މިއަހަރު އަލަށް އެޗްއައިވިއަށް 22 މީހަކު ޕޮޒިޓިވް، ޖުމްލަ ބަލިޖެހިފައި ތިބީ 53 މީހަކު

މިއަހަރު އަލަށް 22 މީހަކު ރާއްޖޭގައި އެޗްއައިވީއަށް ޕޮޒިޓިވްވެފައިވާ ކަމަށާއި، ބަލި ޖެހިފައި ތިބި 53 މީހުން ދުނިޔޭގައި އެބަތިބި ކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ގީލާ ވިދާޅުވީ 1991 ގައި ރާއްޖޭން އެންމެ ފުރަތަމަ އެޗްއައިވީގެ ކޭސްއެއް ފެނުނު ދުވަހުން ފެށިގެން މިއަދާ ހަމައަށް ބަލި ޖެހިގެން ރިޕޯޓު ކޮށްފައި ވަނީ 71 ދިވެހިން ކަމަށެވެ. އޭގެތެރެއިން މިހާރު ދުނިޔޭގައި ތިބީ 53 މީހުންނެވެ.

މިނިސްޓަރު ވިދާޅުވީ އެންމެ ފުރަތަމަ ރާއްޖޭން ބަލި ފެނުމާއެކު، ބަލި ޖެހިފައި ތިބި މީހުންނަށް ސިއްހީ ފަރުވާއާއި އެހީތެރިކަން ފޯރުކޮށްދިނުމަށް ދައުލަތުން ފެށި ނޭޝަނަލް ޕްރޮގްރާމު މިހާރު ވެސް ކުރިއަށް ގެންދާ ކަމަށާއި، އެފަދަ މީހުންނަށް މިހާރު ފޯރުކޮށްދެމުން ދަނީ އެންމެ ޒަމާނީ، އެންމެ ފަހުގެ ބޭސްފަރުވާ ކަމަށެވެ.

އަދި މިހާރު އެޗްއައިވީއަށް ދޭ ބޭހަކީ އެމީހާގެ ކިބައިން އެ ވައިރަސް އެހެން މީހުން ގަޔަށް އަރާ މިންވަރު ވަރަށް ބޮޑަށް ކުޑަކޮށްދޭ ބޭހެއްކަން ވެސް މިނިސްޓަރު ފާހަގަކުރެއްވި އެވެ.

މިނިސްޓަރު ވިދާޅުވީ އެންމެ ގިނައިން ރާއްޖޭގައި މިބަލި ފެތުރެނީ ރައްކާތެރި ނޫން ޖިންސީ ގުޅުމުގެ ސަބަބުން ކަމަށެވެ. އެހެންކަމުން ރައްކާތެރިކަމާއެކު އެފަދަ ގުޅުންތައް ހިންގުމަކީ މުހިންމު ކަމެއްކަން ފާހަގަކުރައްވާފައިވެ އެވެ.

"އަދިވެސް ދިވެހިރާއްޖެއަކީ ލޯ ޕްރިވެލެންޓް ކަންޓްރީއެއްގެ ގޮތުގައި ދުނިޔެއިން ފާހަގަކުރޭ، މާނައަކީ އާބާދީގެ 0.01 ޕަސެންޓޭ އަދިވެސް އެޗްއައިވީއަށް ހުށަހެޅި، އެޗްއައިވީއަށް ޑިޓެކްޓް ކުރެވިގެން ދަނީ،" މިނިސްޓަރު ވިދާޅުވި އެވެ.