ގެސްޓް އިންފޮމޭޝަން ސިސްޓަމަކީ ޓެކްސްގެ ނިޒާމަށް ލިބުނު ކުރިއެރުމެއް

މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން މިއަދު ތައާރަފުކުރި މޯލްޑިވްސް ގެސްޓް އިންފޮމޭޝަން ސިސްޓަމް (އެމްޖީއައިއެސް) އަކީ ރާއްޖެއަށް އަންނަ ފަތުރުވެރިންގެ މައުލޫމާތު އެއް ވިއުގައަކުން ލިބި، ދައުލަތުގެ މާލީ އިދާރާތަކާ ގުޅުވައިދޭ ވަރަށް މުހިންމު ވަސީލަތެއްކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެ އެވެ.

ވަޒީރު މިހެން ވިދާޅުވީ މީރާއިން މި ސިސްޓަމް ތައާރަފުކުރުމަށް ބޭއްވި ރަސްމިއްޔާތު ޝަރަފްވެރިކޮށްދެއްވައި ވާހަކަފުޅު ދައްކަވަމުންނެވެ. އެމްޖީއައިއެސް އަކީ ރާއްޖެއަށް ޒިޔާރަތްކުރާ ފަތުރުވެރިންގެ މަޢުލޫމާތު އެއްވިއުގައަކުން ގުޅާލާ، ދައުލަތުގެ މާލީ އިދާރާތަކާ ސީދާ ގުޅުވައިދޭ މަރުކަޒީ ނިޒާމެކެވެ.

ފަތުރުވެރިކަމަކީ ރާއްޖޭގެ އިގްތިސާދުގެ މައި ސިނާއަތަށް ވުމާއެކު، މި ދާއިރާގެ މަޢުލޫމާތަކީ ސަރުކާރާއި ދައުލަތުގެ ގިނަ އިދާރާތަކަކުން ބޭނުންކުރާ މައުލޫމާތެކެވެ. އަދި މިސިސްޓަމްގެ ސަބަބުން މި މައުލޫމާތުތައް ބަލަހައްޓާ ދައުލަތުގެ ކަމާބެހޭ މުއައްސަސާތަކުން ކުރާ މަސައްކަތްތަކަށް ބޮޑު ލުޔެއް ލިބިގެންދާނެ ކަމަށް ވަޒީރު ފާހަގަކުރެއްވި އެވެ.

މީރާގެ ޑިޖިޓަލް ޓްރާންސްފޯމޭޝަން ރޯޑްމެޕްގައި ހިމެނޭ ރިޕޯޓިން އޮޓޮމޭޓްކުރުމުގެ ލަނޑުދަނޑި ހާސިލުކުރުމަށް އެމްޖީއައިއެސް އަކީ ލިބުނު ބޮޑު ކުރިއެރުމެއްކަން ފާހަގަކުރައްވައި ވަޒީރު ވިދާޅުވީ، މި ސިސްޓަމްގެ ސަބަބުން މީރާގެ މަސައްކަތްތަކަށް ވެސް ކުރިއެރުންތައް އަންނަތަން ފެނިގެންދާނެ ކަމަށެވެ. 

އަދި މީރާއަކީ އެފޯޓްލެސް ޓެކްސް ނިޒާމެއް ގާއިމުކުރުމަށް މަސައްކަތްކުރާ މުއައްސަސާއެއްގެ ގޮތުގައި ދެމިއޮތުމަށް އިލްތިމާސްކުރައްވައި ވިދާޅުވީ ޑިޖިޓަލައިޒޭޝަންގެ މަސައްކަތުގައި މީރާ ވާންވާނީ އެންމެ ކުރީގައި އޮންނަ މުއައްސަސާކަމުގަ އެވެ.

މި ސިސްޓަމްގެ ސަބަބުން ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކަށް ބޮޑެތި ފައިދާތަކެއް ކުރާނެ ކަމަށް ވަޒީރު ވިދާޅުވި އެވެ. ހާއްސަކޮށް އަމިއްލަ ޕްރޮޕަޓީ މެނޭޖްމަންޓް ސިސްޓަމްއެއް ނެތް ގެސްޓްހައުސްތަކާއި ވިޔަފާރިތަކަށް، ފަތުރުވެރިންގެ މައުލޫމާތު ބެލެހެއްޓުމަށް މި ފުރިހަމަ ޕްލެޓްފޯމަކީ ބޮޑު އެހީއަކަށް ވާނެކަން ފާހަގަކުރެއްވި އެވެ.