އުފެއްދުންތެރިކަމުގެ މައުރަޒު | ތަކެތި ބައިވެރި ކުރުމުގެ ތާރީހުތައް

ހަ ހާހަށްވުރެ ގިނަ އުފެއްދުންތަކާއެކު މިއަހަރު ބާއްވާ ދިވެހިންގެ އުފެއްދުންތެރިކަމުގެ މައުރަޒުގައި ބައިވެރިކުރާ ތަކެތި، އަންނަ އަންނަ މަހުގެ ހަތް ވަނަ ދުވަހުން ފެށިގެން ބަލައިގަންނަން ނިންމައިފި އެވެ.

ދިވެހިންގެ އުފެއްދުންތެރިކަމުގެ މައުރަޒުގައި ވާދަކުރުމުގެ ބައިގައި ބައިވެރިވުމުގެ ފުރުޞަތު މިހާރު ވަނީ ބަންދުވެފައެވެ. ނަމަވެސް ފޯމު ހުށައެޅި ފަރާތްތަކުން ހުށައަޅާ ހުށައެޅުންތައް ރަޖިސްޓްރީކުރުމުގެ ފުރުޞަތު މިހާރު އޮތީ ހުޅުވާލާފައެވެ. ބިޒްނަސް ސެންޓަރު ކޯޕަރޭޝަން (ބީސީސީ) އިން މަޢުލޫމާތުދޭގޮތުގައި ވާދަކުރުމުގެ ބައިގައި 700 އަށްވުރެ ގިނަ މީހުން ބައިވެރިވެފައިވާއިރު، މައުރަޒުގައި ބެހެއްޓުމަށް މިހާތަނަށް 6،000 އަށްވުރެ ގިނަ ތަކެތި ވަނީ ރަޖިސްޓްރީކޮށްފައެވެ.

މައުރަޒުގައި ބައިވެރިކުރާ ތަކެތި ބަލައިގަތުމަށް ހަމަޖެހިފައިވަނީ އެކި ގިންތިތަކަށް ބަހާލައިގެންނެވެ. އެގޮތުން ކާބޯތަކެއްޗާއި، ދަނޑުވެރިކަމުގެ އުފެއްދުންތަކުގެ އިތުރުން މަސްވެރިކަމުގެ އުފެއްދުންތަކާއި ވެލިއު އެޑިޝަން ބަލައިގަންނާނީ އޮކްޓޯބަރު 15 ވަނަ ދުވަހުއެވެ. ކޭކް ޑެކަރޭޝަން އޮކްޓޯބަރު 17 ވަނަ ދުވަހު ބަލައިގަންނަން ހަމަޖެހިފައިވާއިރު، އެހެނިހެން ހުރިހާ އުފެއްދުންތައް ބަލައިގަންނާނީ އޮކްޓޫބަރު 7 އިން 13 އަށެވެ. އަދި އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ ގިންތީގެ އުފެއްދުންތައް ބަލައިގަންނާނީ ފަހުން އާންމުކުރާ އޮންލައިން ލިންކެއް މެދުވެރިކޮށެވެ.

ތަކެތި ބަލައިގަތުމަށް ހަމަޖެހިފައިވަނީ މި މުއްދަތުގެ ތެރޭގައި ކޮންމެ ދުވަހަކު ހެނދުނު 10:00 އިން ރޭގަނޑު 20:00 އަށް، މައުރަޒު ބޭއްވުމަށް ހަމަޖެހިފައިވާ ހުޅުމާލެ ސެންޓްރަލް ޕާކް ގައެވެ. ބީސީސީން އިލްތިމާސްކުރާ ގޮތުގައި ތަކެތި ހަވާލުކުރާއިރު ޕޯޓަލް މެދުވެރިކޮށް ހުށަހަޅަންޖެހޭ ހުރިހާ މައުލޫމާތެއް ފުރިހަމަ ކުރަންވާނެއެވެ. އަދި ބަންދުކުރަންޖެހޭ ތަކެތި ހުންނަންވާނީ ރައްކާތެރިކަމާއެކު ބަންދުކޮށްފައެވެ.

މިއަހަރުގެ ދިވެހިންގެ އުފެއްދުންތެރިކަމުގެ މައުރަޒު އޮންނާނީ އޮކްޓޯބަރު 25 އިން ނޮވެންބަރު 2 ގެ ނިޔަލަށެވެ. މައުރަޒުގެ ޑިސްޓްރިކްޓްތަކުގައި ބައިވެރިވުމުގެ ފުރުޞަތު ހުޅުވާލާފައިވާއިރު، ތަކެތި ވިއްކުމަށް ޚާއްސަ މާކެޓް ޕްލޭސްގެ ހުރިހާ ޖާގަތަކެއް ވަނީ ފުރުޞަތު ހުޅުވާލި ދުވަހު ފުރިފައެވެ.

މިދިޔަ އަހަރު 5 ޑިސްޓްރިކްޓާއެކު ބޭއްވި މި މައުރަޒުގައި މިއަހަރު ތަފާތު އެކި ބާވަތުގެ އުފެއްދުންތެރިކަން ދައްކުވައިދޭ 7 ޑިސްޓްރިކްޓެއް ހިމެނޭނެއެވެ. އޭގެ ތެރޭގައި ދީނީ ދާއިރާ، ޓެކްނޮލޮޖީ ދާއިރާ، އަދި އިންޓަރނޭޝަނަލް ޑިސްޓްރިކްޓެއް ވެސް ހިމެނެއެވެ.