ޝުޖާއު ޔާމީނަށް ހަނދާންކޮށްދިނީ ބިން މިލްކުރެވޭ ގޮތް ހެދި ދުވަސް

އީގަލްސް ހިލްސް އިން ރަސްމާލޭގައި ހިންގާ މަޝްރޫއުގައި 99 އަހަރަށް ބިން ދޭތީ ކުރީގެ ރައީސް އަބްދުﷲ ޔާމީން ފާޑުވިދާޅުވުމުން އެމަނިކުފާނުގެ ވެރިކަމުގައި ބޭރު ފަރާތްތަކަށް ރާއްޖެއިން ބިން މިލްކު ކުރެވޭ ގޮތަށް ގާނޫނުއަސާސީ ބަދަލުކުރެއްވި ދުވަސް ހަނދާން ކޮށްދީފި އެވެ.

ޕީއެންއެފްގެ ފްރަންޓް އޮފީސް ޖަލްސާގައި ވާހަކަ ދައްކަވަމުން ޔާމީން ވަނީ އީގަލްސް ހިލްސް އިން ރާއްޖޭގައި ކުރިޔަށް ގެންދާ މަޝްރޫއަށް ވަރަށް ބޮޑަށް ފާޑު ވިދާޅުވެފަ އެވެ.

އެގޮތުން އެއީ ރާއްޖެ އަށް އެއްވެސް ފައިދާއެއް ކުރާނެ މަޝްރޫއެއް ނޫން ކަމަށާއި ވެރިކަން ލިބިވަޑައިގެންފި ނަމަ އެ މަޝްރޫއު ހުއްޓުވާނެ ކަމަށް ޔާމީން ވިދާޅުވި އެވެ. އެ މަޝްރޫއާ ދެކޮޅުވާ މައިގަނޑު ސަބަބެއް ކަމަށް ޔާމީން ވިދާޅުވީ ބޭރު ފަރާތްތަކަށް 99 އަހަރަށް ބިން ކުއްޔަށް ދިނުމެވެ. ޔާމީން ވިދާޅުވީ އެއީ އުމުރު ދުވަހަށް ރަސްމާލެ ދޫކޮށްލުން ކަހަލަ ކަމެކެވެ. އަދި އެކަމުން ސަލާމަތް ނުވެވިގެން ދިވެހިން ތަހަންމަލު ކުރަން ޖެހޭނެ ކަމަށް އޭނާ ވިދާޅުވި އެވެ.

އެކަމަށް ރައްދު ދެއްވައި ޕީއެންސީގެ ނައިބު ރައީސް އަދި ބާރަށު ދާއިރާގެ މެންބަރު އިބްރާހިމް ޝުޖާއު އެކްސްގައި ޕޯސްޓު ކުރެއްވީ ޔާމީންގެ ވެރިކަމުގައި ރާއްޖޭގެ ބޭރު ފަރާތްތަކަށް ބިން މިލްކު ކުރެވޭ ގޮތަށް ގާނޫނުއަސާސީ އަށް ގެނައި އިސްލާހު ތަސްދީގު ކުރެއްވުމަށް ދެއްވި ތަގުރީރެވެ.

އަށާރަ ވަނަ މަޖިލީހުގައި އެ އިސްލާހަށް ތާއީދު ކުރައްވާ ވޯޓު ދެއްވި ޝުޖާއު ވިދާޅުވީ ބިން މިލްކު ކުރެވޭ ގޮތަށް ގާނޫނުއަސާސީ ބަދަލު ކުރުމަށް ފަހު ލިބިވަޑައިގެންނެވި އުފާވެރި އިހުސާސް ޔާމީން ރައްޔިތުންނާ ހިއްސާ ކުރެއްވި ކަމަށާއި ނަމަވެސް އޭރު އެކަމާ ދެކޮޅަށް ހުންނެވީ ކުރީގެ ނައިބު ރައީސް މުހައްމަދު ޖަމީލް ފަދަ ބޭފުޅުން ކަމަށެވެ.

އީގަލްސް ހިލްސްގެ މަޝްރޫއު ހިންގަނީ އެ ފަރާތްތަކަށް ބިން މިލްކު ކުރެވޭ ގޮތަކަށް ނޫން ކަމަށާއި ނަމަވެސް އެފަދަ ބޮޑު މަޝްރޫއެއް ރައީސް ޑރ. މުހައްމަދު މުއިއްޒު ގެންނެވުމުން އެކަން ގަބޫލު ނުކުރެއްވެނީ ކީއްވެތޯ ޝުޖާއު ސުވާލު ކުރެއްވި އެވެ.

"ހަމަ އެހާ އަމިއްލަ އެދުންފުޅު ބޮޑީތޯ؟ މަނިކުފާނަށް ނުކުރެވުނު ކަމެއް، ދިވެހި ރައްޔިތުންނަށް މާ ފައިދާ ބޮޑުވާނޭ ހެން، ދިވެހިރާއްޖޭގެ ފުރިހަމަ ސިޔާދަތީ ބާރު ހިނގާނޭގޮތައް ރައީސް މުއިއްޒު ކުރައްވާތީ އެކަމަށް ހަމަ ހިތްނޭދެނީތޯ؟" ޝުޖާއު ވިދާޅުވި އެވެ.

ޔާމީންގެ ވެރިކަމުގައި އެފަދަ އެންމެ ބޮޑު އިންވެސްޓްމަންޓަކަށް ހިންގަން އުޅުނީ ފ. ހިމިތީ މަޝްރޫއެވެ. އެއީ ގާތްގަނޑަކަށް 10 ބިލިއަން ޑޮލަރުގެ މަޝްރޫއެކެވެ. ޔާމީން ވަނީ އެ މަޝްރޫއަށް ހުރަސް އެޅި ފަރާތްތައް ރަސްމާލޭގައި ހިނގާ 20 ބިލިއަން ޑޮލަރުގެ މަޝްރޫއަށް ހުރަސް ނާޅާތީ ވެސް ފާޑު ވިދާޅުވެފަ އެވެ.