އެންމެ ލަގްޒަރީ އެއް ބްރޭންޑް "އަމަން" އެއާޕޯޓަކާއެކު ވާވު އަތޮޅަށް

ދުނިޔޭގެ މަޝްހޫރު ހޮސްޕިޓާލިޓީ ލަގްޒަރީ ބްރޭންޑް ކަމަށްވާ "އަމާން" އިން އެއާޕޯޓަކާއެކު ހަދާ ލަގްޒަރީ ވިލާތައް ނިމުމަކާ ގާތް ވެއްޖެ އެވެ. 

ފޮއްތެޔޮ ފަޅުގައި ހިންގާ މި މަޝްރޫއަކީ މިވަގުތު ރާއްޖޭގައި ހިންގާ އެންމެ ބޮޑު އެއް މަޝްރޫ އެވެ. ފިޔަވަހިތަކަށް ބަހާލާފައިވާ ބޮޑު މި ފަޅުގައި ފުރަތަމަ ރިސޯޓުގައި 52 ކޮޓަރީގެ އިތުރުން 16 ބްރޭންޑެޑް ރެޒިޑެންސް ތަރައްގީ ކުރާނެ އެވެ. މި ފަޅުގައި މީގެ އިތުރުން އަމަން ބްރޭންޑުގެ ލަގްޒަރީ ފަސް ރިސޯޓު ތަރައްގީ ކުރާނެ އެވެ. މި އެއާޕޯޓް ވެގެންދާނީ ވ. އަތޮޅުގައި ތަރައްގީ ކުރާ ފުރަތަމަ އެއާޕޯޓް އަށެވެ. ތަރައްގީ ކުރަނީ އެންމެ ޒަމާނީ ފެންވަރުގެ އެއާޕޯޓެކެވެ. މިފަޅު ހިއްކީ ދިވެހި ކުންފުންޏަކުންނެވެ. އަދި ކޮންސްޓްރަކްޝަންގެ މަަސައްކަތް ކުރަނީ ވެސް ދިވެހި ކުންފުނިތަކުންނެވެ. މި މަޝްރޫއާއެކު 3،000 ވަޒީފާ އިތުރު ވެގެންދާނެ އެވެ. 

އަމަން އިން ބުނެފައިވާ ގޮތުގައި ކެރީ ހިލް އާކިޓެކްޓްސް އިން ފަރުމާކޮށްފައިވާ "އަމާނޮޅު" ގެ ނަން ދީފައިވާ މި ބޮޑު މަޝްރޫއުގެ ރިސޯޓްތައް އަންނަ އަހަރު ހުޅުވަން ފަށާނެ އެވެ. 

އެ ކުންފުނިން ބުނެފައިވާ ގޮތުގައި ރާއްޖޭގެ ގުދުރަތީ ރީތިކަމާއި ދޮންވެލި ތުނޑިތަކާއި ސާފު ފިރުމުނާ ކުލައިގެ ފަޅުތަކާ ގުޅޭގޮތަށް ފަރުމާކޮށްފައިވާ މި ރިޒޯޓުގެ ކޮންމެ އަމާން ރެޒިޑެންސެއް ތަރައްގީކުރާނީ ވަކި ރަށެއްގެ ގޮތުގަ އެވެ. ފަސް ކޮޓަރީގެ މި ރެޒިޑެންސްތަކުން އިރުއަރާ މަންޒަރާއި އިރުއޮއްސޭ މަންޒަރު ވަރަށް ފުރިހަމަ އަށް ފެންނަން ހުންނާނެ އެވެ. އަދި އެތެރެއާއި ބޭރުގައި އުޅެވޭނެ ތަނަވަސް ޖާގައާއި، ޕްރައިވެޓް ބީޗެއްގެ އިތުރުން 25 މީޓަރުގެ ސްވިމިން ޕޫލެއް ހިމެނޭނެ އެވެ. މީގެ ސަބަބުން ފަތުރުވެރިންނަށް ފުރިހަމަ ޕްރައިވަސީއަކާއެކު ގުދުރަތީ ވެއްޓާ ގުޅިލާމެހިގެންދާނެ އެވެ.

އަމާނޮޅުގައި ދުޅަހެޔޮކަމަށް (ވެލްނެސް) ހާއްސަ ވަކި ރަށެއް އޮންނާނެ އެވެ. މި ރަށުގައި ތަނަވަސް އަމާން ސްޕާއަކާއި ސިގްނޭޗާ ސްޕާ ހައުސްތައް ހުންނާނެ އެވެ. މީގެ އިތުރުން އެކި ހަރަކާތްތަކަށް ޚާއްސަ ރަށެއްވެސް އޮންނާނެއެވެ. އެތަނުން ޑައިވިންގ، ސްނޯކްލިން، އަދި ވޯޓަރސްޕޯޓްސްގެ އެކި ހަރަކާތްތަކުގެ އިތުރުން ކެއިންބުއިމުގެ ޚިދުމަތްތަކާއި އާއިލާތަކަށް ޚާއްސަ ފެސިލިޓީތައް ލިބެން ހުންނާނެއެވެ.

އަމަންއަކީ 1988 ވަނަ އަހަރު އުފެދުނު ބްރޭންޑެކެވެ. މި ބްރޭންޑުގެ ދަށުން މިހާތަނަށް ދުނިޔޭގެ އެކި ކަންކޮޅުތަކުގައި 36 ހޮޓަލާއި ރިޒޯޓު އަދި ރެޒިޑެންސްތައް ވަނީ ހުޅުވާފަ އެވެ. އަމާނޮޅު ވެގެންދާނީ މި ބްރޭންޑުގެ މަޝްހޫރު މެހެމާންދާރީއާއި ލައިފްސްޓައިލް ރާއްޖެ އަށް ތައާރަފްކުރާ ފުރަތަމަ ފަހަރަށެވެ.