އުކުޅަސް ކައުންސިލްގެ 2024 ގެ އޮޑިޓް | ތިޖޫރީން ފައިސާ މަދު

އަރިއަތޮޅު އުތުރުބުރީ އުކުޅަހު ކައުންސިލްގެ އިދާރާގެ 2024 ވަނަ އަހަރުގެ އޮޑިޓުން އެ ކައުންސިލްގެ ތިޖޫރީން ފައިސާ މަދުކަން ހާމަވެއްޖެ އެވެ. 

އޮޑިޓަ ޖެނެރަލް ނެރުއްވި އޮޑިޓުގައިވާ ގޮތުން ތިޖޫރީގެ ފައިސާ ބެލެހެއްޓުމުގެ މައްސަލަ ވަނީ ފެންމަތިވެފަ އެވެ. ތިޖޫރީގައި ހުރި ފައިސާގެ އަދަދާއި ލިޔެކިޔުންތަކުން ދައްކާ އަދަދު ދިމާނުވުމާއި، 8,925 ރުފިޔާ މަދުކަން ވަނީ ފާހަގަކުރެވިފަ އެވެ. އަދި ގަވާއިދުން ބޭންކަށް ފައިސާ ޖަމާކުރުމުގެ ބަދަލުގައި، މުވައްޒަފެއްގެ މޭޒު ވަތްގަނޑުގައި ފައިސާ ބަހައްޓާފައި ހުރިކަންވެސް އޮޑިޓަށް ފާހަގަވެފައިވާ ކަމަށް ބަޔާންކޮށްފައިވެ އެވެ.

އޮޑިޓަ ޖެނެރަލް ވަނީ ލިބޭ ފައިސާ ވީއެންމެ އަވަހަކަށް ބޭންކަށް ޖަމާކުރުމަށާއި ފައިސާ ޖަމާކުރަން ދަތިވާނަމަ ގަވާއިދާ އެއްގޮތަށް މާލީ ޒިންމާދާރުވެރިޔާގެ ހުއްދަ ލިޔުމުން ހޯދުމަށް ކައުންސިލަށް އަންގާފަ އެވެ.

ބީލަމަކާ ނުލައި މަސައްކަތް ހަވާލުކުރުން - އުކުޅަހު ކައުންސިލުން އާންމުކޮށް އިއުލާނު ކުރުމަކާ ނުލައި، ބީލަމުގެ މަރުހަލާގެ ބޭރުން 245,000 ރުފިޔާގެ ފުޓުބޯޅަ ދަނޑުގެ މަރާމާތު ކުރުމުގެ މަސައްކަތް އަމިއްލަ ޖަމިއްޔާއަކާ ހަވާލުކޮށްފައިވެ އެވެ. މީގެ އިތުރުން ގަބުރުސްތާނު ފާރު ރޭނުމަށް ބޭނުންވާ ތަކެތި ހޯދުމުގައި، އިއުލާނު ކުރުމުގެ ބަދަލުގައި ބިލްތައް ބައިބަޔަށް ބަހާލައިގެން 78,862 ރުފިޔާގެ މަސައްކަތް ހަވާލުކޮށްފައިވެ އެވެ.

ބިމު ކުލި ނުހޯދުން - ތެލުގެ ވިޔަފާރިކުރުމަށް 2016، 2017 އަދި 2022 ވަނަ އަހަރު ދޫކޮށްފައިވާ ބިންތަކަކުން ކުލީގެ ގޮތުގައި ލިބެންޖެހޭ 1,034,573 މިލިއަން ރުފިޔާ ނުލިބި ހުރިކަން ފާހަގަކޮށްފައިވެ އެވެ. އަދި ލޮނުމަސް އެޅުމަށް ދޫކުރި ބިމެއްގެ އެއްބަސްވުމުގެ މުއްދަތު ހަމަވުމަށްފަހު ވެސް ކުއްޔާއި ޖޫރިމަނާގެ ގޮތުގައި ލިބެންޖެހޭ 56,875 ރުފިޔާ ނުހޯދައި އަދި ބިންވެސް އަތުލާފައެއް ނުވެ އެވެ. މި މައްސަލަ ފެންމަތިވުމާ ގުޅިގެން 35,000 ރުފިޔާއަށްވުރެ ބޮޑެތި ހަރަދުތައް އާންމުކޮށް އިއުލާނުކޮށްގެން ބީލަމުގެ ތެރެއިން ކުރިއަށް ގެންދިއުމަށާއި، ބީލަމުގެ ވާދަވެރިކަން ގެއްލޭގޮތަށް ކަންކަން ވަކިނުކުރުމަށް އޮޑިޓަ ޖެނެރަލް ވަނީ ލަފާ ދެއްވާފަ އެވެ. 

އިއުލާނު ކުރުމަކާ ނުލައި ބިން ދޫކުރުން - އެއް އަހަރަށްވުރެ ދިގު މުއްދަތަކަށް ބިން ދޫކުރެވޭނީ އާންމުކޮށް އިއުލާނުކޮށްގެން ކަމަށް ގަވާއިދުގައި އޮތް ނަމަވެސް، އިއުލާނު ކުރުމަކާ ނުލައި ބިންތަކެއް ދޫކޮށްފައިވެ އެވެ.

އިޖުތިމާއީ ޒިންމާ ފުރިހަމަނުކުރުން - ކުލީގެ އެއްބަސްވުންތަކުގައި އިޖުތިމާއީ ޒިންމާގެ ގޮތުގައި ކުރަން ބަޔާންކޮށްފައިވާ 488,800 ރުފިޔާގެ މަސައްކަތްތަކެއް އެ ފަރާތްތަކުން ނުކޮށް ހުރިކަން ފާހަގަކުރެވިފައިވެ އެވެ.