ލޯންޗް ކައިރިކުރާ ޖެޓީތައް ހަދަން އުތުރު ފަރާތު ފަޅުތެރެ ހުސްކުރަން އަންގައިފި

މާލޭ އުތުރު ފަރާތު ބަނދަރުގައި އަޅާ އާ ޖެޓީތަކުގެ މަސައްކަތް ނޮވެމްބަރު މަހަށް ނިންމުމަށް އަމާޒު ހިފައި، އެ މަޝްރޫއުގެ އަމަލީ މަސައްކަތް ފެށުމަށްޓަކައި މާދަމާ ރޭ 11:00 ގެ ކުރިން އެ ސަރަހައްދުގެ ފަޅުތެރެ ހުސްކުރަން އަންގައިފި އެވެ.

ހައުސިން މިނިސްޓްރީން ބުނީ، އުތުރު ފަރާތު ބަނދަރު ބޭނުންކުރުމުގައި އާންމުންނަށް ދިމާވެފައިވާ ދަތިތަކަށް ހައްލެއް ގެނެސްދިނުމުގެ ގޮތުން ފަށާ މި މަޝްރޫއަށް ޖާގަ ހެދުމަށްޓަކައި، މަސްވެރިންގެ ޕާކު ސަރަހައްދުން ފެށިގެން ނާދީ ގޯޅިއާ ހަމައަށް އަޅާފައިވާ ހުރިހާ އުޅަނދެއް ނަގަން ޖެހޭނެ ކަމަށެވެ. އަދި މާދަމާ ރޭގެ ކުރިން އަމިއްލައަށް ނުނަގައި ހުންނަ އުޅަނދުފަހަރު، މިނިސްޓްރީގެ ފަރާތުން ނަގާނެ ކަމުގެ އިންޒާރުވެސް ވަނީ ދީފައިވެ އެވެ.

އަތޮޅުތަކުން މާލެ އަންނަ ލޯންޗުތަކަށް ފަސޭހައިން ގާތްކުރެވޭނެ އިންތިޒާމު ހަމަޖެއްސުމަށްޓަކައި އެމްއެމްއޭ ކުރިމަތިން އޮންނަ ފަޅުތެރެ ތަރައްގީކުރަނީ ގިނަ ކުދި ފާލަންތަކެއް ހިމެނޭ ގޮތަށެވެ. މި ބަދަލާއެކު އެއްފަހަރާ ގިނަ އަދަދެއްގެ އުޅަނދުފަހަރަށް ޖެޓީއާ ގާތްކުރެވޭނެ އެވެ.

މި މަޝްރޫއުގެ ކުރެހުންތައް ރައީސް ޑރ. މުހައްމަދު މުއިއްޒު ފާއިތުވި ޖުލައި މަހު އާންމުކުރައްވާފައިވާއިރު، އެމަނިކުފާނު ވަނީ މިއަހަރުގެ ނޮވެމްބަރު މަހުގެ ނިޔަލަށް މި މަސައްކަތް އެއްކޮށް ނިންމަވާނެކަން އިއުލާނުކުރައްވާފައެވެ.

ބޮޑުތަކުރުފާނު މަގު ފުޅާކޮށް ތާރު އެޅުމަށް 144 މިލިއަން ރުފިޔާއަށް އެމްޓީސީސީއާ ހަވާލުކޮށްފައިވާ މި މަޝްރޫއު ފަށާފައިވަނީ 2025 ވަނަ އަހަރުގެ އޮގަސްޓް މަހުއެވެ. އެ މަސައްކަތް ހަވާލުކޮށްފައިވަނީ 455 ދުވަހުގެ ތެރޭގައި ނިންމާ ގޮތަށެވެ.