ދެ އަހަރެއްހާ ދުވަސް ފަހުން އާރަށު މައްސަލައިގެ ޝަރީއަތް ފަށައިފި

ވ. އާރަށު މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އުފުލާފައިވާ ހިޔާނާތުގެ ދައުވާ ސާބިތު ކުރުމަށް ދައުލަތުގެ ފަރާތުން ހުށަހެޅި އާ ހެކިތަކެއްގެ މައްސަލަ ސުޕްރީމް ކޯޓުން ނިންމަންދެން މައުލޫއީ މައްސަލަ މަޑުޖައްސާލުމަށްފަހު، ކްރިމިނަލް ކޯޓުން މައްސަލައިގެ ޝަރީއަތް ފަށައިފި އެވެ.

އާރަށު މައްސަލައިގައި ރައީސް ޔާމީންގެ މައްޗަށް އުފުލާފައި ވަނީ ރިޝްވަތު ހިފުމާއި މަނީލޯންޑަރިންގެ ދައުވާ އެވެ. މި މައްސަލަ މީގެ ކުރިން ކްރިމިނަލް ކޯޓުން ބަލައި ނިންމުމަށްފަހު އެ މަނިކުފާނުގެ މައްޗަށް ކުށް ސާބިތުވާކަމަށް ކަނޑައަޅާފައިވެ އެވެ. މި ދެ ދައުވާ ސާބިތުވެ، ޑިސެމްބަރު 25. 2022 ގައި ކްރިމިނަލް ކޯޓުން ހުކުމް ކޮށްފައި ވަނީ އެ މަނިކުފާނު 11 އަހަރަށް ޖަލަށްލުމާއެކު ފަސް މިލިއަން ޑޮލަރުން ޖޫރިމަނާ ކުރުމަށެވެ. މި މައްސަލައިގައި ދެން ހިމެނޭ ޔޫސުފް ނައީމް ޖަލަށްލީ ތިން އަހަރަށެވެ.

ކުށް ސާބިތު ވުމުން މި ދެ ބޭފުޅުންގެ ފަރާތްޕުޅުން ވަނީ މައްސަލަ ހައިކޯޓުގައި އިސްތިއުނާފު ކޮށްފަ އެވެ. އެ ކޯޓުން ވަނީ މައްސަލަ އަލުން ކްރިމިނަލް ކޯޓަށް ތަހުވީލުކޮށް، އެ ހުކުމް ބާތިލު ކޮށްފަ އެވެ.

 ނަމަވެސް އަލުން މައްސަލަ ބަލައި ގޮތެއް ކަނޑައަޅަން ހައިކޯޓުން ނިންމިއިރު، ދިފާއީ ހެކި ނަފީ ކުރުމަށް ދައުލަތުން ހުށަހެޅި އާ ހެކިތައް އެއްފަރާތް ކުރުމަށް ނިންމި ބައި ދައުލަތުގެ ފަރާތުން ސުޕްރީމް ކޯޓުގައި އިސްތިއުނާފް ކޮށްފައިވެ އެވެ. އެ މައްސަލަ ނިމެންދެން، ކްރިމިނަލް ކޯޓަށް ތަހުވީލު ކުރި މައްސަލަ މަޑު ޖައްސާލަން ސެޕްޓެމްބަރު 16، 2024 ގައި އެ ކޯޓުން ވަނީ ނިންމާފަ އެވެ.

އޭގެ ފަހުން ސުޕްރީމް ކޯޓުން ވަނީ މި މައްސަލަ ސާބިތު ކުރުމަށް ދައުލަތުގެ ފަރާތުން ކްރިމިނަލް ކޯޓުގައި ހުށަހެޅި އާ ހެކިތައް ބަލައި ނުގަންނަން ހައިކޯޓުން ނިންމުމުމަށް ތާއީދު ކޮށްފަ އެވެ.

ދެ އަހަރެއްހާ ދުވަސްފަހުން އާރަށު މައްސަލައިގެ އަޑުއެހުމެއް މިއަދު ކްރިމިނަލް ކޯޓުގައި ވަނީ ބާއްވާފަ އެވެ. މި އަޑުއެހުމުގައި ޝަރީއަތުގެ ކުރިން ހުށަހަޅާ ހުށަހެޅުންތައް ހުށަހަޅާފައިވާއިރު، ޔާމީންގެ ފަރާތްޕުޅުން ހުށަހެޅުއްވި ހެކިތަކެއް ބަލައިނުގަންނަން ދައުލަތުން ވަނީ އެދިފަ އެވެ.