ޓޫރިސްޓުން އަންނަ އަދަދު އިތުރުވިޔަސް 56,014 މީހުން މަދު

މިދިޔަ މަހުގެ ނިޔަލަށް ޓޫރިސްޓުން އައި އަދަދު އިތުރުވިނަމަވެސް މިދިޔަ އަހަރަށްވުރެ އައި މީހުންގެ އަދަދު 56,014 މަދު ކަމަށް ދައްކައިފި އެވެ. 

ޓޫރިޒަމް މިނިސްޓްރީން އެންމެ ފަހުން ނެރުނު ތަފާސް ހިސާބުތައް ދައްކާ ގޮތުގައި މިދިޔަ މަހުގެ 29 ވަނަ ދުވަހުގެ ނިޔަލަށް ރާއްޖެއަށް ޖުމްލަ 1,595,923 މީހުން ޒިޔާރަތްކޮށްފި އެވެ. މިއީ ފާއިތުވި 2025 ވަނަ އަހަރާ އަޅާބަލާއިރު -3.4% ގެ ދަށްވުމެކެވެ.

މިއަހަރު އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިންނެވެ، އެއީ 298,891 ފަތުރުވެރިންނާއެކު ޖުމްލަ ޓޫރިސްޓުން % 19.1 އެވެ. ދެވަނައަށް އެންމެ ގިނަ ޓޫރިސްޓުން އައިސްފައިވަނީ ރަޝިޔާއިންނެވެ. އެއީ 228,681 ޓޫރިސްޓުންނާއެކު % 14.6 އެވެ. އަދި ތިންވަނައިގައި އޮތީ 119,687 ޓޫރިސްޓުންނާއެކު (7.6%) އިނގިރޭސިވިލާތެވެ.

ޓޫރިޒަމް ހިސާބުތައް ދައްކާ ގޮތުން މި އަހަރު ދުވާލެއްގެ މައްޗަށް އެވްރެޖްކޮށް 5,867 މީހުން ރާއްޖެ އަށް ޒިޔާރަތްކުރެއެވެ. އަދި ކްރޫޒް ޕެސެންޖަރުންގެ ގޮތުގައި މިއަހަރު 15,583 މީހުން ރާއްޖެއަށް އައިސްފައިވެއެވެ.

ރާއްޖޭގައި މި ވަގުތު އޮޕަރޭޓްކުރަމުންދާ އެނދުގެ ޖުމްލަ އަދަދަކީ 67,869 އެވެ. މީގެ ތެރެއިން 66% (45,141 އެނދު) އަކީ ރިސޯޓުތަކެވެ. އަދި 25% (16,748 އެނދު) އަކީ ގެސްޓްހައުސްތަކެވެ. ރާއްޖެއަށް ޒިޔާރަތްކުރި ފަތުރުވެރިންގެ ތެރެއިން 73.7% (1,154,458 މީހުން) ޗުއްޓީ ހޭދަކޮށްފައިވަނީ ރިސޯޓުތަކުގައެވެ. އަދި 22.0% (344,215 މީހުން) ޗުއްޓީ ހޭދަކޮށްފައިވަނީ ގެސްޓްހައުސްތަކުގައެވެ.

މިދިޔަ އަހަރު ރާއްޖެއަށް 2 މިލިއަން ޓޫރިސްޓުން އައިސްފައިވެ އެވެ. އަދި މި އަހަރު 2.2 މިލިއަން މީހުން އަންނާނެ ކަމަށް ސަރުކާރުން ވަނީ އަންދާޒާކޮށްފަ އެވެ.