ކަނޑުމަގުން ވަގަށް އެތެރެކުރަން އުޅުނު 8 މިލިއަނަށްވުރެ ގިނަ ސިނގިރޭޓު އަތުލައިގެންފި

ކަނޑުމަގުން ވަގަށް ރާއްޖެ އެތެރެކުރަން އުޅުނު ގިނަ އަދަދެއްގެ ސިނގިރޭޓު މޯލްޑިވްސް ކަސްޓަމްސް އިން އަތުލައިގެންފި އެވެ.

ކަސްޓަމްސް އިން ބުނީ މިދިޔަ އާދީއްތަ ދުވަހު މާލޭ ކޮމާޝަލް ހާބަރުގައި ހިންގި ހާއްސަ އޮޕަރޭޝަނެއްގައި “ޖެނެރަލް ކާގޯ” ގެ ގޮތުގައި ޑިކްލެއާ ކޮށްފައިވާ ޝިޕްމަންޓެއް ބަލާފާސްކުރިއިރު، އެ ޝިޕްމަންޓުގެ ތެރެއިން ގިނަ އަދަދެއްގެ ސިނގިރޭޓް ފޮރުވާފައި ހުއްޓައި ފެނިފައިވާ ކަމަށެވެ. 

އެގޮތުން އެ ޝިޕްމެންޓުން ޖުމްލަ 8،527،480 ސިނގިރޭޓް ސްޓިކްސް ހޯދައި، ކަސްޓަމްސްގެ ބެލުމުގެ ދަށަށް ވަނީ ގެންގޮސްފަ އެވެ.

މި މައްސަލައިގައި ތުހުމަތު ކުރަނީ ކޮން ބަޔަކަށް ކަމެއް އަދި މީހަކު ހައްޔަރު ކޮށްފައިވާ ކަމެއް ސާފެއް ނުވެ އެވެ. މައްސަލަ އިތުރަށް ތަހުގީގު ކުރަމުންދާ ކަމަށް ކަސްޓަމްސް އިން ވަނީ ބުނެފަ އެވެ.