ކޫރިއާ މެދުވެރިކޮށް އެތެރެކުރަން އުޅުނު 11 ކިލޯގެ ޑްރަގު އަތުލައިގެންފި

ކޫރިއާ ހިދުމަތް މެދުވެރިކޮށް ރާއްޖެ އެތެރެކުރަން އުޅުނު 11 ކިލޯއަށްވުރެ ގިނަ މަސްތުވާތަކެތި މޯލްޑިވްސް ކަސްޓަމްސް އިން އަތުލައިގެންފި އެވެ.

ކަސްޓަމްސް އިން ބުނީ މިމަހުގެ ހަތް ވަނަ ދުވަހު ހިންގި އޮޕަރޭޝަނެއްގައި އަތުލައިގެންފައި ވަނީ 11.7 ކިލޯގެ ކެނެބިސް ކަމަށެވެ.

ކަސްޓަމްސް އިން ބުނީ ‏އެތަކެތި އަތުލައިގަނެފައިވަނީ ކޫރިއާ މެދުވެރިކޮށް ރާއްޖެ ގެނެސްފައިވާ ދެ ޕެކޭޖެއް ބަލައިފާސްކުރަމުން ދިޔައިރު، އޭގެ ތެރޭގައި މަސްތުވާތަކެތި ފޮރުވާފައި ހުރިކަމަށް ޝައްކުކުރެވިގެން، އިތުރަށް ބަލާފާސްކުރުމުގެ ތެރޭގައި ކަމަށެވެ.

ނަމަވެސް މި މައްސަލައާ ގުޅިގެން މިހާތަނަށް މީހަކު ހައްޔަރުކުރި ކަމެއް އަދި ސާފެއް ނޫނެވެ.