ފްލައި ދުބާއީ ބޯޓުގައި ތިބި މީހުން ގެންނަން އިސްރާއިލް އަސްކަރީ ބޯޓަށް ހުއްދައެއް ނުދިން

ފްލައި ދުބާއީގެ ފްލައިޓުގެ ދެ ޕައިލެޓުންގެ މެދުގައި ހަމަނުޖެހުން ހިނގުމުން އިމަޖެންސީގައި ސައޫދީ އަރަބިއްޔާއަށް ޖެއްސި ބޯޓުގައި ތިބި އިސްރާއިލް މީހުން ގެންނަން އެ ގައުމުގެ އަސްކަރީ ބޯޓު ސައޫދީގައި ޖައްސަން އެ ގައުމުން ހުއްދައެއް ނުދިނެވެ.

ރޮއިޓާސް އިން ބުނީ ފްލައިދުބާއީގެ މަތިންދާބޯޓެއް ކުއްލި ހާލަތުގައި ސައުދީ އަރަބިއްޔާގައި ޖެއްސުމާ ގުޅިގެން، އެ ބޯޓުގައި ތިބި އިސްރާއީލުގެ ފަސިންޖަރުން އަނބުރާ ގެންދިއުމަށް އިސްރާއީލުގެ އަސްކަރީ މަތިންދާބޯޓުތަކެއް ސައުދީއަށް ފޮނުވަން އެގައުމުން ކުރި މަސައްކަތަށް ހުއްދަ ދިނުމަށް ސައުދީ ސަރުކާރުން ދެކޮޅު ހަދާފައިވާ ކަމަށެވެ.

ބުދަ ދުވަހު ހިނގި މި ހާދިސާގައި، 174 ފަސިންޖަރުންނާއެކު ދަތުރުކުރި ފްލައިޓް ނަންބަރު FZ1073 ގެ ކޮކްޕިޓް ތެރޭގައި ހަމަނުޖެހުން ހިނގަން ފެށުމުން، ބޯޓު ވަނީ ވަރަށް ބޮޑަށް ތިރިވާން ފަށާފައެވެ. ނަމަވެސް ބޯޓުގައި ތިބި ފަސިންޖަރުންނާއި، ކްރޫން އަދި އޮފް-ޑިއުޓީގައި ތިބި އެހެން ޕައިލެޓުންތަކެއް ވަނީ ކޮކްޕިޓަށް ވަދެ، ހަމަލާދިން ކޯ-ޕައިލެޓް (އޮމާން ރައްޔިތެއް) ހިފަހައްޓައި ބޯޓުގެ ކޮންޓްރޯލް އަނބުރާ ހޯދާފައެވެ.

ބޯޓު ހައިޖެކް ކުރަން އުޅޭކަމުގެ ސިގްނަލް (7500) ދިނުމަށްފަހު، ސައުދީގެ ޕްރިންސް ސުލްތާން ބިން އަބްދުލްއަޒީޒް އިންޓަނޭޝަނަލް އެއާޕޯޓަށް ވަނީ ސަލާމަތްތެރިކަމާއެކު ޖައްސާފައެވެ. އެއަރޕޯޓުގެ އޮފިޝަލުންނާ ހަވާލާދީ ރިޕޯޓުތައް ބުނާގޮތުގައި، ކެޕްޓަނާއި ކޯ-ޕައިލެޓަށް އަނިޔާވެގެން ވަނީ ހޮސްޕިޓަލަށް ގެންގޮސްފައެވެ.

މި ފްލައިޓުގައި ގިނައިން ތިބީ އިސްރާއީލުގެ ރައްޔިތުންނެވެ. ހާދިސާއާ ގުޅިގެން، ފަސިންޖަރުން އަނބުރާ ގެންދިއުމަށް އިސްރާއީލުގެ އަސްކަރީ މަތިންދާބޯޓުތަކެއް ފޮނުވުމުގެ ހުއްދައަށް އިސްރާއީލުން ސައުދީ އަރަބިއްޔާގައި އެދުނެވެ. ނަމަވެސް، ސައުދީ އާއި އިސްރާއީލާ ދެމެދު ރަސްމީ ޑިޕްލޮމެޓިކް ގުޅުމެއް ގާއިމުކޮށްފައި ނުވާތީ، ސައުދީން ވަނީ އެ ހުއްދަ ދިނުމަށް އިންކާރުކޮށްފައެވެ.

އިސްރާއީލުގެ ބޯޓުތަކަށް ހުއްދަ ނުދިނުމުން، ފަސިންޖަރުންގެ ދަތުރު ކުރިއަށް ގެންދިއުމަށްޓަކައި ފްލައިދުބާއީގެ އެހެން މަތިންދާބޯޓެއް ވަނީ ތަބޫކް އެއަރޕޯޓަށް ފޮނުވާފައެވެ. އަދި ބުދަ ދުވަހުގެ ހަވީރުގެ ވަގުތެއްގައި ފަސިންޖަރުން ވަނީ އެ ބޯޓުގައި އިސްރާއީލަށް ދިއުމަށް ފުރާފައެވެ.