އެމެރިކާގެ ވައިގެ ބޭހަށް ހަމަލާދޭން އުޅުނު މީހުން ދޫކޮށްލުމުން ޓްރަމްޕުގެ ފާޑު ކިއުން

އެމެރިކާގެ އަސްކަރިއްޔާއިން ބޭނުންކުރަމުން އަންނަ، އިނގިރޭސިވިލާތުގެ ވައިގެ މަރުކަޒަކަށް ޓެރަރިސްޓް ޙަމަލާއެއް ދޭން އުޅުނުކަމުގެ ތުހުމަތުގައި ހައްޔަރުކުރި 5 މީހަކު ކަފާލާތުގެ ދަށުން ދޫކޮށްލުމާ ގުޅިގެން، އެމެރިކާގެ ރައީސް ޑޮނަލްޑް ޓްރަމްޕް އިނގިރޭސި ސަރުކާރަށް ފާޑުވިދާޅުވެއްޖެ އެވެ.

އޯވަލް އޮފީހުގައި ނޫސްވެރިންނާ ވާހަކަފުޅުދައްކަވަމުން ޓްރަމްޕް ވިދާޅުވީ، އެ މީހުން ދޫކޮށްލުމުން "ހައިރާންވި" ކަމަށާއި އޭނާ ނަމަ އެ މީހުން ދޫކޮށްނުލައްވާނެ ކަމަށެވެ. އަދި މިކަމުގެ ފަހަތުގައި އީރާނުގެ އަތެއް ވެދާނެކަމަށްވެސް އޭނާ އިޝާރާތްކުރެއްވިއެވެ. އިތުރު ތަފްޞީލެއް ނުދެއްވާ ޓްރަމްޕް ވިދާޅުވީ "މީގެ ޖަވާބު އަހަންނަށް އެނގޭ. ވަރަށް ސާފުކޮށް ބުނަންވެސް އެނގޭ، އެކަމަކު މިވަގުތު ބުނަން ބޭނުމެއް ނޫން" ކަމަށެވެ.

އިނގިރޭސިވިލާތުގެ ހުޅަނގުގައި އޮންނަ ފެއާފޯޑް މަރުކަޒު ކައިރިން މި 5 މީހުން ހައްޔަރުކޮށްފައިވަނީ އާދީއްތަ ދުވަހުގެ ފަތިހުގެ ވަގުތެއްގަ އެވެ. މިއީ އީރާނާ ދެކޮޅަށް އެމެރިކާގެ 'ބީ-1' ބޮމްބަރުތަކުން އުދުހުންތައް ބާއްވަމުން އަންނަ މަރުކަޒެކެވެ. 

އިނގިރޭސި ކައުންޓަރ-ޓެރަރިޒަމް ފުލުހުން މަޢުލޫމާތު ދޭގޮތުގައި ހައްޔަރުކުރި މީހުންނަކީ އުމުރުން 23 އަހަރާއި 25 އަހަރާ ދެމެދުގެ، ލަންޑަނަށް ނިސްބަތްވާ އިނގިރޭސި ރައްޔިތުންނެވެ.

ކަފާލާތުގެ ދަށުން އެމީހުން ދޫކޮށްލި ނަމަވެސް، ތަޙްޤީޤު އަދި ނުނިމޭކަމަށާއި އެ މީހުންގެ ޙަރަކާތްތައް ވަރަށް ގާތުން މޮނިޓާ ކުރެވޭނެކަމަށް ފުލުހުން ބުނެފައިވެ އެވެ. މީގެ އިތުރުން ފުލުހުންގެ އިސް އޮފިޝަލެއް ކަމަށްވާ ލޯރެންސް ޓޭލާ ވިދާޅުވީ، ބޭރު ޤައުމެއްގެ ނުފޫޒުން ނުވަތަ އެހެން ބަޔަކު މެދުވެރިކޮށް މިކަން ކޮށްފައިވުމުގެ ފުރުސަތު އޮތްތޯ ފުލުހުން ބަލަމުން އަންނަ ކަމަށެވެ.

އެމެރިކާގެ ސެކްރެޓަރީ އޮފް ސްޓޭޓް މާރކޯ ރޫބިއޯ ފޮކްސް ނިއުސްއަށް ދެއްވި އިންޓަވިއުއެއްގައި ވިދާޅުވީ މިއީ ފާޅުކަންބޮޑު ގޮތެއްގައި ބޭރު ޤައުމެއްގެ އަތެއް އޮވެގެން ރާވާފައިވާ ކަމެއް ކަމަށެވެ. އަދި މިއީ ވަރަށް ނުރައްކާތެރި ޙަމަލާއަކަށް ވުމުގެ ފުރުސަތު އޮތް ކަމެއްކަން ފާހަގަކުރައްވައި އިނގިރޭސިވިލާތުން ދިން އެއްބާރުލުމަށް އޭނާ ވަނީ ޝުކުރު އަދާކުރައްވާފަ އެވެ. ނަމަވެސް އީރާނުން ވަނީ މިކަމުގައި އެ ޤައުމުގެ އެއްވެސް ބައިވެރިވުމެއް ނުވާކަމަށް ބުނެފަ އެވެ.

މި ހާދިސާއާ ގުޅިގެން އިނގިރޭސި ބޮޑުވަޒީރު އެންޑީ ބާންހަމް ވަނީ ޤައުމީ ކުއްލި ޙާލަތްތަކުގައި ބައްދަލުކުރާ ކޮމިޓީ (ކޯބްރާ) ގެ ހާއްސަ ބައްދަލުވުމެއް ހޯމަ ދުވަހު ބާއްވަވާފަ އެވެ. އެ ބައްދަލުވުމަށްފަހު ޑިފެންސް ސެކްރެޓަރީ ވެސް ސްޓްރީޓިންގ ވިދާޅުވީ ތަޙްޤީޤު އަދިވެސް ކުރިއަށްދާ ކަމަށާއި ދޫކޮށްލާފައިވާ 5 މީހުންނާމެދު ހަރުކަށި ޝަރުތުތަކެއް ކަނޑައަޅާފައިވާ ކަމަށެވެ. 

އިންޓީރިއާ މިނިސްޓަރ ޝަބާނާ މަޙްމޫދު ވިދާޅުވީ އެ ސަރަޙައްދު މިހާރު ރައްކާތެރިކަމަށެވެ. އަދި ސަލާމަތީ ފިޔަވަޅެއްގެ ގޮތުން އެ ސަރަޙައްދުން ހުސްކުރި 85 ގެއެއްގެ މީހުންނަށް އަނބުރާ ގެއަށް ދިއުމުގެ ހުއްދަ ފުލުހުން މިހާރު ވަނީ ދީފަ އެވެ.

ފުލުހުން މި މީހުން ހައްޔަރުކުރި ސަރަޙައްދުގައި ހުރި ތިން ވޭނެއް ވަނީ ކޯޑަންކޮށްފަ އެވެ. އާދީއްތަ ދުވަހު އާންމުވި ވީޑިއޯތަކުން ފެންނަ ގޮތުގައި ބޮމް ޑިސްޕޯސަލް ރޮބޮޓެއް އެ ވޭންތަކުގެ ކައިރީގައި ހަރަކާތްތެރިވަމުން ދިޔަ އެވެ. އަދި ސީއެންއެންގެ ޓީމުތަކަށް އެ ސަރަޙައްދުން ކޮންޓްރޯލްޑް ޑެޓޮނޭޝަން (ގޮއްވާލުމުގެ) ދެ އަޑެއް އިވިފައިވެ އެވެ. ޓްރަމްޕްގެ ވާހަކަފުޅުތަކާ ގުޅިގެން އިނގިރޭސި ސަރުކާރުން (ޑައުނިން ސްޓްރީޓުން) ވަކި އެއްޗެއް ބުނެފައި ނުވާއިރު، އެމީހުން ވަނީ ފުލުހުންގެ ބަޔާނަށް ޙަވާލާދީފަ އެވެ.