އޭޓީއެމް އިން ދެން ނެގޭނީ މަހަކު 3500 ޑޮލަރު

ބީއެމްއެލް އިން ކޮންމެ މަހަކު ޑޮލަރު ނެގޭ އަދަދު 3500 ޑޮލަރަށް ލިމިޓު ކޮށްފި އެވެ.

ބީއެމްއެލް އިން ބުނީ ރާއްޖޭގައި ޒަމާނީ، "ޑިޖިޓަލް-ފަސްޓް ބޭންކިން" ހިދުމަތް ފުޅާކުރުމަށް ކުރަމުންދާ މަސައްކަތުގެ ދަށުން މިއަދުން ފެށީގެން އޭޓީއެމް މެދުވެރިކޮށް ކަސްޓަމަރަކަށް މަހެއްގެ މައްޗަށް ނަގުދު ފައިސާ އިން ޑޮލަރު ނެގޭ އަދަދު 3500 ޑޮލަރު ކަމުގައި ހަމަޖައްސާފައިވާ ކަމަށެވެ. 

މިއީ އޭޓީއެމް އިން ނެގޭ ޑޮލަރުގެ އަދަދު ލިމިޓު ކުރި ފުރަތަމަ ފަހަރެވެ. 

ބީއެމްއެލް އިން ބުނީ މަހަކު ނެގޭ އަދަދު ލިމިޓު ކުރި ނަމަވެސް ކާޑުން ދުވާލަކަށް ނެގޭ 1600 ޑޮލަރުގެ ލިމިޓަށް އެއްވެސް ބަދަލެއް ނާންނަ ކަމަށެވެ.

ބީއެމްއެލް އިން ބުނި ގޮތުގައި އެ ނިންމުމަކީ ނަގުދު ފައިސާއަށް ބަރޯސާވާ މިންވަރު ކުޑަކޮށް، އަވަސް އަދި ރައްކާތެރި އަދި ލުއިފަސޭހަ ޑިޖިޓަލް މާލީ ނިޒާމެއް ކުރިއެރުވުމަށް ބީއެމްއެލް އިން ގެންގުޅޭ ދުރުރާސްތާގެ ސިޔާސަތުގެ ދަށުން ނިންމާފައިވާ ނިންމުމެކެވެ.

ނަގުދު ފައިސާ ބޭނުންކުރަން ނުޖެހި، ދުވަހުން ދުވަހަށް ބޭނުންވާ ބޭންކިން ހިދުމަތްތައް ފަސޭހަކަމާއެކު ހޯދޭނެ ޑިޖިޓަލް ވަސީލަތްތައް ގާއިމުކުރުމަށްޓަކައި ބޭންކުން މުހިންމު ބޮޑެތި އިންވެސްޓްމަންޓްތަކެއް ކޮށްފައިވާ ކަމަށް ބީއެމްއެލް އިން ބުންޏެވެ. 

އެގޮތުން ބީއެމްއެލް މޮބައިލް ބޭންކިން އަދި އިންޓަނެޓް ބޭންކިން މެދުވެރިކޮށް، ކޮންމެ ވަގުތަކު، ކޮންމެ ތަނެއްގައި ހުރެގެންވެސް ބިލްތަކަށް ފައިސާ ދެއްކުމާއި، ފައިސާ ޓްރާންސްފަ ކުރުމުގެ އިތުރުން އެކައުންޓްގެ އެންމެހައި މުއާމަލާތްތައް ފަސޭހަކަމާއެކު ބަލަހައްޓައި މެނޭޖްކުރެވޭނެ ކަމަށް ބީއެމްއެލް އިން ބުންޏެވެ. 

މީގެ އިތުރުން ރާއްޖެ އާއި ރާއްޖެއިން ބޭރުގެ ވިޔަފާރިތަކަށް ކާޑު މެދުވެރިކޮށް އަދި ކޮންޓެކްޓްލެސްކޮށް ފައިސާ ދެއްކުމާއި، އެކައުންޓްތަކަށް ވަގުތުން ވަގުތަށް ފައިސާ ފޮނުވުމުގެ ހިދުމަތް ވެސް ކަސްޓަމަރުންނަށް ފަސޭހަކަމާއެކު ލިބޭނެ ކަމަށް ބީއެމްއެލް އިން ބުންޏެވެ.