިލްޓަން މޯލްޑިވްސް އަމިންގިރި ރިސޯޓް އެންޑް ސްޕާ ހިމެނެއެވެ. އަމިންގިރީގައި އޭނާ އެންމެ ފަހުން އަދާކުރައްވާފައިވަނީ ޑިރެކްޓަރ އޮފް އޮޕަރޭޝަންސް އަދި އެކްޓިންގ ހޮޓެލް މެނޭޖަރުގެ މަޤާމެވެ.

ރިސޯޓުތައް ހުޅުވުމުގެ ކުރިން ކުރަންޖެހޭ މަސައްކަތްތަކާއި (ޕްރީ-އޯޕަނިން) ރިސޯޓުތަކަށް ގެންނަ ބަދަލުތަކުގެ އިތުރުން ގިނަ ޑިޕާޓްމަންޓްތަކެއް ހިންގުމުގައި އަނީސް ވަނީ މޮޅު ހުނަރުތަކެއް ދައްކަވާފައެވެ. މީގެ އިތުރުން 2021 ވަނަ އަހަރު ވޯލްޑޯފް އެސްޓޯރިއާ މޯލްޑިވްސްގެ 'ލީޑާ އޮފް ދަ އިޔާ' ގެ މަޤާމު އޭނާ ހާސިލުކުރެއްވިއެވެ. އަދި އޭނާ ވަނީ މޯލްޑިވްސް ހައުސްކީޕަރސް އެސޯސިއޭޝަންގެ ރައީސްކަމުގެ ދައުރުވެސް ދާދި ފަހުން ފުރިހަމަކުރައްވާފައެވެ.

ހިލްޓަންގެ ދިވެހިރާއްޖޭގެ ޕޯޓްފޯލިއޯއާ އަލަށް ގުޅުނު ކޯކޯ ޑި މެއާ މޯލްޑިވްސްއިން ފަތުރުވެރިންނަށް ދިވެހިވަންތަ، އަދި ޚާއްސަ ތަޖުރިބާތަކެއް ލިބިގެންދާނެއެވެ. މި ރިސޯޓުން، އަމިއްލަވަންތަ (އިންޑިޕެންޑެންޓް) ރިސޯޓެއްގެ ސިފަތަކާއެކު ހިލްޓަން ބްރޭންޑްގެ ފެންވަރާއި، އިތުބާރާއި އަދި ޚިދުމަތްތައް ފެނިގެންދާނެއެވެ.