ލަންކާއިން އެންޓި ޓެރެރިޒަމް ބިލެއް ހަދައި ހިޔާލު ފާޅު ކުރުން ހަނިކުރަނީ

އިންޓަނެޓް މީޑިއާ އެކްޝަން (އައިއެމްއޭ) އިން ވަނީ ސަރުކާރުން ހުށަހަޅާފައިވާ ޕްރޮޓެކްޝަން އޮފް ދަ ސްޓޭޓް ފްރޮމް ޓެރަރިޒަމް ބިލް (ޕީއެސްޓީއޭ) އަށް ވަރަށް ބޮޑަށް ފާޑުކިޔައި، އެ ބިލުގެ ބައެއް މާއްދާތަކުގެ ސަބަބުން ލަންކާގައި ޚިޔާލު ފާޅުކުރުމުގެ މިނިވަންކަމާއި މީޑިއާގެ މިނިވަންކަމުގެ އިތުރުން ޑިޖިޓަލް ހައްގުތަކަށް ވަރަށް ބޮޑަށް ހުރަސްއެޅިދާނެ ކަމުގެ އިންޒާރު ދީފައެވެ.   

ސްރީލަންކާގެ އިންޓަނެޓް މީޑިއާ އެކްޝަން (އައިއެމްއޭ) މިއަދު ނެރުނު ބަޔާނެއްގައި އައިއެމްއޭ އިން ވަނީ 22 ސެޕްޓެމްބަރު 2026 ގައި ގެޒެޓްކުރި މި ބިލާ މެދު ކަންބޮޑުވުން ފާޅުކޮށްފައެވެ. އެ ޖަމިއްޔާ އިން ބުނެފައިވަނީ މި ބިލުގެ މާއްދާތަކުގެ ސަބަބުން ޓެރަރިޒަމާ ދެކޮޅު ހަރުކަށި ފިޔަވަޅުތައް އޮންލައިން ޖާގަތަކަށް ފުޅާކޮށް، "ޑިޖިޓަލް ޑިކްޓޭޓާޝިޕް" އަކަށް މަގު ފަހިވެދާނެ ކަމަށެވެ.   

އެ ޖަމިއްޔާއިން ފާހަގަކުރި ގޮތުގައި މުއާސަލާތީ ގުޅުންތައް ހުއްޓުވުމާއި ޑިކްރިޕްޓްކުރުމާ ގުޅޭ 55 ވަނަ މާއްދާ ފަދަ އަސްލު ޑްރާފްޓްގެ ބައެއް މާއްދާތައް ގައުމީ އަދި ބައިނަލްއަގުވާމީ ޕްރެޝަރާ ގުޅިގެން އިސްލާހުކޮށްފައިވެ އެވެ. ނަމަވެސް މި ބަދަލުތަކުން ވެސް އެ ޖަމިއްޔާގެ އަސާސީ ކަންބޮޑުވުންތަކަށް ހައްލެއް ލިބިފައިނުވާ ކަމަށް ވަނީ ބުނެފައެވެ.

އައިއެމްއޭ އިން އިންޒާރު ދީފައިވާ ގޮތުގައި ބައެއް މާއްދާތަކުގެ ސަބަބުން ސޯޝަލް މީޑިއާ ބޭނުންކުރާ ފަރާތްތަކާއި ނޫސްވެރިންނާއި އެކްޓިވިސްޓުން އަދި ކޮންޓެންޓް އުފައްދާ ފަރާތްތަކާ ދެކޮޅަށް ގާނޫނީ ފިޔަވަޅު އެޅުމުގެ ފުރުސަތު ހުޅުވިގެންދާނެއެވެ.