އިންވެސްޓްމަންޓުތަކަށް މަރުހަބާ، އެކަމަކު ހާމަކަން ބޮޑުވާން ޖެހޭނެ: ފައްޔާޒް

ރަސްމާލެ މަޝްރޫއުގެ ދަށުން އީގަލް ހިލްސް ކުންފުންޏަށް 500 ހެކްޓަރުގެ ބިން ދިނުމުގައި ސަރުކާރުން އަމަލު ކޮށްފައި ވަނީ ހާމަކަން ބޮޑު ގޮތެއްގައި ނޫން ކަމަށާއި ބޭރުގެ އިންވެސްޓްމަންޓްތަކަށް މަރުހަބާ ކީނަމަވެސް އެފަދަ އެއްބަސްވުންތަކުގެ މާލީ އަދި ގާނޫނީ ތަފްސީލުތައް އާންމުކުރަންޖެހޭނެ ކަމަށް ކުރީގެ އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވެއްޖެ އެވެ.

އެމްޑީޕީގެ ރިޔާސީ ޓިކެޓަށް ވާދަ ކުރައްވައި އަދި އެ ޕާޓީގެ ޗެއާޕާސަން ކަން ވެސް ކުރެއްވި ފައްޔާޒް ރޭ ނެރުއްވި ބަޔާނެއްގައި ވިދާޅުވީ ރަސްމާލެ އިން 500 ހެކްޓަރުގެ ބިން ދީފައިވާ މުއާމަލާތުގެ ތަފްސީލުތައް ރައްޔިތުންނާއި ރައްޔިތުންގެ މަޖިލީހާއި މީޑިއާތަކަށް ސަރުކާރުން ހާމަ ކޮށްފައި ނުވާ ކަމަށެވެ. 

ރަސްމާލެ އިން ބޮޑު ހަރަދުކޮށްގެން ހިއްކި ބިމުގެ ބޮޑު ބައެއް ދޫކޮށްލާ އިރު އޭގެ މިނިވަން ވެލުއޭޝަނެއް ހަދާފައި ނުވާ ކަމަށާއި އެ ބިމުގެ ބަދަލުގައި ދައުލަތަށ އެކަށީގެންވާ އަގެއް ލިބިފައިވޭތޯ ވެސް ކަށަވަރު ނުކުރެވޭ ކަމަށް ފައްޔާޒް ވިދާޅުވި އެވެ. 

މީގެ އިތުރުން ރަސްމާލޭގެ ބިންތައް 99 އަހަރަށް ކުއްޔަށް ދިނުމަށްފަހު އެ ބިން އެހެން ފަރާތަކަށް ވިއްކާލާ ނުވަތަ ވާރުތަވާ ކޮންމެ ފަހަރަކު އަލުން 99 އަހަރުގެ މުއްދަތެއް ފެށޭ ގޮތަށް އޮތުމަކީ އެއީ ދާއިމަށް މިލްކުވާ ގޮތަށް އެ ފަރާތްތަކަށް ބިން ދޫކޮށްލުން ކަމަށް ފައްޔާޒް ވިދާޅުވި އެވެ.

ނަމަވެސް ދިވެހިންނަކީ އަބަދުވެސް އެގޮތަށް ފްރީހޯލްޑް އުސޫލުން ބިން ދިނުމާ ދެކޮޅު ބައެއް ކަމަށާއި ހާއްސަކޮށް ރާއްޖެ އަށް ދިމާވެފައިވާ ބޯހިޔާވެހިކަމުގެ މައްސަލަ ހައްލު ކުރުމަށް އެތައް ބިލިއަނެއް ހޭދަ ކޮށްގެން ހިއްކި ތަނެއް އެފަދަ ގޮތަށް ދޫކޮށްލުމަކީ ބަލައިގަނެވޭނެ ކަމެއް ނޫން ކަމަށް ވެސް ފައްޔާޒް ވިދާޅުވި އެވެ.

ފައްޔާޒް ވިދާޅުވީ ރާއްޖޭގެ ރައްޔިތުން އެދެނީ އިންވެސްޓްމަންޓްތަކަށް ހުރަސް އަޅައި މަދު ކުރުމެއް ނޫން ކަމަށާއި ބޭނުން ވަނީ ދިވެހިންގެ އަތުން ދޫކޮށްލެވޭ ކަންކަމާއި އޭގެ ބަދަލުގައި ގައުމަށް ލިބޭ މަންފާގެ ހާމަކަން ބޮޑުކޮށް ސާފުވުން ކަމަށެވެ.