އީގަލްސް ހިލްސް މަޝްރޫއު ހިންގަން ރިފަރަންޑަމް ބާއްވަންޖެހޭ: ޔާމީން
ޔާމީން ވިދާޅުވި ގޮތުގައި ފެންނަ ނުފެންނަ ވޯޓަކަށް ދާން ޖެހޭނީ ދެ އިންތިހާބު އެއްކޮށްލާކަށް ނޫނެވެ. ރަސްމާލެ މަޝްރޫއު ހިންގުމާ މެދު ގޮތެއް ނިންމަން ރައްޔިތުން ކައިރީ އެހުން މާ މުހިންމު ކަމަށް ޔާމީން ވިދާޅުވި
ޔޫއޭއީގެ މަޝްހޫރު ޑިވަލޮޕަރު، އީގަލް ހިލްސް އިން ރަސްމާލޭގައި ކުރިޔަށް ގެންދާ މަޝްރޫއު ހިންގަން ފެންނަ ނުފެންނަ ވޯޓެއް ނަގަން ޖެހޭ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފްގެ ފްރަންޓް އޮފީސް ޖަލްސާގައި ރޭ ވާހަކަ ދައްކަވަމުން ޔާމީން ވިދާޅުވީ އެ މަޝްރޫއު ހިންގުމުގެ ކުރިން ކެބިނެޓަށް ގެންދިޔުމުގެ އިތުރުން ބަންޑާރަނައިބު ގެ ލަފާ ހޯދަން ޖެހޭނެ ކަމަށެވެ. އޭގެ އިތުރުން އެވަރުގެ "ހީލަތްތެރި" މަޝްރޫއެއް ހިންގާއިރު ރައްޔިތުންގެ ފެންނަ ނުފެންނަ ވޯޓަކަށް ވެސް ދާން ޖެހޭނެ ކަމަށް ޔާމީން ވިދާޅުވި އެވެ.
ގާނޫނުއަސާސީން ގުޑް ގަވަންސް އަށް ބާރު އަޅާއިރު ބޮޑެތި ކަންކަން ނިންމާއިރު ރައްޔިތުން ކައިރީ އެހުމުގެ އިހްތިޔާރު ރައީސަށް ލިބިގެންވާ ކަމަށާއި ރައްޔިތުން ކައިރިއަށް ދާން ވާނީ ހަމައެކަނި ދެ އިންތިހާބު އެއްކުރަން އެކަނި ނޫން ކަމަށް ވެސް ޔާމީން ވިދާޅުވި އެވެ.
"ދެ އިންތިހާބު އެއްކޮށްލާފައި މުއިއްޒަށް އުމުރު ހުސްވަންދެން ވެރިކަމުގެ ހުރެވޭތޯ ބަލާކަށް އެކަންޏެއް ނޫން ރިފަރަންޑަމް އަށް ދާނީ. މިއީ [ރަސްމާލެ މަޝްރޫއު އަކީ] އެއަށް ވުރެ މާ ބޮޑު ކަމެއް،" ޔާމީން ވިދާޅުވި އެވެ.
ޔާމީން ވިދާޅުވި އެ މަޝްރޫއު ކުރިޔަށް ގޮސްފި ނަމަ އެކަން ވެގެން ދާނީ ރައްޔިތުންނަށް ސަލާމަތް ނުވެވިގެން އުޅެން ޖެހޭ ވަރުގެ ބޮޑު މުސީބާތަކަށް ކަމަށެވެ.
އެ މަޝްރޫއާ ގުޅޭ ގޮތުން ޔާމީން ހުރިހާ ފާޑު ކިޔުމެއް އަމާޒު ކުރެއްވީ ޔޫއޭއީ އާއި އިޒްރޭލާ ދެމެދު އޮންނަ ގުޅުމާ ގުޅުވައިގެންނެވެ. އަދި ޔާމީން ސިފަ ކުރެއްވި ގޮތުގައި އެކަމަކީ މާލެ ކައިރިން ޔަހޫދީންނަށް ބިން ދިނުން ފަދަ ކަމެކެވެ.
އެކަމާ ދެކޮޅަށް އިދިކޮޅު ފަރާތްތަކާއި ދީނީ އިލްމުވެރިން ތެދުވެ ބަސް ނުބުނާތީ ވެސް ޔާމީން ވަރަށް ބޮޑަށް ފާޑު ވިދާޅުވި އެވެ.
ކޮމެންޓް
Republic of Maldives