ޑިއުޓީ އަދާ ކުރަނިކޮށް ނިޔާވާ ފުލުހުންގެ އާއިލާތަކަށް ބޭސްފަރުވާ ދެނީ

ޑިއުޓީ އަދާކުރަނިކޮށް ނުވަތަ ވާޖިބު އަދާކުރަނިކޮށް ނިޔާވާ ފުލުހުންގެ އާއިލާއަށް ވެސް ބޭސްފަރުވާ ދިނުމަށް ނިންމައިފި އެވެ.

ފުލުހުންގެ ވަޒީފާގެ ގަވާއިދަށް ގެނައި އާ އިސްލާހުގައި ވަނީ، ފުލުހުންގެ އާއިލާތަކަށް ބޭސްފަރުވާ ކޮށްދޭ އުސޫލުން، ވާޖިބު އަދާކުރަނިކޮށް ނިޔާވާ ފުލުހުންގެ އާއިލާތަކަށް ވެސް ފުލުހުންގެ ހިދުމަތުން ބޭސްފަރުވާ ކޮށްދޭން ވާނެ ކަމެވެ.

ގަވާއިދަށް ގެނައި އިތުރު އިސްލާހެއްގައި ވަނީ، ވާޖިބު އަދާކުރަނިކޮށް ނިޔާވާ ފުލުހުންނަށް ދޭ އިނާޔަތްތައް ހިސާބުކުރަން ވާނީ، ނިޔާވުމަށްފަހު ރޭންކުގެ ކުރިއެރުން ދިނުމުން، އެ ރޭންކުގެ މުސާރައަށް ބަލައިގެން ކަމަށެވެ.

އަދި، ވާޖިބު އަދާކުރަނިކޮށް ނިޔާވާ ފުލުހުންގެ ޖަނާޒާ ވަކި ރަސްމިއްޔާތެއްގައި ބޭއްވުމަށް ނިންމިދާނެ ކަމަށް ވެސް އެ ގަވާއިދުގައިވެ އެވެ. އެގޮތަށް ނިންމޭނީ އެ އޮފިސަރަކު ނިޔާވި ހާލަތާއި، ދިމާވި ހާދިސާގައި ކަންހިނގައިދިޔަ ގޮތަށާއި، އެފަރާތުން އަދާކުރި ދައުރަށް ބަލައި، އެގްޒެކެޓިވް މެނޭޖްމަންޓް ބޯޑަށް ހުށަހަޅައިގެން އެ ބޯޑުން ނިންމާ ގޮތަކަށެވެ.

ވާޖިބު އަދާކުރަމުން ދަނިކޮށް ނިޔާވާ ފުލުހުންގެ އާއިލާއަށް ވެސް ބޭސްފަރުވާ ކޮށްދޭން ޖެހޭގޮތް ހަދާފައިވާއިރު، ޝަރަފުވެރިކަމާއެކު ރިޓަޔާކުރާ ފުލުހުންގެ އިނާޔަތްތަކަށް ބަދަލެއް ގެނައުމަށް ނިންމާފައިވާ ކަމަށް މީގެ ކުރިން ކޮމިޝަނާ އޮފް ޕޮލިސް އަހުމަދު މުހައްމަދު ވަނީ ވިދާޅުވެފަ އެވެ.