ރާއްޖޭގައި މެރިން ޓެކް ޓްރެއިނިންގް ޕްރޮގްރާމެއް

އއ. އުކުޅަސް: ކަނޑުދަތުރުފަތުރުގެ ޒަމާނީ ޓެކްނޮލޮޖީއާއި ތަމްރީނުތަކަށް އަމާޒުކޮށްގެން ދިވެހިރާއްޖޭގައި ފުރަތަމަ ފަހަރަށް ބާއްވާ "މެރިން ޓެކް ޓްރެއިނިންގް" ޕްރޮގްރާމް އއ. އުކުޅަހުގައި ބާއްވައިފި އެވެ. 

އުކުޅަހު ކޮންވެންޝަން ސެންޓަރުގައި ސެޕްޓެމްބަރު 26 އިން 28 އަށް ކުރިއަށްދާ މި ޕްރޮގްރާމަކީ އުޅަނދުފަހަރުގެ ވެރިންނާއި، ދާއިރާގެ ފަންނީ މާހިރުންނާއި، ޓެކްނޮލޮޖީ ފޯރުކޮށްދޭ ފަރާތްތަކުގެ އިތުރުން ކަނޑުދަތުރުފަތުރުގެ ދާއިރާގެ މަޝްހޫރު ބްރޭންޑްތައް އެއް ފުރާޅެއްގެ ދަށަށް ގެނެސްދޭ މުހިންމު ހަރަކާތެކެވެ. މި ކޮންފަރެންސް އިންތިޒާމުކޮށްފައިވަނީ ކެޕްޓަން އަންވަރު އިސްނަންގަވައިގެން، އޯޝަންއެކްސް މެރިން، މެރިންވައިބް އަދި އުކުޅަސް ކައުންސިލް ގުޅިގެންނެވެ.

މި ތަމްރީނު ޕްރޮގްރާމްގައި މައިގަނޑު ގޮތެއްގައި އަލިއަޅުވާލަނީ ކަނޑުމަތީގެ މަސައްކަތްތަކަކީ ރައްކާތެރި އަދި ހަރުދަނާ މަސައްކަތްތަކަކަށް ހެދުމަށް އެހީތެރިވެދޭ ޓެކްނޮލޮޖީއާއި ހުނަރުތަކުގެ މައްޗަށެވެ. އެގޮތުން، އެކޯ ސައުންޑަރ، ބާރޑް ރާޑަރ، އައުޓްބޯޑް އިންޖީނު، ނެވިގޭޝަން ސިސްޓަމްތައް އަދި އެހެނިހެން އިލެކްޓްރޯނިކް ވަސީލަތްތަކުގެ ލައިވް ޑެމޮންސްޓްރޭޝަންތައް މި އިވެންޓުގައި ކުރިއަށްދާނެއެވެ.

މި ތަމްރީނު ޕްރޮގްރާމްގައި މައިގަނޑު ގޮތެއްގައި އަލިއަޅުވާލަނީ ކަނޑުމަތީގެ މަސައްކަތްތަކަކީ ރައްކާތެރި އަދި ހަރުދަނާ މަސައްކަތްތަކަކަށް ހެދުމަށް އެހީތެރިވެދޭ ޓެކްނޮލޮޖީއާއި ހުނަރުތަކުގެ މައްޗަށެވެ. އެގޮތުން، އެކޯ ސައުންޑަރ، ބާރޑް ރާޑަރ، އައުޓްބޯޑް އިންޖީނު، ނެވިގޭޝަން ސިސްޓަމްތައް އަދި އެހެނިހެން އިލެކްޓްރޯނިކް ވަސީލަތްތަކުގެ ލައިވް ޑެމޮންސްޓްރޭޝަންތައް މި އިވެންޓުގައި ކުރިއަށްދާނެއެވެ.

މި ޕްރޮގްރާމްގައި ކްލާސްތައް ނަންގަވައިދެއްވަނީ ސިމްރަޑްގެ ސީނިއަރ ޕްރޮޑަކްޓް މެނޭޖަރ އެޑަމް ކިންގް އާއި، ރާއްޖޭގެ މަސްވެރިކަމާއި ކަނޑުދަތުރުފަތުރުގެ ދާއިރާގައި ގިނަ ތަޖުރިބާތަކެއް ހޯއްދަވާފައިވާ ސިމްރަޑްގެ ލައިސަންސްޑް ޓެކްނީޝަން ކެޕްޓަން އަންވަރެވެ.

މި އިވެންޓާ ގުޅޭގޮތުން ކެޕްޓަން އަންވަރު ވިދާޅުވީ، މި ޓްރެއިނިންގްގެ މައިގަނޑު މަޤްޞަދަކީ ކަނޑުމަތީގައި ޢަމަލީ ގޮތުން ހަރަކާތްތެރިވާ ފަރާތްތަކަށް ބޭނުންވާ ޒަމާނީ ޓެކްނޮލޮޖީއާއި ޢަމަލީ މަޢުލޫމާތު ސީދާ އެފަރާތްތަކާ ހަމައަށް ފޯރުކޮށްދިނުން ކަމަށެވެ.

"މިއީ ދިވެހިރާއްޖޭގެ މެރިން ދާއިރާގައި މަސައްކަތްކުރާ ފަރާތްތަކަށް އައު ކަންކަން ދަސްކުރުމަށާއި، ޒަމާނީ ޓެކްނޮލޮޖީ ތަޖުރިބާކުރުމަށާއި، މި ސިނާޢަތުގެ މުސްތަޤްބަލު ބައްޓަންކުރަމުންދާ މަޝްހޫރު ބްރޭންޑްތަކާ ގުޅުން ބަދަހިކުރުމަށް ލިބިގެންދާ ވަރަށް އަގުހުރި ފުރުޞަތެއް،" އޭނާ ވިދާޅުވިއެވެ.

ވިޔަފާރި އުސޫލުން މަސްވެރިކަން ކުރާ ފަރާތްތަކާއި، ޗާޓަރ އަދި ޑައިވް އޮޕަރޭޓަރުންނާއި، މެރިން ސާމާނު ވިއްކާ ފަރާތްތައް ހިމެނޭގޮތަށް ގިނަ ބަޔަކު ބައިވެރިވާ މި އިވެންޓުގެ ޓައިޓަލް ސްޕޮންސަރަކީ ދިވެހި އިންޝުއަރެންސް އެވެ. މީގެ އިތުރުން ސިމްރަޑް، އޯޝަންއެކްސް، އުކުޅަހު ކައުންސިލް، މެރިން ވައިބް، ޕްރިންޓްލެބް، އިންކްޑް، އަދި ކޮރަލް ޓްރާންސްފަރ އިން ދަނީ މި އިވެންޓަށް ފުރިހަމަ އެއްބާރުލުން ދެމުންނެވެ.