ބިދޭސީންގެ މައްސަލަ އަންނަ އަހަރު މެއިގެ ނިޔަލަށް ހައްލުވާނެ : މިނިސްޓަރު އިހުސާން

ރާއްޖޭގައި ގަވާއިދާ ހިލާފަށް ބިދޭސީން އުޅުމާއި އެ ފަރާތްތަކުން ހުއްދަ ނެތި ވިޔަފާރި ކުރުމުގެ މައްސަލަ އަންނަ އަހަރު މެއި މަހާ ހަމައަށް ހައްލު ކުރަން އަމާޒު ހިފާފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

ތިން މިނިސްޓަރުންނާއެކު ރޭ ކުރިޔަށް ގެންދިޔަ "އަހާ" ފޯރަމްގައި ވާހަކަ ދައްކަވަމުން އިހުސާން ވިދާޅުވީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމަށް ހިންގާ އޮޕަރޭޝަންގެ ފުރަތަމަ ފިޔަވަހީގެ ދަށުން މަސައްކަތް ކުރީ ރާއްޖޭގައި އުޅޭ ބިދޭސީންގެ ބަޔޯމެޓްރިކްސް ނަގައި އެ މީހުންނަކީ ކޮބައިކަން ދެނެގަތުން ކަމަށެވެ.

ނަތީޖާއެއް ގޮތުން މި ވަގުތު ރާއްޖޭގައި ތިބި 263،000 އެއްހާ ބިދޭސީން ވެރިފައި ކޮށްފައިވާ ކަމަށާއި އޭގެ ތެރެއިން 95 ޕަސެންޓު މީހުންގެ ބަޔޯމެޓްރިކްސް ނަގާފައިވާ ކަމަށް އިހުސާން ވިދާޅުވި އެވެ. އަނެއް ހަތަރު ޕަސެންޓު މީހުން މިވަގުތު ރާއްޖޭގައި ނެތް ކަމަށާއި ބާކީ ނުނެގި ހުރީ އެއް ޕަސެންޓު މީހުން ކަމަށް އިހުސާން ވިދާޅުވި އެވެ.

"ގާތްގަނޑަކަށް 90 ޕަސެންޓު އޮޅުން ބޮޅުން އަރާފައި އޮތް އެއްޗެއް އަޅުގަނޑުމެން ހައްލު މި ކުރަނީ އެއް ޕަސެންޓުގެ ތްރެޝްހޯލްޑަކަށް. މުޅި ދުނިޔޭގައި ވެސް މިވަގުތަށް ބަލާއިރު ސިންގަޕޫރާއި ރާއްޖެ އަދި ޔޫއޭއީ ތިން ގައުމު މި އޮތީ އެއް ޕަސެންޓް ތްރެޝްހޯލްޑުގައި ބިދޭސީން ބަޔޮމެޓްރިކަލީ އައިޑެންޓިފައި ކުރޭ." އިހުސާން ވިދާޅުވި އެވެ.

ދެވަނަ ފިޔަވައްސަކީ އިހުސާން ވިދާޅުވި ގޮތުގައި ވިސާ ފީ ނުދައްކާ ނުވަތަ ރާއްޖެ އަށް ކުރަން އައި މަސައްކަތް ނުކޮށް ގަވާއިދާ ހިލާފަށް އެހެން މަސައްކަތްތަކުގައި އުޅޭ ފަރާތްތައް ޑީޕޯޓު ކުރުމެވެ.

މިފަހުން އއ. ތޮއްޑޫގައި ބޮޑު އޮޕަރޭޝަނެއް ހިންގާ 100 އަށް ވުރެ ގިނަ މީހުން ފޮނުވާލުމުގެ މަސައްކަތް ފަށާފައިވާ އިރު އެފަދަ އޮޕަރޭޝަންތައް ހުރިހާ ރަށެއްގައި ވެސް ކުރާނެ ކަމަށާއި އޭރުން ދުނިޔޭގައި ކުރިއަރާފައިވާ ގައުމުތައް ބަލައި މިންގަނޑަށް ބިދޭސީންގެ މައްސަލަ ހައްލު ވާނެ ކަމަށް އިހުސާން ވިދާޅުވި އެވެ.

މީގެ އިތުރުން ރާއްޖެ އަށް ބިދޭސީން ގެނައުމަށް ފަހު އެ މީހުންނާ މެދު އިހުމާލުވުމާއި ބިދޭސީން ޓްރެފިކް ކުރުމުގައި އުޅެ ދިވެހިންނާ މެދު ފިޔަވަޅު އެޅުމުގެ މަސައްކަތް ވެސް ކުރަމުންދާ ކަމަށް އިހުސާން ވިދާޅުވި އެވެ.

އެ ހުރިހާ ކަމަކާއެކީ ބިދޭސީންގެ މައްސަލަ އަންނަ އަހަރު މެއި މަހާ ހަމައަށް ހައްލު ކުރަން އަމާޒު ހިފާފައިވާ ކަމަށް ވެސް މިނިސްޓަރު ވިދާޅުވި އެވެ.

"[ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުވުމުން] މިހާރު ކަންމަތީގައި ބިދޭސީން ހިންގާ ފިހާރަތަކާއި ރާއްޖޭގެ ދަނޑުތައް އޯން ކުރަނީ ބިދޭސީން، ދޯނި ފަހަރުތަކުގައި މިތިބެނީ ބިދޭސީން، މާރުކޭޓުގައި މި ތިބެނީ ބިދޭސީން. މި ހުރިހާ ކަމެއް ބަދަލުވެ ދިވެހި ވިޔަފާރިވެރިން ވަދެ އެކަންކަމާ ހަވާލުވާ ދުވަހަކީ މަސައްކަތް ނިމޭނެ ވަގުތު." އިހުސާން ވިދާޅުވި އެވެ.