އިގްތިސާދީ މިސްރާބެއް ނެތް މި ސަރުކާރު ބަދަލުކޮށް، ގައުމު އަނދަވަޅުން ސަލާމަތްކުރާނަން: ނަޝީދު

މިހާރު އޮތް ސަރުކާރުގެ މާލީ އަދި އިގްތިސާދީ ސިޔާސަތުތަކުގައި އެއްވެސް މިސްރާބެއް ނެތުމުގެ ސަބަބުން ގައުމު އަނދަވަޅަކަށް ވެއްޓެމުންދާ ކަމަށާއި، ރައީސް ޑރ. މުހައްމަދު މުއިއްޒުގެ ސަރުކާރު ބަދަލުކޮށް ދިވެހީންނަށް ހެޔޮވެރިކަމެއް ހޯދައިދެއްވާނެ ކަމަށް އިދިކޮޅު އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

އެމްޑީޕީގެ 5 ވަނަ ކޮންގްރެސް އިފްތިތާހުކުރުމަށް ރޭ ބޭއްވި ޖަލްސާގައި ވާހަކަ ދައްކަވަމުން ނަޝީދު ވަނީ ސަރުކާރުން އެކުލަވާލަމުންދާ އިގްތިސާދީ ސިޔާސަތުތަކަށާއި ގާނޫނުތަކަށް ގެންނަމުންދާ ބަދަލުތަކަށް ވަރަށް ބޮޑަށް ފާޑުވިދާޅުވެފަ އެވެ.

އެގޮތުން، ރިސޯޓުތަކުން ޑޮލަރު މާރުކުރުވުމާއި، ޖީއެސްޓީ ދެއްކުމަށް ބޭރުގެ ޓުއާ އޮޕަރޭޓަރުން ރަޖިސްޓްރީކުރަން އެންގުން ފަދަ ގަވާއިދުތަކަށް ދުވަހުން ދުވަހަށް ބަދަލު އަންނަމުންދާކަން ފާހަގަކުރައްވައި ނަޝީދު ވިދާޅުވީ، މިއީ އެއްވެސް މީޒާނެއް ނެތި "ބަތްކައްކާ ކުޅޭ" އުސޫލުން ގެންގުޅޭ، ތަންފީޒު ނުކުރެވޭނެ ފެއިލްވެފައިވާ ސިޔާސަތުތަކެއް ކަމަށެވެ. 

އަދި ސަރުކާރުގެ އަމާޒަކީ ދޮގުހެދުމާއި އޮޅުވާލުން ކަމަށާއި، ދަރަނި އަދާކުރުމުގެ އެއްވެސް ވިސްނުމެއް ސަރުކާރުގައި ނެތް ކަމަށް ވެސް ތުހުމަތު ކުރެއްވި އެވެ.

"އަޅުގަނޑުމެން ރައީސް ޑރ. މުހައްމަދު މުއިއްޒު ބަދަލުކުރާނަން. މި ދިވެހިރާއްޖޭގެ ރައްޔިތުންނަށް އަޅުގަނޑުމެން ހެޔޮ ވެރިކަމެއް ހޯދައިދޭނަން،" ނަޝީދު ވިދާޅުވި އެވެ.

ސަރުކާރުގެ ހާރިޖީ ސިޔާސަތަށް އަލިއަޅުއްވާލައްވަމުން، ބޭރުގެ ސަފީރުން ވެސް ބައިވެރިވެވަޑައިގެންނެވި މި ރަސްމިއްޔާތުގައި ނަޝީދު ވިދާޅުވީ ރާއްޖޭގެ ރައްކާތެރިކަން ގުޅިފައިވަނީ އަވަށްޓެރި ގައުމުތަކާ ކަމަށެވެ. އަދި ހާރިޖީ ތަރުތީބުގައި އިންޑިއާއަށް އިސްކަންދިނުމަކީ ގައުމު ނިކަމެތިކޮށްލުން ނޫން ކަމަށާއި، ރާއްޖެ އުފެދިފައި އޮތްގޮތުން އެކުވެރި އަވަށްޓެރިންނާ ގުޅުން ބަދަހިކުރުމަކީ މުހިންމު ކަމެއް ކަމަށް ވިދާޅުވި އެވެ.

މީގެ އިތުރުން، އެމްޑީޕީގެ ފުރަތަމަ ސަރުކާރުން ފެށިގެން އެ ޕާޓީން ގައުމަށް ގެނެސްދިން ތަރައްގީގެ ކަންކަން ނަޝީދު ފާހަގަކުރެއްވި އެވެ. އޭގެ ތެރޭގައި ދައުލަތުގެ އާމްދަނީ 7 ބިލިއަނުން 40 ބިލިއަން ރުފިޔާއަށް އިތުރުކުރުމާއި، ޕެންޝަނާއި، ޔަތީމުކުދިންގެ އިނާޔަތް އަދި އާސަންދަ ތައާރަފްކުރުމާއި، މިނިމަމް ވޭޖް ކަނޑައެޅުމާއި، ހިލޭ ޑިގްރީއަށް ކިޔެވޭނެ މަގުފަހިކުރުމާއި، ރައްޔިތުން ރަށުބަންދުން ސަލާމަތްކުރުމަށް ދަތުރުފަތުރުގެ ނިޒާމު ގުޅުވާލުމާއި، ކޮވިޑް-19 އިން ގައުމު ސަލާމަތްކުރުން ނަޝީދު ފާހަގަކުރެއްވި އެވެ.

އަންނަ ހޮނިހިރު ދުވަހުގެ ނިޔަލަށް ކުރިއަށްދާ މި ކޮންގްރެސްގައި އެމްޑީޕީގެ އަސާސީ ގަވާއިދަށް އިސްލާހުތަކެއް ހުށަހެޅުމުގެ އިތުރުން ކައުންސިލްތަކަށް ހާއްސަ އިންވެސްޓްމަންޓް ފޯރަމެއް ބޭއްވުމަށް ވަނީ ހަމަޖެހިފަ އެވެ. 

އަދި ޕާޓީގެ އިސްލާހީ ހަރަކާތް "ބޮޑު ބަދަލު" ގެ ދަށުން، ކުރިއަށްއޮތް އެމްޑީޕީގެ ރިޔާސީ ޕްރައިމަރީގައި ކުރީގެ ޗެއާޕާސަން ފައްޔާޒު އިސްމާއީލަށް ތާއިދުކުރައްވާނެކަންވެސް ނަޝީދު ވަނީ ހާމަކުރައްވާފަ އެވެ.