އޮގަސްޓު މަހުގެ އިންފްލޭޝަން 1.15 ޕަސެންޓް ދަށް

މި އަހަރުގެ އޮގަސްޓް މަހު ރާއްޖޭގެ އިންފްލޭޝަން 1.15 ޕަސެންޓް ދަށްވެފައިވާ ކަމަށް ކޮންސިއުމާ ޕްރައިސް އިންޑެކްސް (ސީޕީއައި) އިން ދައްކައިފި އެވެ. 

މޯލްޑިވްސް ބިއުރޯ އޮފް އެސްޓެޓިސްޓިކްސް (އެމްބީއެސް) ގެ ތަފާސްހިސާބުތަކުން ދައްކާގޮތުގައި 2026 ވަނަ އަހަރުގެ ޖުލައި މަހާ އަޅާބަލާއިރު އޮގަސްޓް މަހު ރާއްޖޭގެ ކޮންސިއުމަރ ޕްރައިސް އިންޑެކްސް (ސީޕީއައި) 1.15 ޕަސެންޓް ދަށަށް ދިއުމުގެ މައިގަނޑު ސަބަބަކީ ކަރަންޓާއި ވައިގެ ދަތުރުފަތުރުގެ އަގުތައް ހެޔޮވުމާ ގުޅިގެންނެވެ.

އޮގަސްޓް މަހު ކަރަންޓުގެ އަގު 3.21 ޕަސެންޓް ދަށަށް ގޮސްފައިވާއިރު، ވައިގެ ދަތުރުފަތުރުގެ އަގު ވަނީ 2.80 ޕަސެންޓް ހެޔޮވެފަ އެވެ. އަދި ދުންފަތުގެ ބާވަތްތަކުގެ އަގު ވަނީ 25.45 ޕަސެންޓްގެ ބޮޑު މިންވަރަކަށް ދަށަށް ގޮސްފަ އެވެ. ބައެއް ބާވަތްތަކުގެ ކާބޯތަކެއްޗާއި ޚިދުމަތްތަކުގެ އަގު ބޮޑުވި ނަމަވެސް، ޖުލައި މަހާ އަޅާބަލާއިރު އޮގަސްޓް މަހު ރާއްޖޭގެ އަގުތަކުގެ އިންޑެކްސް 1.15 ޕަސެންޓް ދަށަށް ގޮސްފައިވެ އެވެ. 

މި އަހަރުގެ ޖުލައި މަހާ އަޅާބަލާއިރު އަގުތައް ދަށަށް ދިޔަ ނަމަވެސް، 2025 ވަނަ އަހަރުގެ އޮގަސްޓް މަހާ އަޅާބަލާއިރު މިއަހަރުގެ އޮގަސްޓް މަހުގެ އަގުތައް ހުރީ 0.76 ޕަސެންޓް މަތީގަ އެވެ. މިއީ މަހުން މަހަށް ބަލާއިރު އަގުތައް ދަށްވި ނަމަވެސް، އަހަރުން އަހަރަށް ބަލާއިރު އަގުތަކަށް ކުޑަ ކުރިއެރުމެއް އައިސްފައިވާކަމަށް ރިޕޯޓުގައި ފާހަގަކޮށްފައިވެ އެވެ.

މަހުން މަހަށް އައި މި ބަދަލަކީ ގޭބިސީތަކުން އާންމުކޮށް ގަނެއުޅޭ ތަކެތީގެ އަގަށް އައި އެވްރެޖް ބަދަލެކެވެ. ބައެއް ތަކެތީގެ އަގު އޮގަސްޓް މަހު ވަނީ އުފުލިފަ އެވެ. އެގޮތުން ކިރާއި ކިރުގެ އުފެއްދުންތަކުގެ އިތުރުން ބިހުގެ އަގު 1.99 ޕަސެންޓް އުފުލިފައިވާއިރު، މޭވާއާއި ތަރުކާރީގެ އަގު ވަނީ 1.19 ޕަސެންޓް ބޮޑުވެފަ އެވެ. އަދި މަހުގެ ބާވަތްތަކުގެ އަގު ވަނީ 0.83 ޕަސެންޓަށް އުފުލިފަ އެވެ.


ހިދުމަތްތަކުގެ އަގަށް ބަލާއިރު މުވާސަލާތީ ހިދުމަތުން 2.23 ޕަސެންޓް ގެސްޓްހައުސްތަކުގެ އަގުތަކުން 2.72 ޕަސެންޓް، އަދި ކާބޯތަކެތީގެ ހިދުމަތްދޭ ތަންތަނާއި ހޮޓާތަކުގެ އަގުތަކުން 0.68 ޕަސެންޓް ވަނީ އިތުރުވެފަ އެވެ. މީގެ އިތުރުން ސިއްހީ ހިދުމަތްތަކުގެ އަގު ވަނީ 0.99 ޕަސެންޓް އުފުލިފަ އެވެ.

ރާއްޖޭގެ ކޮންސިއުމާ ޕްރައިސް އިންޑެކްސް (ސީޕީއައި) 1.15 ޕަސެންޓް ދަށަށް ގޮސްފައިވާއިރު ރިޕޯޓުގައި މާލެއާއި އަތޮޅުތެރޭގެ ނިސްބަތްވެސް ހާމަކޮށްފައި ވެއެވެ. އެގޮތުން، މާލޭގެ ސީޕީއައި އިންޑެކްސްވަނީ ޖުލައި މަހާ އަޅާބަލާއިރު 1.57 ޕަސެންޓް ދަށަށްގޮސްފަ އެވެ. އަދި އަތޮޅުތެރޭގައި މިއަދަދު ވަނީ 0.54 ޕަސެންޓް ދަށްވެފަ އެވެ.