ސޯލިހު ގޮވައިލެއްވީ، ރަސްމާލޭގެ "ސިއްރު" އެއްބަސްވުމަށް އެމްޑީޕީގެ ސަރުކަރެއްގައި ޖާގަ ނުދޭން

ސިއްރު ކަންތައްތަކެއްގެ ތެރެއިން އުފަންކުރާ އެއްވެސް އެއްބަސްވުމަކަށް އާނއެކޭ ބުނެގެން ނުވާނެ ކަމަށާއި، އެމްޑީޕީގެ ކުރިއަށް އޮތް ސަރުކާރެއްގައި ވެސް އެފަދަ އެއްބަސްވުމަކަށް އަމަލުކޮށްގެން ނުވާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.

އެމްޑީޕީ ކޮންގްރެސް ފެށުމަށް މިރޭ ބޭއްވި ޖަލްސާގައި ވާހަކަފުޅު ދައްކަވަމުން ސޯލިހު ވަނީ، ދުބާއީގެ އީގަލް ހިލްސް ކުންފުންޏާއެކު ރަސްމާލެ ތަރައްގީކުރުމަށް ވެވިފައިވާ އެއްބަސްވުމަށް ވަރަށް ބޮޑަށް ފާޑުވިދާޅުވެފަ އެވެ.

އެމަނިކުފާނު ފާހަގަކުރެއްވި ގޮތުގައި، ރަސްމާލެ ތަރައްގީކުރުމަށް ފުށިދިއްގަރުފަޅު ހިއްކަނީ ރައްޔިތުންގެ ފައިސާއިން ގާތްގަނޑަކަށް 700 މިލިއަން ޑޮލަރު ހަރަދުކޮށްގެންނެވެ. ނަމަވެސް، އޭގެ ތެރެއިން 500 ހެކްޓަރުގެ ބިން ހިލޭ ބޭރު ބަޔަކަށް ދިނުމަކީ ބޮޑެތި ސުވާލުތަކެއް އުފެދޭ ކަމެއް ކަމަށް ވިދާޅުވި އެވެ.

"ސުވާލަކީ ރައްޔިތުންނަށް މީގެން ވަނީ ކޮން ފައިދާއެއްތޯ؟ ސަރުކާރަށް މީގެން ލިބެނީ ކޮން އެއްޗެއްތޯ؟" ސޯލިހު އުފެއްދެވި އެވެ.

އެމްޑީޕީއަކީ ފޮރިން އިންވެސްޓްމަންޓްތަކާ ނުވަތަ އުސޫލުތަކުގެ ތެރެއިން ރެސިޑެންސް ވިސާ ދިނުމާ ދެކޮޅު ޕާޓީއެއް ނޫންކަން ފާހަގަކުރައްވަމުން، ސޯލިހު ވިދާޅުވީ މައްސަލައަކީ ރަސްމާލެ މަޝްރޫއުގެ ތެރޭގައި ނޭނގޭ މުއާމަލާތްތަކެއް ހިނގަމުން ދިއުން ކަމަށެވެ. 

އަދި މަޝްރޫއުގެ މައުލޫމާތުތައް ހާމަނުކުރާ ނަމަ، އެ އެއްބަސްވުން އުވާލުމަށް ސަރުކާރަށާއި އީގަލް ހިލްސްއަށް ގޮވާލުމަށް ކޮންގްރެސްއަށް އެ މަނިކުފާނު އިލްތިމާސްކުރެއްވި އެވެ.

"ސިއްރުން ހިނގާ އެއްވެސް ކަމަކަށް އަޅުގަނޑުމެން އާނއެކޭ ބުނެގެން ނުވާނެ. އަދި އެފަދަ މަސައްކަތެއް އަޅުގަނޑުމެންގެ ސަރުކާރެއްގައި ކުރިއަށް ގެންދަން ޖާގަ ވެސް ދީގެން ނުވާނެ،" އެ މަނިކުފާނު ވިދާޅުވި އެވެ.

ރަސްމާލެ މަޝްރޫއަށް އެމްޑީޕީން ދެކޮޅު ހަދާތީ، ނިމިދިޔަ ސަރުކާރުގައި ވ. ފޮއްތެޔޮފަޅު ކުއްޔަށް ދިން ގޮތާ މެދު ސަރުކާރުގެ ބޭފުޅުން ކުރައްވާ ތުހުމަތުތަކަށް ވެސް ސޯލިހު ވަނީ ރައްދު ދެއްވައިފަ އެވެ. އެ މަނިކުފާނު ވިދާޅުވީ އެ ފަޅު ކުއްޔަށް ދޫކޮށްގެން ދައުލަތަށް 43 މިލިއަން ޑޮލަރު ވަދެފައިވާނެ ކަމަށާއި، އެ ކުންފުނީގެ ހަރަދުގައި ބިން ހިއްކައިގެން ވ. އަތޮޅުގައި ޑޮމެސްޓިކް އެއާޕޯޓެއް އެޅުމުގެ މަސައްކަތް ކުރިއަށްދާ ކަމަށެވެ.

ކޮންމެ މަޝްރޫއެއް ކުރިއަށް ގެންދިޔަސް ބަލަންޖެހޭނީ ގައުމަށާއި ރައްޔިތުންނަށް ލިބޭނެ ފައިދާއަށް ކަމަށް އިބޫ ވިދާޅުވި އެވެ. އެގޮތުން ނ. އަތޮޅުގައި އެއާޕޯޓެއް އަޅަން ފަޅެއް ދޫކުރި ނަމަވެސް، މި ސަރުކާރުން އެ މަޝްރޫއު އެސްއީޒެޑްގެ ތެރެއަށް ވައްދައި، ޓެކްސް އިނާޔަތްތައް ދީގެން ދައުލަތަށް ލިބެން އޮތް ބޮޑު އާމްދަނީއެއް އުނިކޮށްލާފައިވާ ކަމަށް ވެސް ފާހަގަކުރެއްވި އެވެ.

ރަސްމާލެ މަޝްރޫއުގެ އެއްބަސްވުން ހާމަކުރުމަށް ކުރީގެ ރައީސް މުހައްމަދު ނަޝީދު ވެސް ގޮވާލައްވާފައިވާއިރު، ކުރީގެ ރައީސް އަބްދުﷲ ޔާމީން ވަނީ ކުރިއަށް އޮތް ސަރުކާރެއްގައި އެ އެއްބަސްވުން ބާތިލުކުރަންޖެހޭނެ ކަމަށް ވިދާޅުވެފަ އެވެ.